Read Bawm Chin 2 Lal 24 Bible Online

2 Lal 24 - Bawm Chin bible

2 Lal 24

¹Jehoiakim a lal liauah Babulon lalchem Nebukadnezar nih Juda a rûn le, kum thum kar a sinah a pêk hen amah lâirêlnâk tangah Jehoiakim chu a umtir le, a nehnûn chun a hel rawh.

²LALPA nih a to-aw khuavâng mang hen ka ti lai ti thu a sim mi hâwi hen Jehoiakim leh Juda mi tla râwk ding hen Babulon mi tla, Siria mi tla, Moab mi tla leh Amon mi kawrsen rual tla chu a fial na.

³Hi hi LALPA thupêk

⁴Lalchem Manaseh nih thilsual tamtak a ti ruangah leh a bîk hen thilsual tilotu tla a thah na ruangah LALPA nih a ngaihdam kho lo le, Juda tla chu a mitkâ thawk hen veih dep ding hen hi hi LALPA thupêk a hawng tlung mi asi.

⁵Jehoiakim nih thil a ti mi tla chu Juda lal tla thâwngthâng rînnâk bu ah rîn asi.

⁶Jehoiakim chu a thi le, a fapa Jehoiakin a ruangrûl ah a lal.

⁷Babulon lal nih Aigupta nih â ting mi zawzawng, Eufretis Tiva thawk hen marlei Aigupta ramri tiang a thuneihnâk tangah a siah ruangah Aigupta lal leh a kawrsen tla chu râltuk ding hen an suak lo rawh.

⁸Jehoiakin chu Juda lal asi liauah kum leiriat mi asi le, Jerusalem ah thla thum lâi a rêl. A nu chu Jerusalem khua mi Elnathan fanu Nehusta asi.

⁹A pa Jehoiakim umdân a châwng le, LALPA lakah thilsual a ti.

¹⁰A lâirêl hun liauah Babulon kawrsen tla chu lalchem Nebukadnezar nih hotu a siah mi sinah thu a pêk le, Jerusalem leiah an kal le, an hual.

¹¹Chu an hual liau chir chun Nebukadnezar khawm a kal bâk le,

¹²lalchem Jehoiakin chu, a nu, a fapa tla, a milian tla, a lal in rianṭuantu tla chu Babulon mi tla sinah anna pêk rawh. Nebukadnezar a lâirêl kum riatnâkah Jehoiakin chu a tleih le, rêng a thlâk, Biakin ah mi thil leh lal in ah mi thil zawzawng hen Babulon leiah a kalpi.

¹³LALPA nih a simkan rawh hâwi hen lalchem Solomon nih Biakin ah mang mi ngûn khêng-le-bêl a siam mi zawzawng Nebukadnezar nih a râwk hep.

¹⁴Nebukadnezar nih Jerusalem ah um mi lal fa zawzawng, ruitu zawzawng sîng khat ding a put na. Rianṭuan thiam mi zawzawng leh namdêng thiam tla a put na le, a pâm chem mi tla cho Juda ram ah chun a mâk na.

¹⁵Nebukadnezar nih Jehoiakin chu a tleih le, a nupi tla, a rianṭuantu tla, Juda ruitu tla hen Babulon leiah a kalpi na.

¹⁶Nebukadnezar nih mi pawi herh vial an ektê hen sâng sarih leh rianṭuan thiam sâng khat, nâmdêng tla hen, an ektê hen kawrsen rangah tlâk ding mi tla Babulon leiah a kalpi na.

¹⁷Nebukadnezar nih Jehoiakin patê Mattaniah chu Juda lal ah a siam, a min a lêt le, Zedekiah ti hen a sak.

¹⁸Zedekiah chu Juda lal asi liauah kum kul leh kum khat mi asi, Jerusalem ah kum leikhat lâi a rêl. A nu chu Libnah khua mi Jeremia fanu Hamutal asi.

¹⁹Lalchem Jehoiakim nih a ti mi hâwi hen Zedekiah khawm nih LALPA lakah thilsual a ti.

²⁰LALPA chu Jerusalem khua leh Juda mi tla a mitmuh ah a veih dep na mi tlûnah a ro thawk.