Read Bawm Chin 2 Lal 12 Bible Online

2 Lal 12 - Bawm Chin bible

2 Lal 12

¹Israel lalchem Jehu nih lâi a rêl mi kum sarihnâk ah Joash chu Juda lalchem a hawng si, Jerusalem ah kum sâwmli lâi a rêl. A nu chu Bersheba khua mi Zibiah asi.

²Bâwlpu Jehoiada nih a sîntir mi asi ruangah a damsung zawng LALPA duhzia hen a um.

³Sikhawmsele, lunglotu tla pathian sawnhnâk chu veih asi lo le, chunah chun mi tla nih bâwlnâk leh rimthâw duahnâk an ap vima.

⁴Joash nih bâwlpu tla a kawh na le, Biakin ah bâwlnâk rang dingah tangka an pêk mi tla, dân hâwi hen bâwl ding hen khiah mi tla leh mah duh thu hen pêk mi tangka khawm kil ver ding hen thu a pêk na.

⁵Bâwlpu kip nih rianṭuannâk ah tangka an hawng pêk mi lakah mawhphurhnâk a nei le, chu tangka chu a herh zia zia hen Biakin remhnâk ah mang ding hen thu a pêk na.

⁶Sikhawmsele, Joash nih lâi a rêl mi kum kul leh kum thumnâk tiang khawmah Biakin chu remh asi dah lo rih.

⁷Churawhchun lalchem nih Jehoiada leh bâwlpu dang tla a kawh na le, “Zeirangah Biakin nan remh dah lo rih? Tusûn ni thawk hen tangka nan tawng mi kha nan kil kumza ding asi lo, remhtu tla sinah remh ding hen nan pêk na ding asi,” ti hen thu a pêk na.

⁸Bâwlpu tla nih chun remh ding hen rem an ti, remhlo khawmsele pawi an ti lêm loh.

⁹Bâwlpu Jehoiada nih tâwbala a lâk le, a sinh lakah a kua a siam; tâwbala chu Biakin lûtnâk vawrhlei kângah mâichâm kiangah a siah. Bâwlpu tla Biakin lûtnâk ah ṭuantu tla nih tâwbala sungah Pathian sawnhtu zawzawng tla nih tangka an pêk mi chu an siah rawh.

¹⁰Tâwbala ah mi tangka chu a tam tâwk ual rawh chun lal lasui rîntu leh bâwlpu lalchem an hawng le, tangkasa tla chu an êr le, an khingh.

¹¹Tangka um zat chiah an singsiah rawh. Chun tangkasa chu Biakin rianṭuan hotu tla sinah an pêk; chu tla nih chun thing nâwttu, lung in saktu tla,

¹²lung sâitu tla rangah an pêk na; thing châwknâk tla leh remhnâk dingah lung mang mi zawzawng tla leh a herh mi dang zawzawng rangah hêu mi khawm an pêk ver na.

¹³Tangka hâi, khêng, tâwtawrâwt, khâwnvâr tohnâk ruakhâu mawh, tangkasa leh ngûn hen siam mi thil dang zeizawng rang chu tangka tla chu mang asi lo.

¹⁴Rianṭuantu tla lawhman rangah leh a remhnâk thuamthil châwknâk ah mang asi.

¹⁵Rianṭuan hotu tla chu mi zumhkâi tak an si le, churuangah thawhlâwm chu zauhdik a herh loh.

¹⁶Rulhnâk thil ap leh sual ruangah thil ap tangka chu tâwbala sungah sanh asi lo; chu tla chu bâwlpu tla vo asi.

¹⁷Chu liau chun Siria lalchem Hazael nih Gath khua a do le, a neh; Jerusalem khawm do a tum.

¹⁸Juda lalchem Joash nih a lânah amah thlâktu tla Jehosaphat, Jehoram leh Ahaziah tla nih LALPA sinah thil an ap mi chu amah thil ap leh Biakin leh a lal in ah a siah mi ngûn tla chu Jerusalem thawk hen a kawrsen tla kîrpitu Hazael lal sinah lâwmman rangah a pêk hep.

¹⁹Joash lalchem thilti tla zawzawng chu Juda lal tla thâwngthâng rînnâk bu ah rîn asi.

²⁰Joash lalchem chu a rianṭuantu lakah panih Shimeath fapa Jozakar leh Somer fapa Jehozabad nih an phiar le, Silla leiah kalnâk lampi Jerusalem saklei ah tual an silh mi mun in pakhat an sak mi lakah an thah. Joash chu David khuapi ah lal thlân ah an vûi le, a fapa Amaziah chu a ruangrûl ah a lal.