Read Bawm Chin 2 Lal 21 Bible Online

2 Lal 21 - Bawm Chin bible

2 Lal 21

¹Manaseh chu kum leinih mi asi liauah Juda lalchem a hawng si, Jerusalem ah kum sâwmnga leh kum nga lâi a rêl. A nu chu Hepzibah asi.

²Manaseh nih LALPA mi tla kalnâk zawngah a nar piak na mi phun ti dân fihnungkâi chu zûl hen LALPA lakah thilsual a ti.

³A pa Hezekiah nih a râwk mi lunglotu pathian sawnhnâk mun tla a siam nawlh le; Israel lalchem Ahab nih a ti mi hâwi hen Baal leh pathiannu Aserah lem a siam mi sawnhnâk dingah mâichâm tla a siam. Manaseh nih ârfi tla khawm a sawnh.

⁴LALPA nih amah sawnhnâk mun rang dingah a ruat mi mun Biakin sungah lunglotu tla mâichâm a siam.

⁵Biakin sung mun nih lakah ârfi sawnhnâk mâichâm a siam.

⁶Bâwlnâk duahphung lakah a fapa a mang. Chamchawh thiam leh kutzalam zauh a châwng, vânsia vânṭhat siamtu leh tin-tlah-ninh thiam tla thu a deih na. LALPA tlûnah thilsual ti hen a thin a runhtir.

⁷Biakin ah chun Aserah pathiannu lem a siah, LALPA nih David leh a fapa Solomon sinah, “Israel phun leinih ram zawzawng lakah hi Jerusalem, hi Biakin hi, keimah sawnhnâk ding mun ah ka thîm mi asi.

⁸Israel tla nih ka thupêk zawzawng an zûl hen ka to-aw Mosi sinah dân zawzawng ka pêk mi an zûl chun, an thlâktu tla rangah ka pêk na mi ram lakah mi hi nar ding hen kan siang na awt lo,” a ti.

⁹Sikhawmsele Juda tla nih LALPA thu chu an ngâi lo le, LALPA nih a mi le kalnâk ah a nar piak na mi phun nih sualnâk an ti mi tla ngâk fâk dauh hen Manaseh nih a tipi na.

¹⁰Khuavâng a to-aw tla mang hen LALPA nih,

¹¹“Lalchem Manaseh nih thil diklo tla a ti, Kanaan mi tla nih an ti mi ngâk a ṭha lo dauh hen a ti; a ruklem tla hen Juda tla chu a sualtir na.

¹²Churuangah, Kei, LALPA Israel Pathian nih Jerusalem leh Juda tlûnah vânduainâk chu hâwi ka tlungtir lai le, âuzawng a theihtu chu a maw lai.

¹³Samari ka rêp hâwi hen Jerusalem ka rêp lai, Israel lalchem Ahab leh a thlâk tla ka rêp hâwi hen Jerusalem chu a mi tla ka nâwt thiang lai, khêng chu nâwt leh khuh tlek hâwi hen.

¹⁴Mihel tla chu ka nawng lai le, anmah nehtu leh an ram râwktu an mêlma sinah ka ap na lai.

¹⁵Ka lakah an sual ruangah leh an thlâktu tla Aigupta an suaknâk thawk hen tusûn ni tiang ka thin an thawktir ruangah hi thil hi ka mi tla sinah ka ti awt,” a ti.

¹⁶Manaseh nih sual neilo tamtak a thah na le, Jerusalem lampi tla chu thisen hen a luang; hi hi lâwng silo hen, Juda tla chu ruk a sawnhtir na le, LALPA lakah a sualtir na.

¹⁷Manaseh nih a ti mi zawzawng chu, thilsual a ti mi hen, Juda lal tla thâwngthâng rînnâk bu ah rîn asi.

¹⁸Manaseh chu a thi le, lal in dûm Uza dûm ah an vûi. A fapa Amon chu a ruangrûl ah a lal.

¹⁹Amon chu kum kul leh kum nih asi liauah Juda lal asi, chun Jerusalem ah kum nih lâi a rêl. A nu chu Meshullemeth, Haruz fanu Jotbah khua mi asi.

²⁰A pa Manaseh hâwi hen LALPA lakah thilsual a ti.

²¹A pa thilti châwng hen, a pa nih milem a sawnh mi a sawnh bâk.

²²LALPA, a thlâktu Pathian chu a duh lo le, LALPA thupêk tla khawm a zûl lo.

²³Amon chu a rianṭuantu tla nih an phiar le, lal in ah an thah.

²⁴Juda tla nih Amon thahtu tla chu an thah le, a fapa Josiah chu lal ah an siam.

²⁵Amon thilti zawzawng tla chu Juda lal tla thâwngthâng rînnâk bu ah rîn asi.

²⁶Amon chu Uza dûm sungah mi thlân ah an vûi le, a fapa Josiah a ruangrûl ah a lal.