Read Bawm Chin 2 Lal 14 Bible Online

2 Lal 14 - Bawm Chin bible

2 Lal 14

¹Israel lalchem Jehoahaz fapa Jehoash lâirêl kum nihnâk ah Juda lalchem Joash fapa Amaziah chu

²kum kul leh kum nga mi asi hen lal ah a to le, Jerusalem ah kum kul leh kum kua lâi a rêl. A nu chu Jerusalem ah um mi Jehoadin asi.

³LALPA lawmhkâng hen thil a ti le, sikhawmsele amah thlâktu lalchem David hâwi chu asi lo, a pa Joash ti dân a châwng dauh.

⁴Lunglotu tla nih milem an sawnhnâk mun a râwk lo le, chunah chun mi tla nih bâwlnâk leh rimthâw an duah nget rih.

⁵Amaziah chu thuneihnâk bir tak a hawng a ting rawh chun a pa lal asi liauah thahtu tla rianṭuantu murui tla a thah na.

⁶Sikhawmsele, Mosi dân ah LALPA thupêk zûl hen an fa tla lam chu a thah na lo. “An fa tla sual ruangah an nu leh an pa thah ding asi lo, an nu leh an pa sual ruangah an fa tla khawm thah na ding asi lo. Mi amah sual ruangah amah cho thah ding asi,” ti mi hâwi hen.

⁷Amaziah nih Chitê Vakuam ah Edom kawrsen tla sâng râ a thah na, Selah khuapi a lâk le, a min ah Joktheel a sak, chu min chu tutiang a put.

⁸Churawhchun Amaziah nih Israel lalchem Jehoash sinah tuk ding a zuam mi thu simh ding hen mi a fial.

⁹Sikhawmsele lalchem Jehoash nih hi hâwi hen a leh: “Veikhat chu bualingnei nih Lebanon tlâng tlûnah sidar thing sinah thu a thanh: ‘Na fanu kha ka fapa nupi rangah hawng ka pêk, a ti. ‘Ram sa a hawng le, bua chu a lamh dip.

¹⁰Tuah Amaziah, Edom mi tla na neh ruangah na zûm asi. Na min thangnâk ruangah a lâwm le, in ah um ziar. Zeirangah nang leh na minung tla râwknâk ding salam hen nawknâk na tuah awt!” a ti.

¹¹Sikhawmsele, Amaziah nih a ngâi duh lo le, churuangah lalchem Jehoash chu Juda ram Beth Semes ah mah mi tla hen va do ding hen an kal rawh.

¹²Amaziah kawrsen tla chu neh hen an um le, a kawrsen tla zawng khawm in leiah an tek hep.

¹³Jehoash nih Amaziah chu a tleih le, Jerusalem ah a thaktir masa na le, khuapi kulh chu Efraim kawtkâ thawk hen a kî mi kawtkâ tiang dâwng zanih ding dêng lât hen a râwk.

¹⁴A tawng kho ri ngûn leh tangka tla a lâk le, Biakin mi thilthuam leh lal in ah mi khawm Samari leiah a put hep na. Thutiamnâk neitu tla khawm a put na.

¹⁵Jehoash nih thil zeizawng a ti mi leh Amaziah hen anna donâk ah a râlṭhat zia thu tla chu Israel lal tla thâwngthâng rînnâk bu ah rîn asi.

¹⁶Jehoash chu a thi le, Samari lal thlân ah an vûi le, a fapa Jeroboam panihnâk chu a ruangrûl ah a lal.

¹⁷Israel lalchem Jehoash thih nûnah Juda lalchem Amaziah chu kum leinga a dam rih.

¹⁸Amaziah thilti zawzawng chu Juda lal tla thâwngthâng rînnâk bu ah rîn asi.

¹⁹Jerusalem ah Amaziah thah ding hen phiarnâk a um le, churuangah Lakis khuapi ah a tek; sikhawmsele, a mêlma tla nih an ṭhâwl le, an thah.

²⁰A ruak chu rang tlûnah chuanh hen Jerusalem khua ah an kîrpi le, David khuapi mi lal thlân ah an vûi rawh.

²¹Juda mi tla nih a fapa Uziah kum leiruk mi chu lal si ding hen lallukhuh an khuh.

²²Uziah nih a pa thih nûnah a neh nawlh le, Elath chu a dirh nawlh.

²³Juda lalchem Joash fapa Amaziah lâirêl kum leinga nâkah Jehoash fapa Jeroboam chu Israel lal a hawng si le, Samari ah kum sâwmli leh kum khat lâi a rêl.

²⁴LALPA lakah thilsual ti hen a lânah Israel tla sualnâk titirtu amah thlâktu Nebat fapa lalchem Jeroboam umdân sual a châwng.

²⁵Israel tla nih anna ting mi ram zawzawng marlei kângah Hamat Liamnâk thawk hen simlei kângah Tipi Thi tiang a lâk hep. Chu chu LALPA Israel Pathian, Gath Hepher khua mi Amitai fapa, a to-aw khuavâng Jona mang hen thu a tiamh mi chu asi.

²⁶LALPA nih Israel fa tla thil tuar ṭihnungkâi tak chu a muh le, pakhat khawm anmah ṭangpitu ding hen an um lo.

²⁷Sikhawmsele, LALPA nih Israel tla chu vei dep hen tlâu pawt ding chu a siang na lo le, churuangah Jeroboam panihnâk mang hen ruang a suah na.

²⁸Jeroboam panihnâk nih thil a ti mi zawzawng leh ralṭha tak hen tuknâk lakah Damaska leh Hamat, Israel ram a tawng nawlh mi tla chu Israel tla thâwngthâng rînnâk bu ah rîn asi.

²⁹Jeroboam chu a thi le, lal thlân lakah an vûi le, a fapa Zekariah ruangrûl ah a lal.