Read Bawm Chin 2 Lal 11 Bible Online

2 Lal 11 - Bawm Chin bible

2 Lal 11

¹Lalchem Ahaziah nu Athaliah nih a fapa an thah mi thu a theih le, lal dâwngsung zawzawng thah hep na ding hen thu a pêk.

²Ahaziah fapa Joash cho a âwl. Anih khawm thah bâk ding hen a um le, sikhawmsele Ahaziah farnu Jehoram fanu, a ninu Jehoseba nih a hum. A ninu nih a kalpi le, Biakin kardang sungah Athaliah muhlonâk ah a thuh, churuangah chun thah asi lo.

³Athahliah lalnu nih lâi a rêl sung kum ruk kar chu Jehoseba nih ngâksia chu Biakin sungah a thuh le, a zauhkhenh.

⁴Sikhawmsele, a kum sarihnâk ah bâwlpu Jehoiada nih lal vêngtu leh lal in vêngtu sinah mi a fial le, a thiltum ti ding mi lakah siat tham hen rem ti ding hen Biakin ah hawng ding hen a simh na. Ahaziah fapa Joash chu a zauhtir na le,

⁵hi bang thupêk tla hi a zauhtir na: “Dinhni ah thil ti ding hen nan hawng chun mun thum ṭhen hen munkhat chu lal in vêng ding asi;

⁶a dang munkhat nih Sûr kawtkâ vêng ding asi, a dang munkhat chu vêngtu tla dang dunglei ah mi kawtkâ an vêng ding asi.

⁷Murui nih nih Dinhni ah vêngtu ding hen kaltu tla nih lal rangah an vêng ding asi.

⁸Lalchem Joash chu nâmsâu phâwi chia zet hen a kalnâk zawngah nan vêng tet ding asi; nan kiangah hawngtu zawng chu nan thah na ding asi,” a ti.

⁹Hotu tla nih Jehoiada thusim chu an pawm le, an mi tla Dinhni ah thil ti ding mi tla a kal ding mi leh a kîr ding mi tla chu Jehoiada sinah an hawngpi na.

¹⁰Jehoiada nih hotu tla rangah Biakin ah mi David fei leh phaw tla a pêk na le,

¹¹Biakin mâilei ah kulh dak hen nâmsâu phâwi chia zet hen lal vêng ding hen a umtir na.

¹²Churawhchun, Jehoiada nih Joash chu a hawng suakpi le, a lû ah lallukhuh a khuh le, lal si hen lâirêlnâk bu a pêk. Churawhchun Joash chu sariak a thuh le, lal asi rawh ti an phuang. Zapi tla nih an kutza an bengh le, “Lal chu a san sâu seh,” ti hen an âu.

¹³Lalnu Athaliah nih vêngtu tla leh zapi tla nawk chur mi rihâu a theih le, mi zapi pumhnâk Biakin leiah chun a kal sawm.

¹⁴Chunah chun lalchem chu dân hâwi hen Biakin lûtnâk in tung kiangah a dîr. Hotu tla leh tâwtawrâwt tumtu tla nih an kulh dak; zapi tla chu lâwm bû hen an âu le, tâwtawrâwt tla an tum. Churawhchun Athaliah chu a lawksawng tukah a puan tla a thlêk le, “Phiarnâk thup, phiarnâk thup asi!” ti hen a âu.

¹⁵Jehoiada nih Biakin kiangah Athaliah thah ding chu rem a ti lo le, kawrsen hotu tla sinah, “Kha zapi nâwngah mi kha suakpi ule, amah hawng sanh ding hen awttu chu thah vima na u,” a ti na.

¹⁶Athaliah chu an tleih le, lal in ah an kalpi le, Rang Kulh kawtkâ kiangah an thah rawh.

¹⁷Bâwlpu Jehoiada nih Joash chu lal ah a siam le, zapi tla khawm LALPA thupêk zûl hen LALPA mi tla an si rawh; mi zapi leh lal karah thudântuk a siam piak na.

¹⁸Churawhchun zapi tla chu Baal biakin ah an kal le, an râwk dep; mâichâm leh milem tla an râwk le, Baal bâwlpu Mattan chu mâichâm mâika ah an thah. Jehoiada nih Biakin ah vêngtu a siah le,

¹⁹churawhchun amah leh hotu tla, lal vêngtu leh lal in vêngtu tla nih Biakin ah mi lal chu lal in ah an ṭhial le, mi zapi tla nih an zûl. Joash chu Vêng mi Kulh kawtkâ ah a lût le, a lal in ah laltophah chu a luah rawh.

²⁰Mi zawzawng anna lâwm le, khuapi khawm thlangam hen a um, Athaliah khawm chu lal in ah an thah rawh.

²¹Joash chu Juda lalchem asi liauah kum sarih mi asi.