Read Bawm Chin 2 Lal 25 Bible Online

2 Lal 25 - Bawm Chin bible

2 Lal 25

¹Zedekiah chu Babulon lalchem Nebukadnezar lakah a hel le, churuangah Zedekiah lâirêl kum kuanâk thla rânâk, a ni rânâk ah Nebukadnezar chu a kawrsen tla hen Jerusalem an do.

²Khuapi lênglei ah um mun an khuar le, a kiangkam ah kulh an siam le, Zedekiah lâirêl kum leikhat tiang an châm nawh pang.

³Chu kum thla linâk a ni kua ni ah, pâm thungâi a zual le, mi zapi tla nih zeikhawm an neilo rawh le, kulh vâm an pemh rawh.

⁴Sikhawmsele, Babulon mi tla nih khuapi chu an kulh hep le, Juda kawrsen tla chu zân ah an suak hep, lal dûm lampi lei hen vâm a tawnhnâk kawtkâ lei hen an kal le, Jordan Vakuam leiah an tek hep.

⁵Sikhawmsele Babulon kawrsen tla nih Zedekiah chu an ṭhâwl le, Jeriko phâi kiangah an tleih, a kawrsen zawzawng nih an kaltâk hep.

⁶Zedekiah chu lalchem Nebukadnezar, Riblah khuapi ah a um mi sinah an kalpi le, chunah chun a thu an rêl.

⁷Zedekiah mitmuh ah a fapa tla chu an thah na, churawhchun Nebukadnezar nih Zedekiah mit chu a chawih piak zek, rêng a khimh le, Babulon leiah a kalpi rawh.

⁸Babulon lalchem Nebukadnezar a lalnâk thawk hen kum leikuanâk, thla nganâk, a ni sarih ni ah Nebukadnezar, lal krai pêktu, kawrsen hotu lian Nebuzaradan chu Jerusalem ah a lût.

⁹Biakin, lal in, leh Jerusalem ah mi pawiherh dauh in tla a duah hep le,

¹⁰a kawrsen tla nih kulh vâm tla an râwk.

¹¹Nebukadnezar nih chun khuapi ah minung um rih mi tla, rianṭuan thiam mi tla Babulon mi tla an hawng liauah anna pêk mi tla chu Babulon leiah a kalpi hep na.

¹²Sikhawmsele, a pâm chem mi tla zeikhawm an neilo mi tla chu grep dûm leh phâisen ah rianṭuantu ding hen a mâk na.

¹³Babulon mi tla nih Biakin ah mi dâr tung leh kari tla leh dâr hûmpi tla an mân ver le, Babulon leiah an kalpi ver.

¹⁴Meiṭil rûtnâk, mâichâm mi vachâm thenhnâk, khâwnvâr mûm chehnâk, bâwlnâk thisen dawnhnâk khêng, rimthâw duahnâk khêng leh Biakin ah mang mi zawzawng dâr thuamthil tla chu an lâk hep.

¹⁵Thil zeizawng ngûn mawh tangka hen siam mi tla, khêngkûmtê, khêng ngiang nei, meiṭil putnâk tla khawm an lâk hep.

¹⁶Lalchem Solomon nih a siam mi dâr tung panih Biakin ah mi tla, kari tla, tî siahnâk hûmpi tla, a rit sim kholo rê mi.

¹⁷Tung panih â bang cho mi; feet 27 a sâng mi vevê, a lupâr dawngah dâr bo bawlawk siam mi feet 4.5 tluk sâng mi. Hêl dak hen dâr hen siam mi pomegranate hen thuamh mi tla zawng khawm an lâk hep.

¹⁸Nebuzaradan, kawrsen hotu lian nih bâwlpu lalchem Seraiah leh amah sangtu bâwlpu Zephaniah leh Biakin ah rianṭuantu mi pawiherh pathum a tleih na.

¹⁹Khuapi ah mi kawrsen hotu, lal panga krai pêktu khuapi ah um mi tla, kawrsen hotu ṭangpitu, kawrsen leikângah lasuirîntu leh mi pawiherh sâwmruk tla chu a tleih na.

²⁰Nebuzaradan nih Babulon lalchem Hamat ram ah mi Riblah khua ah um mi sinah a kalpi na.

²¹Chunah chun lal nih a vuak na le, a thah na. Juda tla chu an ram ah mi chu sal ah put hen an um rawh.

²²Babulon lalchem Nebukadnezar nih Saphan tupa Ahikam fapa Gedaliah chu Juda ram lâirêltu ah a toh le, Babulon leiah put lo mi tlûnah hotu ah a siah.

²³Juda mi lakah kawrsen hotu leh kawrsen tla, Babulon lal sinah anna pêk lo mi tla nih chu thu chu an theih le, Mizpah mi Gedaliah sinah anna fawnh. Chubang hotu tla chu Nethaniah fapa Ismael, Kareah fapa Johanan, Tanhumeth fapa Seraiah, Netophah khua mi leh Maakah khua mi Jezaniah tla an si.

²⁴Gedaliah nih an sinah, “Nannih nih Babulon hotu tla chu nan ṭih ding asi lo. Babulon lal thu thu hen hi ram ah hin um ko ule, nan rangah a ṭha lai,” a ti na.

²⁵Sikhawmsele, chu kum a thla sarihnâk ah Nethaniah fapa Ismael leh Elisamah tupa, lal dâwngsung ah mi chu minung parâ hen Mizpah ah an va kal le, Gedaliah chu an do le, an thah rawh. Israel tla leh Babulon mi a sinah um mi tla khawm a thah na.

²⁶Churawhchun Israel mi zawzawng a nei mi hen a pâm mi hen kawrsen hotu tla hen Babulon mi tla an ṭih na ruangah Aigupta leiah an kal rawh.

²⁷Babulon lal Evilmerodak a lal kum ah Juda lalchem Jehoiakin lakah a vêlneihnâk a langh hen rêngin ah mi a suah. Chu chu Jehoiakin rêngtlâknâk thawk hen kum sâwmthum leh kum sarihnâk thla leinihnâk ni kul leh ni sarih ni ah a hawng um.

²⁸Evilmerodàk nih thungâi a dâwt le, Babulon ah lal dang tla sal ah tâng mi zawzawng ngâk hen zahnâk sâng dauh a pêk.

²⁹Churuangah Jehoiakin chu rêngtlâ nipuan chu a thleng piak le, a damsung zawzawng chu lal dawhkân lakah buh a eitir.

³⁰Nisiar hen a damkar zawzawng a herh mi tingvo tling tak hen a pêk.