Read Bawm Chin 2 Lal 13 Bible Online

2 Lal 13 - Bawm Chin bible

2 Lal 13

¹Juda lalchem Ahaziah fapa Joash lâi a rêl mi kum kul leh kum thumnâk ah Jehu fapa Jehoahaz chu Israel lal a hawng si le, Samari ah kum leisarih lâi a rêl.

²Amah lânah mi Jeroboam hâwi hen LALPA lakah Israel tla thilsual a ti pi na le, a thilsual ti chu a thlah duh rêng lo.

³Churuangah LALPA chu Israel tlûnah a thin a run le, Siria lalchem Hazael leh a fapa Benhadad chu Israel tla neh kumzatu ah a siam.

⁴Churawhchun, Jehoahaz nih LALPA sinah thla a cham le, LALPA nih Siria lal nih Israel tla a nehsawh na fâk zia a muh hen a thlachamnâk a sâng rawh.

⁵LALPA nih Israel chu ruitu, Siria kut thawk hen ruangsuahtu ding hen a fial le, alân hâwi hen thlangam tak hen Israel tla chu an um rawh.

⁶Sikhawmsele, Jeroboam nih a tipi na mi sualnâk chu an thlah dah lo rih, pathiannu Aserah lem Samari khua mi chu an kil kumza rih.

⁷Jehoahaz nih rang tlûn chuan mi sâwmnga, kari parâ leh kê hen kal mi kawrsen sîng khat cho lo chu kawrsen râlthuam chia dang a nei lo; a dang zawng chu Siria lalchem nih valeidip hâwi hen a chîl dip le, a veih dep.

⁸Jehoahaz thilti zawzawng leh a râlṭhatnâk rianṭuan tla zawzawng chu Israel lal thâwngthâng rînnâk bu ah rîn asi.

⁹Jehoahaz chu a thi le, Samari khua ah an vûi le, a fapa Jehoash a ruangrûl ah a lal.

¹⁰Juda lalchem Joash chu a lâirêl kum sâwmthum leh kum sarihnâk ah, Jehoahaz fapa Jehoash chu Israel lal a hawng si le, Samari ah kum leiruk lâi a rêl.

¹¹LALPA lakah thungâi thlâk hen thilsual a ti le, Jeroboam nih Israel tla thilsual a tipi na mi zia a châwng bâk.

¹²Jehoash thilti zawzawng Juda lalchem Amaziah hen anna do liauah a râlṭhat zia tla chu Israel lal thâwngthâng rînnâk bu ah rîn asi.

¹³Jehoash chu a thi le, Samari mi lal thlân ah an vûi le, a fapa Jeroboam panihnâk a ruangrûl ah a lal.

¹⁴Khuavâng Elisa chu thih phah rê ding nganfâk a tawng le, a thi awt bâiah Israel lalchem Jehoash nih a va veh le, “Ka pa, ka pa! Nang Israel vêngtu chak!” a ti le, a ṭap.

¹⁵Elisa nih, “Chanhtiang leh lîthal zum tla lâk!” a ti. Jehoash nih a lâk le, Elisa nih kah sek ding hen a tîm ding a simh.

¹⁶Lal nih chu hâwi a ti le, churawhchun Elisa nih a kut chu lal kut lakah a thâng.

¹⁷Khuavâng nih a simh zia hâwitê hen Siria leikâng hawi hen langawtkawt chu a awng le, Elisa nih, “Chanhtiang kah rawh,” a ti. Chu lîthal zum chu lal nih a kah kâ hen khuavâng nih chun, “Nang chu Siria nehtu ding hen LALPA chanhtiang thalzum na si. Na neh lân lo chu Aphek ah Siria tla chu na do lai,” a ti.

¹⁸Churawhchun Elisa nih lal chu thalzum dang a lâktir le, chu hen, “Tual kha sunh,” a ti. Lal nih tual chu veithum a sunh le, churawhchun â dîn rawh.

¹⁹Chu hâwi a ti mi nih chun Elisa a thin thawk le, lal sinah, “Vei nga vei ruk sunh le chu Siria chu na neh dep ding mi, sikhawmsele veithum cho na neh awt,” a ti.

²⁰Elisa chu a thi le, an vûi rawh. Kum siar hen Moab mi tla nih Israel ram chu an rûn.

²¹Veikhat chu ruak an vûi liau chirah rûntu tla lakah mi murui khat an muh le, ruak chu Elisa thlân lakah an lawnh thlap le, an tek hep. Chu ruak nih Elisa ruh chu a va tawngh kâ hen a hawng nung nawlh le, a dîr dan.

²²Israel lalchem Jehoahaz lâirêl kar zawzawng chu Siria lalchem Hazael nih thungâi a nehsawh na.

²³Sikhawmsele LALPA nih a dâwt na le, an lakah khua a ruat. LALPA nih veih dep ding a siang na lo le, a ṭangpi na. Abraham, Isak leh Jakob sinah a thutiam ruangah a mi tla chu a philh dah na lo.

²⁴Siria lalchem Hazael a thi le, a fapa Benhadad a hawng a lal.

²⁵Churawhchun Israel lalchem Jehoash nih Benhadad chu veithum a neh le, a pa Jehoahaz lâirêl liauah Benhadad nih a lâk mi khuapi tla khawm a lâk nawlh.