Read Bawm Chin 2 Lal 22 Bible Online

2 Lal 22 - Bawm Chin bible

2 Lal 22

¹Josiah chu Juda lalchem asi liauah kum riat mi asi. Jerusalem ah kum sâwmthum leh kumkhat lâi a rêl. A nu chu Jedidah, Bozkath khua mi Adaiah fanu asi.

²Josiah nih LALPA lawmhkâng hen thil a ti le, amah thlâktu David zia châwng hen fek tak hen Pathian dân a zûl.

³Josiah nih a lâirêl kum leiriatnâk ah, lâirêlnâk ah lasuirîntu Saphan, Meshullam tupa, Azaliah fapa chu Biakin ah kal ding hen thu a pêk:

⁴“Bâwlpu lalchem Hilkiah sinah va kal le, zatlâng thawk hen khawlh mi tangka Biakin tualmâi ah bâwlpu tla nih zei vial an tawng rawh, tangka um zat va theih.

⁵Biakin remhtu tla sinah tangka chu pêk na ding hen va simh.

⁶Thing hen thilsiamtu tla, in saktu tla, lung in saktu tla nih thing leh lung châwknâk ah mang ding hen pêk na seh.

⁷Chu lakah rianṭuan hotu tla chu thungâi zumh an kâi le, chu thawhlâwm tla chu rêl khawm a herh lo,” a ti.

⁸Lalchem thupêk chu Saphan nih Hilkiah rangah a simh le, Hilkiah nih Biakin ah hi Dân bu hi ka tawng mi asi ti hen a simh. Hilkiah nih Saphan sinah lasuibu a pêk le, Saphan nih a rêl rawh.

⁹Churawhchun lal sinah a kîr nawlh le, lal a va simh: “Na to-aw tla nih Biakin ah mi tangka chu an lâk le, Biakin remhtu tla sinah an pêk na.’’

¹⁰“Chun, Hilkiah nih a hawng ka pêk mi lasuibu hi,” a ti le, hâu fâk tak hen lal sinah a rêl.

¹¹Lalchem nih lasuibu rêl mi a theih rawh chun, lung fâk tak hen a puan a thlêk le,

¹²Bâwlpu Hilkiah, Saphan fapa Ahikam, Mikaiah fapa Akhor, Saphan lâirêlnâk ah lasuirîntu leh lal zûltu Asaiah le tla sinah, hi thupêk tla hi a pêk:

¹³“Kal ule, kei leh Juda mi tla rangah hi lasuibu ah sîntirnâk tla hi LALPA deih u. Hawng kan thlâktu tla nih hi lasuibu nih a sim hâwi hen thil an tilo ruangah LALPA chu kan lakah a thinrun rawh asi,” a ti.

¹⁴Hilkiah, Ahikam, Akbor, Saphan leh Asaiah tla chu khuavâng nunau Huldah, Jerusalem khua sak thar leikângah um mi sinah thu deih ding hen an va kal rawh. (a pasal Salum, Tikvah fapa, Harhas tupa chu Biakin puan leikângah hotu asi.)

¹⁵Thil a hawng um mi tla chu a simhfiang le, khuavâng nunau nih chun, “Lal sinah kîr nawlh ule,

¹⁶hi LALPA thuchah tla chu va simh u,” a ti na, “Lalchem nih lasuibu lakah a rêl mi hâwitê hen Jerusalem leh a sungah um mi tla chu ka rêp awt.

¹⁷Kei chu an hawng ka duh lo le, pathian dang tla sinah bâwlnâk an ap, churuangah an thilti zawzawng tla nih ka thin an thawktir. Jerusalem tlûnah ka thinthawknâk chu a reh ding asi lo.

¹⁸A bîk hen, kei LALPA, Israel Pathian nih hi hi lal rangah ka simh asi: lasuibu ah rîn mi tla chu na ngâi le,

¹⁹na rim le, ka lakah nau tak hen na um le, na nipuan tla na thlêk hen na ṭap le, chu chu Jerusalem leh a minung tla ka rêp ding mi na theih ruangah asi. Zauh hen ṭihnungkâi rê ding hen ka siam lai le, a mun khawm chu mi nih siatbarh mi mun an ti lai.

²⁰Sikhawmsele, na thlacham hâu ka theih le, Jerusalem lakah rêpnâk lam chu na thih nûnah asi lai rawh. Nang lam chu thlangam tak hen kan thihtir awt,” a ti. Hi thuchah tla hen mifial tla chu lalchem Josiah sinah an kîr rawh.