Read Bawm Chin 2 Lal 19 Bible Online

2 Lal 19 - Bawm Chin bible

2 Lal 19

¹Lalchem Hezekiah nih chu thu chu a theih kâ hen a puan a thlêk, salâpuan â aih le, LALPA Biakin ah a kal.

²Lal in hotu Eliakim, Sebna lâirêlnâk mun ah lasuirîntu leh bâwlpu lun tla chu Amoz fapa khuavâng Isai sinah a fial na. Annih khawm salâpuan anna aih bâk.

³Hi hi Isai sinah sim ding mi thuchah chu asi: “Tusûn ni hi tuar ni asi, rêp leh ningzak saih hen kan um. Nunau faring awt liauah a nganfâk le, sikhawmsele ring ding hen a chelh lo thlo mi hâwi kan si.

⁴Asiria lal lianchem nih “Pathian nung siarlo hen a rianṭuantu lakah mi hotu chem a hawng fial. LALPA na Pathian nih hi bang zauhnawmhtu chu theih sele, chubang hâwi thusim tla chu theih sele rêp na seh. Churuangah kan minung a thibang tla rangah thlacham rawh,” a ti.

⁵Isai nih lalchem Hezekiah thuchah a theih rawh chun,

⁶hi sângnâk thu hi a simh nawlh: “LALPA nih a nan hum kho na lai loh ti hen Asiria tla nih an ṭhih na mi chu, LALPA nih ṭih lah u a nan ti na asi.

⁷LALPA nih Asiria lal lianchem chu thu thang a theihtir lai, a kîr lai le, chunah chun LALPA nih a thah lai a ti,” ti hen.

⁸Asiria mi rianṭuantu pakhat nih lal lianchem nih Lakis chu a suaktâk le; Libna khua kiangkam mi an do mi a theih le, churawhchun lal sinah thu deih ding hen a kal.

⁹Asiria tla nih, Sudan ah mi lal Tirhakah nih Aigupta kawrsen tla anmah do ding hen a hawngpi na mi thu an theih. Asiria lal lianchem nih chu thu chu a theih rawh chun, Juda lalchem Hezekiah sinah lasuikuat hen hi thu hi a simh:

¹⁰“Na lung mi Pathian nih ka kut lakah na tlû lai loh ti hen an simh mi thu nih a nan perpet lah seh.

¹¹Asiria lal lianchem nih a tum rawh mi chu zei ram zawng a râwk ti na theih ko khateh. Suak kho ding hen na ruat rerêng ma?

¹²Hawng ka thlâktu tla nih, Gozan, Haran leh Rezeph khuapi tla an râwk le, Betheden leh Telasar ah um mi tla an thah na le, an pathian tla nih âukhawm a hum kho na lo.

¹³Hamar, Arpad, Sepharvaim, Hena, Ivah lal tla kha zei ram ah an um?” a ti.

¹⁴Lalchem Hezekiah nih mifial nih a hawng put mi lasui chu a lâk le a rêl, LALPA mâika ah lasuikuat chu a siah le, thla a cham:

¹⁵“LALPA, Israel Pathian; thilnung thla tlûn leiah na laltophah ah to mi, nangmah cho Pathian na si, laikulh ram zawzawng ah lâi na rêl, nangnih tual leh vân na siam.

¹⁶Tuah, LALPA, kan lakah thil a hawng tlung mi hi zauhnik. Senakerib nih nangmah Pathian nung zauhnawmh hen thu a sim mi hi ngâinik,

¹⁷LALPA, Asiria lal lianchem nih phun tamtak a veih na, an ram chu lâwng keng hen a siam,

¹⁸an pathian tla pathian silo mi, thing milem leh lung minung kut hen siam mi cho tla chu a duah piak na ti hen kan theih.

¹⁹LALPA, kan Pathian, tuah Asiria tla lakah mi chu hawng kan hum rawh, laikulh phun zawzawng nih nangmah cho LALPA Pathian na si ti an theih khonâk ding hen,” a ti.

²⁰Churawhchun Isai nih lal thlachamnâk sângnâk thu chu simh ding hen thu a thanh.

²¹LALPA nih, “Senakerib, Jerusalem khuapi nih a nan nihsanh le, a nan siarlo rawh asi.

²²Na zauhnawmh hen na simsâwi mi chu âu me si? Kei Israel Pathian thenhlimh rangah na zah lo.

²³Lebanon tlâng sâng chem tla chu na kari zawzawng hen na neh na ti khâwngnâk thusim ding hen mi na fial. Sidar thing sâng chem tla leh far thing ṭha chem tla ka hâu le, thing mun sung tla ka tleng ver ti hen na khâwng.

²⁴Ramdang ah tikhur tla ka chawh le, ka kawrsen tla nih Nile Tiva kang dep hen an lamh ti hen na khâwng.

²⁵“Alân thawk hen ka thiltum zawzawng tla hi na theih dah tâwn ma? Tu chun ka hawng langh rawh. Tu chun kulhnei khua tla chu nâwmpawng ah siam kho ding hen thiltikhonâk ka nan pêk.

²⁶Chunah um mi tla chu thiltikhonâk neilo hen an um, an lâu le an mawlh thlo. Phâisen ah mi belh hâwi mawh in tlûnah belh a chawrh mi saklei thlilûm nih uai tep hen a sêm na mi hâwi an si.

²⁷“Sikhawmsele, nang chu ka nan theihfiang asi, na thilti leh na umnâk zawng khawm. Ka lakah na thinrunnâk khawm ka theih.

²⁸Na thinthawknâk leh na khâwngnâk khawm ka theih, tuah na nâr ah siau hen ka nan banh lai le, thirbanh chu na kâ ah kan banh lai le, na hawngnâk lampitê ah ka nan kîrpi awt,” a ti.

²⁹Churawhchun Isai nih Lalchem Hezekiah sinah, “Hi hi thil hawng tlung ding mi singsiahnâk chu asi: Tukum leh kum vei ah mâng buh cho nan ei lai, chu zulh a kum nawlh ah chun fâng nan tuh lai le, a rah tla nan ei lai rawh.

³⁰Juda thibang tla chu thlâi keuh tual ah ram thûk tak nei hen rah an suah mi hâwi an si lai.

³¹LALPA nih hi thil hawng um ding mi a tum mi asi ruangah, a thibang tla chu Jerusalem leh Zion tlâng ah an um lai.

³²“Hi hi LALPA nih Asiria lal lianchem thu a sim mi chu asi: Hi khuapi sungah a lût hen chanhtiang thalzum pakhattê khawm a kah lai loh. Zei kawrsen khawm phaw hen hi khuapi ah an hawng kal lai lo le, hualnâk ding hen lungpawng an siam lai loh.

³³Hi khuapi sungah lût lo hen a hawngnâk lampitê hen a kîr nawlh lai. Kei, LALPA nih ka sim rawh hi.

³⁴Ka to-aw David sinah ka tiamh mi ruangah leh keimah min zahkâinâk ding hen hi khua hi ka vêng hen ka hum awt,” a ti.

³⁵Chu zân chun LALPA vânmifial chu Asiria tla riaknâk mun ah a kal le, kawrsen nuaikhat leh sîngriat leh sângnga a thah na. A thaituan khua a dei rawh chun a thi chia hen an rîl phut!

³⁶Churawhchun Asiria lal lianchem Senakerib chu â lêt le, Ninevi leiah a kîr rawh.

³⁷Nikhat chu a pathian Nisrok biakin ah a sawnh liauah, a fapa panih Adramelek leh Sarezer nih nâmsâu hen an thah le, Ararat ram ah an tek ving. A fapa dang Esarhadon chu a ruangrûl ah a lal.