Read Bawm Chin 2 Lal 15 Bible Online

2 Lal 15 - Bawm Chin bible

2 Lal 15

¹Israel lalchem Jeroboam panihnâk lâirêlnâk kum kul leh kum sarihnâk ah Juda lalchem Amaziah fapa Uziah a hawng a lal le,

²amah chu kum leiruk mi asi le, Jerusalem ah kum sâwmnga leh kum nih lâi a rêl. A nu chu Jekoliah, Jerusalem ah mi asi.

³A pa hâwi hen LALPA lawmhkâng hen a um.

⁴Sikhawmsele, lunglotu tla milem sawnhnâk chu a veih lo le, mi nih bâwlnâk leh rimthâw an ap kumza.

⁵LALPA nih Uziah chu phâr a veitir le, a thih tiang hen a dam kho lo. Amah lâwng hen in pakhat ah a um, a rian khawm a ṭuan kho lo; chu kar chun a fapa Jotham nih lâi a rêl.

⁶Uziah thilti zawzawng chu Juda lal tla thâwngthâng rînnâk bu ah rîn asi.

⁷Uziah chu a thi le, David khuapi ah mi lal thlân ah an vûi le, amah ruangrûl ah a fapa Jotham a lal.

⁸Juda lalchem Uziah nih lâi a rêl kum sâwmthum leh kum riatnâk ah Jeroboam panihnâk fapa Zekariah chu Israel lal a hawng si le, Samari ah thla ruk lâi a rêl.

⁹A thlâktu tla hâwi hen LALPA lakah thilsual a ti. Israel tla sualtirtu, Nebat fapa lalchem Jeroboam umdân sual a châwng.

¹⁰Jabes fapa Salum nih lalchem Zekariah chu a phiar le, Ibleam ah a thah; amah ruangrûl ah a lal.

¹¹Zekariah thilti zawzawng chu Israel lal tla thâwngthâng rînnâk bu ah rîn asi.

¹²LALPA nih lalchem Jehu sinah a sim mi kha a hawng tlung taktê asi: “Na thlâk tla chu san li tiang Israel lal ah an um lai,” a ti mi chu.

¹³Juda Lalchem Uziah lâirêl kum sâwmthum leh kum kuanâk ah Jabes fapa Salum chu Israel lal a hawng si le, Samari ah thla khat lâi a rêl.

¹⁴Gadi fapa Menahem chu Tirzah thawk hen Samari ah a kal le, Salum rangah a thah le, a ruangrûl ah a lal.

¹⁵Salum nih thil a ti mi dang tla leh mi a phiarnâk tla chu Israel lal tla thâwngthâng rînnâk bu ah rîn asi.

¹⁶Menahem chu Tirzah khua thawk hen Tapuah khua leh a sungah um mi tla leh a kiangkam ah mi ram tla chu a sinah anna pêk duhlo ruangah a veih dep na. Nunau an râi mi paw tla khawm a khei hep na.

¹⁷Juda lalchem Uziah lâlrêlnâk kum sâwmthum leh kum kuanâk ah Gadi fapa Menahem chu Israel lalchem a hawng si le, Samari ah kum râ lâi a rêl.

¹⁸Nebat fapa lalchem Jeroboam zia châwng hen LALPA lakah thilsual a ti le, a thih tiang hen Israel mi tla thilsual a tipi na.

¹⁹Tiglath Pileser, Asiria lal lianchem nih Israel tla a rûn le, Menahem nih ram lakah thuneihnâk fâk dauh nei kho ding hen Tiglath Pileser ṭangpinâk duh ruangah tangkasa kilogramme sîng thum leh sâng li a pêk.

²⁰Chubang tangka tla chu Menahem nih Israel lakah minei tla lakah sâwmnga vima, zângran hen a khawlh na mi asi. Churawhchun Tiglath Pileser chu a ram leiah a tlung rawh.

²¹Menahem thilti zawzawng tla chu Israel lal tla thâwngthâng rînnâk bu ah rîn asi.

²²A thi le an vûi, a fapa Pekahiah a ruangrûl ah a lal.

²³Juda lalchem Uziah nih lâi a rêl mi kum sâwmnga nâkah, Menahem fapa Pekahiah chu Israel lal a hawng si le, Samari ah kum nih lâi a rêl.

²⁴Nebat fapa lalchem Jeroboam, Israel tla sualtirtu zia châwng hen LALPA lakah thilsual a ti.

²⁵Pekahiah kawrsen hotu Remaliah fapa Pekah nih Gilead ram ah mi minung sâwmnga anna bawp le, Pekahiah Samari ah lal in kulh sungah an thah, churawhchun amah ruangrûl ah a lal.

²⁶Pekahiah thilti zawzawng chu Israel lal tla thâwngthâng rînnâk bu ah rîn asi.

²⁷Juda lalchem Uziah nih lâi a rêl mi kum sâwmnga leh kum nihnâk ah Remaliah fapa Pekah chu Israel lal a hawng si le, Samari ah kum kul lâi a rêl.

²⁸Israel sualtirtu Nebat fapa lalchem Jeroboam umdân sual tak châwng hen LALPA lakah thilsual a ti.

²⁹Pekah lalchem asi liauah, Asiria lalchem Tiglath Pileser nih Ijon khuapi tla, Abel Beth Maakah, Janoah, Kedes, Hazor leh Gilead ram tla, Galili, Napthali ram tla a lâk le, Asiria ram leiah a mi tleih tla chu a kalpi na.

³⁰Juda lalchem Uziah fapa Jotham lâirêl kum kulnâk ah, Elab fapa Hoshea nih lalchem Pekah rangah a phiar le, a thah, a ruangrûl ah amah a lal.

³¹Pekah thilti zawzawng chu Israel lal tla thâwngthâng rînnâk bu ah rîn asi.

³²Remaliah Israel lalchem fapa Pekah lâirêl kum nihnâk ah Uziah fapa Jotham chu kum kul leh kum nga asi liauah Juda lalchem a hawng si,

³³Jerusalem ah kum leiruk lâi a rêl. A nu chu Zadok fanu Jerusa asi.

³⁴A pa Uziah hâwi hen Jotham nih LALPA duhzia thil a ti.

³⁵Sikhawmsele, lunglotu tla milem sawnhnâk mun chu a râwk lo, mi tla nih bâwlnâk leh rimthâw duah hen an ap nget rih. Biakin Marlei Kulh kawtkâ chu Jotham nih a siam mi asi.

³⁶Jotham thilti zawzawng chu Juda lal tla thâwngthâng rînnâk bu ah rîn asi.

³⁷Lalchem asi liauah LALPA nih a masachem hen Siria lal Rezin leh Israel Lalchem Pekah chu Juda tla do ding hen a fial.

³⁸Jotham chu a thi le, David khuapi mi lal thlân ah an vûi. A fapa Ahaz chu a ruangrûl ah a lal.