Read Bawm Chin 2 Lal 16 Bible Online

2 Lal 16 - Bawm Chin bible

2 Lal 16

¹Remaliah Israel lalchem fapa Pekah lâirêl kum leisarihnâk ah Juda lalchem Jotham fapa Ahaz chu kum kul asi liauah Juda lalchem a hawng si.

²Jerusalem ah kum leiruk lâi a rêl. Amah thlâktu lalchem David umdân ṭha a châwng lo, LALPA a Pathian duhlo kâng hen a um le,

³Israel lal tla zia a châwng. A fapa tiang milem sawnhnâk ding hen thil duah apnâk ah a pêk, a lânah Israel mi tla an kalnâk kipah LALPA nih a nar na mi tla ti dân fihnungkâi a châwng.

⁴Lunglotu tla ruk sawnhnâk mun tlâng tlûnah leh thing dâidul kipah bâwlnâk leh rimthâw Ahaz nih a ap hen a duah.

⁵Siria lalchem Rezin leh Pekah nih Jerusalem an do le, an hual, sikhawmsele Ahaz rangah an neh lo.

⁶(Chu liau chir chun Edom lal nih Elath khua a lâk nawlh le, amah thu tangah a siah le, chunah Juda um mi tla chu a nar hep na. Edom mi tla chu Elath ah an um nget rih.)

⁷Lalchem Ahaz nih, Asiria lal lianchem Tiglath Pileser sinah hi thu hi a chah: “Kei chu na to-aw ê-aw ngâi tak ka si, Siria lal leh Israel lal nih an hawng ka do mi hi hawng ka hum rawh,” a ti.

⁸Ahaz nih Biakin ah mi leh lal in ah mi tangka leh ngûn a lâk le, lal lianchem Tiglath Pileser sinah a kuat.

⁹Tiglath Pileser nih Ahaz ngiarnâk a sâng le, Damaska chu a kawrsen rual hen a va kal le, a do rawh, a lâk le, lal Rezin chu a thah le, a minung tla chu a tleih na le, Kir khua leiah a kalpi na.

¹⁰Lalchem Ahaz chu lal lianchem Tiglath Pileser hen a tawng ding hen Damaska leiah a va kal, chunah chun mâichâm a muh le, chu mâichâm zûn zauh ding hen thil rangtling tak hen Uriah bâwlpu sinah a pêk.

¹¹Chu hâwitê hen Uriah nih mâichâm a siam le, Ahaz a hawng tlung lânah a dih thlo.

¹²Ahaz chu Damaska thawk hen a hawng kîr rawh chun mâichâm chu dih ziar hen a hawng muh rawh.

¹³Churawhchun ran hen bâwlnâk tla, sangvut ap mi tla, uain ap mi tla a tawih le, remnâk ding hen thisen tla a tawih le, a ap.

¹⁴Dâr mâichâm LALPA sinah ap mi chu, mâichâm leh Biakin karah siah asi. Churawhchun lalchem Ahaz nih mâichâm thar chu marlei kângah a ṭhial.

¹⁵Churawhchun Uriah rangah thu a pêk le, “Hi ka mâichâm lian hi zînglei ah duahphung bâwlnâk leh zânlei ah sangvut thil ap, zapi leh lal rangah duahphung ap leh sangvut thil ap, zapi rangah uain thil ap tla apnâk ding hen mang rawh. Bâwlnâk ah mang mi ran thisen chu a tlûnah tawih.

¹⁶Dâr mâichâm lam chu ka rangah chamchawhnâk ah siah ziar,” a ti. Uriah nih lalchem sim hâwi hen a ti rawh.

¹⁷Lalchem Ahaz nih Biakin ah mang mi dâr kari tla chu a lâk le, a tlûnah mi mâihûm tla khawm a ṭhial; chawchal leinih kêng tlûnah mi dâr tibêl khawm chu a lâk le, lungphûm tlûnah a siah.

¹⁸Asiria lal lianchem lawmhtir ding hen Ahaz nih Biakin ah mi dawnh chu laltophah rangah a ṭhial le, amah lal lûtnâk chu Biakin naih khet ah a siam.

¹⁹Lalchem Ahaz thilti zawzawng chu, Juda lal tla thâwngthâng rînnâk bu ah rîn asi.

²⁰Ahaz chu a thi le, David khuapi ah mi lal thlân ah an vûi, amah ruangrûl ah a fapa Hezekiah a lal.