Read Bawm Chin 2 Lal 18 Bible Online

2 Lal 18 - Bawm Chin bible

2 Lal 18

¹Israel lalchem Elak fapa Hoshea lâirêl kum thumnâk ah, Ahaz fapa Hezekiah chu,

²kum kul leh kum nga asi liauah Juda lalchem a hawng si, Jerusalem ah kum kul leh kum kua lâi a rêl. A nu chu Zekariah fanu Abijah asi.

³Amah thlâktu lalchem David hâwi hen Pathian lawmhkâng hen thil a ti.

⁴Lunglotu tla milem sawnhnâk tla a râwk, lung intungpi khawm a khiak piak na, pathiannu Aserah lem khawm a hâu piak na. Mosi nih a siam mi dâr rûl lem Nehustan an ti mi khawm a mân dip. Chu ni tiang hen rûl ruk chu Israel tla nih zahnâk ah rimthâw an duah.

⁵Hezekiah nih Israel Pathian chu a zumh le; Juda nih chu hâwi lal chu alân khawmah a nehnûn khawm a nei lo rawh.

⁶LALPA lakah zumhkâi tak hen a um le, a thu a ngâi kumza, LALPA nih Mosi mang hen a sinah thu a pêk mi zawng khawm a zûl.

⁷LALPA chu a sinah a um le, a thilti zawzawng dingchang tak hen a um. Asiria lal lianchem tlûnah a hel le, a sinah siah a pêk duh loh.

⁸Philistia mi tla chu a neh na le, an ram tla a rûn le, khuatê thawk hen a lian chem, Gaza leh a kiangkam mi ram zawzawng a rûn hep.

⁹Lalchem Hezekiah nih lâi a rêl mi a kum linâk chu chu lalchem Hoshea nih Israel lakah a lâirêl kum sarihnâk asi-Asiria lal lianchem Salmaneser nih Samari khua a hual.

¹⁰A hualnâk thawk hen a kum thumnâk ah Samari khua chu a lâk rawh. Chu chu Hezekiah lâirêl kum ruknâk leh Israel lalchem Hoshea lâirêl kum kuanâk asi.

¹¹Asiria lal lianchem nih Israel tla chu Asiria leiah sal ah a put na le, a zeimaw mi chu Halah khuapi ah an um, a zeimaw mi chu Gozan ram ah Habor Tiva kiangah an um, a zeimaw mi chu Media khuapi tla ah an um.

¹²Israel tla nih LALPA, Pathian thu an ngâi lo ruangah Samari khua chu a tlû rawh. LALPA to-aw Mosi nih dân a pêk mi chu zûl lo hen an râwk. A ngâi khawm an ngâi lo, zûl khawm an zûl lo.

¹³Lalchem Hezekiah lâirêl kum leilinâk ah Asiria lal lianchem Senakerib nih Juda khuapi kulhnei tla a do na le, a neh na.

¹⁴Hezekiah nih Lakis ah a um mi Senakerib sinah thu a chah: “Ka tisual asi, zângfahtê hen na ka do mi kha bâng le, na sim mi zawng ka nan pêk lai,” a ti. Lal lianchem nih Hezekiah rangah a sângnâk chu tangka kilogramme sîngkhat leh ngûn kilogramme sângkhat kuat ding hen a râp.

¹⁵Hezekiah nih Biakin ah mi leh lal in ah mi tangka tla chu a kuat;

¹⁶Biakin khâr lakah mi amah nih Biakin khâr tung a tuam mi lakah mi ngûn a lâk le, Senakerib rangah a kuat.

¹⁷Asiria lal lianchem nih kawrsen tamtak Lakis thawk hen Jerusalem ah mi Hezekiah do ding hen a fial na le, hotu ah a siam na mi minung pathum a hotir na. Jerusalem an va tlung rawh chun lampi ah mi puan tahnâk mun an va luah, chu chu tlûnlei thawk hen an chawh mi tinungva kiang asi.

¹⁸Hezekiah rangah kawhtu an fial le, a rianṭuantu pathum anmah va tawng ding hen an va kal. Hilkiah fapa Eliakim chu lal in hotu asi, Sebna chu lâirêlnâk lasuirîntu asi; Asap fapa Joah chu singsiahnâk bu lakah thuneitu asi.

¹⁹Asiria lakah hotu pakhat nih lal lianchem nih lalchem Hezekiah hi âu me a zumh theih a duh ti hen a simh na.

²⁰Lal lianchem nih, “Kawrsen chaknâk leh thiltikhonâk hi thusim ko hen lâk kho ding hen na ruat ma? Asiria tlûnah na hel mi lakah hin an ṭangpi ding hen âu me na lungum?

²¹Aigupta khawm nangmah ṭangpitu dingah na ruat khawm asi kho, sikhawmsele lâiluang kûng ṭhianṭhunh ah mang hen a kiak le, kut a sunh mi hâwi cho asi lai, Aigupta lalchem tlûnah ngauhtu vial chu, chu hâwi chu an si,” ti hen a simh.

²²Asiria hotu nih, “Asi lo leh LALPA, na Pathian lakah dahmawh na ngauh ah? Hezekiah nih a râwk mi mâichâm Jerusalem ah mi lak cho ah Pathian sawnh ding hen Juda mi tla a simh na mi kha dahmawh?

²³Lal lianchem min hen na sinah thutiamnâk ka siam lai. A tlûnah a chuantu ding minung na tawng kho ding chun rang sângnih ka nan pêk lai!

²⁴Asiria mi lakah a niam chem mi khawm nang zuam kho mi asi lo, chu hâwi khawmah Aigupta lalchem nih rang leh kari tla a nan kuat ding na ruat nget rih!

²⁵LALPA ṭangpinâk lo hen na ram hi kulh hen râwk ding hen ma na ka ruat? LALPA ngelchel nih do ding leh veih ding hen hawng ka simh,” a ti.

²⁶Churawhchun, Eliakim, Sebna leh Joah nih Asiria mi lal lianchem rianṭuantupa sinah, “Pu, Aramaic hawlh hen kan sinah thusim le, kan theih lai, Hebrai hawlh hen sim lah, mi zawzawng nih vâm lakah hawng kan ngâi ko,” an ti.

²⁷Anih nih a leh na le, “Nanmah leh lal sin cho ah thusim ding hen lal lianchem nih hawng ka fial ding hen ma nan ruat? Silo, kulh tlûnah totu zawzawng anmah êk leh zun ei leh dintu ding mi tla sinah khawm sim ding hen ka hawng mi asi,” a ti.

²⁸Chu lal lianchem rianṭuantupa chu a dîr le, Hebrai hawlh hen a âu rawh, “Asiria lal lianchem nih thu a nan simh na mi ngâi u!

²⁹Hezekiah nih a nan perpet na lo ding hen a nan simhkan na asi. Hezekiah nih an hum kho na ding asi lo.

³⁰LALPA lakah ngauh ding hen khawm a perpettir lah u. Asiria kawrsen nih nan khuapi a lâk ding mi lakah hin LALPA nih an hum hen an vêng kho na ding hen ruat lah u.

³¹Hezekiah thu chu ngâi rîlmâl lah u, Asiria lal lianchem nih khuapi mi kha suak hen a sinah a pêk ding hen thu an pêk na. Nan grep tla, nan theipi tla ei ding hen nan tikhurchawh lakah mi tî din ding tla,

³²hinah nanmah ram ah mi hâwitê hen hi ram an luahtir na ding mi lakah grep tla, sang rang ding mi fâng tla, ram lakah oliv sariak, khuaitizû tla umnâk ah an umtir na lai. Thu an pêk na mi zia nan ti chun nan thi lai lo le, nan nung lai. Hezekiah nih LALPA an hum natu dingah ruat ding hen an âttir lah na seh.

³³Zei phun pathian khawm nih Asiria lal lianchem lakah mi an ram a hum dah loh.

³⁴Arpad leh Hamat pathian tla tuah zeiah an um? Sepharvaim, Hena leh Ivah pathian tla zeiah? Pakhat tal nih Samaria a hum kho ma?

³⁵Zei liauah me hi bang pathian tla nih kan lal lianchem thawk hen an ram hum khotu an um? Pathian nih Jerusalem hum kho ding hen zei nih an ruattir na?” a ti.

³⁶Zapi tla chu an dâisip, lalchem Hezekiah nih a simh na mi hâwi hen kâ khat khawm an sâng lo.

³⁷Churawhchun Eliakim, Sebna leh Joah nih an ngaihsia tukah an puan an thlêk le, chu Asiria mi thusim chu va simh ding hen lal sinah an kal rawh.