Read Bawm Chin 2 Lal 20 Bible Online

2 Lal 20 - Bawm Chin bible

2 Lal 20

¹Chuliau chun Lalchem Hezekiah chu thi viviar hen, a zâw le, Amoz fapa khuavâng Isai nih a veh le, a sinah, “LALPA nih na umdân ding chu ka ruat ver rawh a nan ti, dam ding na si lo ruangah thi ding hen a râlring ko,” a ti.

²Hezekiah chu a mêl vâm lei â hawi le, thla a cham.

³“LALPA, zumhkâi tak hen leh ṭih tak hen na rian ka ṭuan le, ti ding hen na ka duh mi lakah chun ti ngelchel ding hen ka tum kumza mi kha theihkumza rawh,” a ti. Chun ngaihsia tak hen a ṭap rawh.

⁴Isai nih lal chu a kaltâk le, lal in kulh sung a lanh lântê ah,

⁵LALPA mipi tla lâirêltu Hezekiah sinah thu sim nawlh ding hen a kîr le, a sinah, “Kei, LALPA, na thlâktu David Pathian nih na thlachamnâk khawm ka theih, na mitthli tlâk khawm ka muh, ka nan damh nawlh lai le, ni thumnâk ah Biakin ah na kal lai. Kum leinga hen na san ka sâutir nawlh lai.

⁶Nang leh hi Jerusalem khuapi hi Asiria lal lianchem lakah mi ka nan hum lai. Keimah min zahkâinâk ding hen hi khuapi hi ka hum awt, David sinah thu ka tiamh mi hâwi hen,” a ti.

⁷Churawhchun Isai nih lal bulsântu tla sinah, “Theipi rah nêng a khuailumâ lakah buaih piak ule, churawhchun a dam ko lai,” ti hen a simh na.

⁸Lalchem Hezekiah nih, “LALPA nih hawng ka damh hen ni thum ni ah Biakin ah ka kal kho awt ti singsiahnâk zei asi lai?” ti hen a deih.

⁹Isai nih a sâng le, “LALPA nih a thu a dik ti theihnâk singsiahnâk a nan pêk lai. Tuah leilâk dâidul tlûnlei kângah bak râ tiang thâwn ma na duh tanglei bak râ tiang thâwn?” a ti.

¹⁰Hezekiah nih, “Leilâk bak lakah tlunlei kângah dâidul bak râ tiang thâwn chu a awl awt thlo! A tanglei ah bak râ thâwn hen um seh,” ti hen a sâng.

¹¹Isai nih LALPA sinah thla a cham le, dâidul chu lalchem Ahaz nih a siam mi tanglei kâng leilâk bak râ tiang LALPA nih a thâwn.

¹²Chu liau chun Babulon lalchem Baladan fapa Merodak Baladan nih Hezekiah a dam lo ti a theih le, lasui leh lâwmman a kuat.

¹³Hezekiah nih mifial tla chu a lawmh na le, a thil neih: tangka, ngûn, an rim thâwttirnâk leh sariak rimthâw leh a kawrsen râlthuam tla a zauhtir na. A ram sungah zei ram khawm a thil siahnâk a zauhtir lo mi a um lo.

¹⁴Churawhchun khuavâng Isai chu lalchem Hezekiah sinah a kal le, “Hi bang minung tla hi zei thawk hen an hawng, zei thu me an sim,” ti hen a deih. Hezekiah nih a sâng le, “Babulon ram lât tak thawk hen hawng mi an si,” a ti.

¹⁵Isai nih, “lal in ah zei zei an muh?” ti hen a deih. Hezekiah nih “Zeizawng an muh ver, ka muhtir na lo mi zeikhawm a um lo,” a ti.

¹⁶Churawhchun Isai nih lalchem sinah, “LALPA, zeizawng tikho nih lal in ah mi thil zeizawng,

¹⁷an thlâktu tla thil tusûn tiang hen um mi tla chu Babulon leiah an put hep ding mi ni a hawng tlung awt, zeikhawm an mâk lai loh.

¹⁸Nangmah thlâk tak tla khawm Babulon ah an kalpi na lai le, an tilkhei hen rian ṭuan hen an um lai,” a ti.

¹⁹Hezekiah nih chu chu a ti mi umzia chu a dam sung zawzawng thlangam hen a um awt tinâk asi ti a theih le, churuangah chun, “LALPA thawk hen thuchah na ka simh mi chu a ṭha asi,” ti hen a sang.

²⁰Lalchem Hezekiah thilti dang zawzawng râlṭha tak hen a ti mi leh tî khawngnâk in a siam le, khuapi ah luang ding hen tî lampi a chawh mi tla chu Juda lal tla thâwngthâng bu rînnâk ah rîn asi.

²¹Hezekiah chu a thi le, a fapa Manaseh chu a ruangrûl ah a lal.