Read Bawm Chin 2 Lal 6 Bible Online

2 Lal 6 - Bawm Chin bible

2 Lal 6

¹Nikhat chu khuavâng murui Elisa nih a ho na mi tla chu an chipchiar le, “Kan umnâk mun a bî tuk.

²Jordan Va ah mi thing va hâu ding hen thu hawng kan pêk le, chu tikah umnâk ding mun kan khuar khonâk ding hen, hawng kan siang piak,” an ti. Elisa nih, “Ti ko u ma a,” a ti.

³Minung pakhat nih Elisa chu an sinah kal bâk ding a ngiar le; anih khawm nih rem a ti le, munkhat hen an kal rawh.

⁴Chun, Jordan Va an tleng rawh chun, rianṭuan anna dawmh rawh.

⁵An lakah mi pakhat nih thing a hâu liau chirah, veikhat ko ah a reitlung chu tî lakah a tlâ ving. Elisa sinah, “Pu, ka lâng mi reitlung tî lakah a tlâ ving!” a ti.

⁶Elisa nih, “Zei ram ah a tlâ?” ti hen a deih. Anih nih a tlâknâk mun a simh le, Elisa nih ṭhianṭhunh a tuk le, tî lakah a lawnh le, reitlung chu a hawng puantir.

⁷Elisa nih, “Sar rawh,” a ti le, chu minung chu a kûn le, a sar rawh.

⁸Siria lalchem chu Israel mi tla hen anna do. Siria lalchem nih a hotu tla rangah krai a pêk na le, a mun an thîmnâk ah riakmun an khuar.

⁹Sikhawmsele, Elisa nih Israel lalchem sinah thu a chah le, chu an riakmun ah kal lo ding hen a simh, chunah Siria tla nih an bawh na ko ruangah.

¹⁰Churawhchun, Israel Lalchem nih chunah um mi tla rangah thlingthlâk na ding hen a simh, zeimaw zâwn ah an thlingthlâk na tâwn.

¹¹Hi thu ah hin Siria lalchem chu thungâi a lawksawng le, a hotu tla a kawh na le, an sinah, “Nan lakah âu tla me Israel lalchem leiah ṭângṭawmtu chu?” ti hen a deih na.

¹²An lakah mi pakhat nih a sâng le, “Bâwipa, âukhawm an um lo, khuavâng Elisa nih na in kardang sungah thu na sim mi tla kha Israel lalchem a simh hep asi,” a ti.

¹³Lalchem nih, “Zeiah a um va hâwl u, ka tleih awt,” a ti. Chu thu a sim liauah Elisa chu Dothan ah a um.

¹⁴Siria lalchem nih rang kêng tlûn chuan mi kawrsen leh rang kari rual tamtak a fial na. Zân ah khuapi chu an va tleng le, khua chu an hual dak.

¹⁵A thâi zîngtê ah Elisa to-aw chu a thawk le, lênglei ah a suak le, Siria kawrsen tla nih rang leh rang kari tla hen khua an kulh dak mi a muh. Elisa sinah a va kal le, “Pu, kan vânduai rawh, zeitin kan ti lai rawh,” a ti.

¹⁶Elisa nih a sâng le, “Lâu lah, annih leiah ṭângṭawmtu ngâk hen kannih leikângah mi an tam dauh,” a ti.

¹⁷Churawhchun Elisa nih thla a cham le, “LALPA, a mit hawng dei tir le, muhtir rawh!” a ti. LALPA nih a thlachamnâk a sâng le, Elisa to-aw nih a vân zauh le, tlâng pangdâr chu mei rang kari khat dil hen Elisa kiangkam kulh dak hen a muh.

¹⁸Siria tla nih an hawng do na rawh chun, Elisa nih thla a cham, “LALPA, hi minung tla hi an mit hawng châwtir na!” a ti. LALPA nih a thlachamnâk a sâng le, an mit a châwtir dep na.

¹⁹Churawhchun Elisa chu an sinah a va kal le, an sinah, “Lampi diklo ah nan kal lak hiteh, hi khua chu nan hâwl mi khua asi loh, hawng ka zûl ule, nan hâwl mi minung sinah ka nan kalpi na lai,” a ti. Churawhchun Samari leiah a kalpi na rawh.

²⁰Khuapi an va lût kâ hen, Elisa nih thla a cham le, “LALPA, an mit deitir le, muhtir na rawh,” a ti. LALPA nih a thlachamnâk a sâng le; an mit a dei nawlh le, Samari khua sungah an um ving mi anna muh rawh.

²¹Israel lalchem nih Siria tla chu a muh na le, Elisa sinah, “Pu, ka thah na lai ma? Ka thah na lai ma?” a ti.

²²Elisa nih, “Thah na lah, râltuknâk ah thah ding hen kawrsen na tleih na mi lêm asi lo, din leh ei ding pêk na le, an lal sinah kîrtir nawlh na, a ti.

²³Churawhchun, Israel lalchem nih puai rokual tak a tuah piak na le, an din hen an ei thluh rawh chun, Siria lalchem sinah a tlungtir na rawh. Chu thawk hen chun Siria tla nih Israel tla do ding an bâng thlo.

²⁴Chu nûn chun, Siria lalchem Benhadad nih a kawrsen zawzawng chu Israel tla do ding hen a kalpi na le, Samari khua chu an hual dak.

²⁵Chu khua an kulh mi ruang chun buh leh an samphângnâk fâk tak a hawng um, sanatung lû pakhat man chu tangka sâwmriat asi. Vaṭhu êk kilogramme zanih lakah tangka nga hen an zuar.

²⁶Israel lalchem kulh tlûnah a zî lemang liauah nunau pakhat, “Bâwipa, hawng ka ṭangpi,” ti hen a âu.

²⁷Anih nih a sâng le, “LALPA nih a nan ṭangpi lo chun kei nih zei kan pêk kho awt? Buh leh uain rerêng ka nei mazei?

²⁸Zei me na lawksawngnâk chem?” a ti. Anih nih a sâng le, “Hi nunau nih hin nang fa kan ei lai le, thâi ah kei fa kan ei lai hawng ka ti.

²⁹Churawhchun ka fapa chu kan suang le, kan ei rawh. A thâituan ah a fapa ei bâk ding hen ka simh le, khawmsele, a thuh ving!” a ti.

³⁰Churawhchun, lalchem nih chu thu a theih rawh chun a puan a thlêk le, amah naih ah vâm kiangah um mi tla nih muh kho ding hen a nipuan tangah salâpuan â aih.

³¹Lalchem nih, “Nî tlâk lânah Elisa lû ka tan lo mi asi chun, Pathian nih hawng ka thah seh!” a ti.

³²Churawhchun Elisa tleih ding hen mi a fial rawh. Chu liau tak chun a sinah upa tâwitu tla hen a um ko. Lalchem nih mi a fial mi a tleng lântê ah, Elisa upa tla sinah, “Mi thahtu nih keimah hawng ka thah ding hen mi a hawng fial, hinah a hawng tleng tikah in khâr pang ule, luttir lah u, a dunglei ah amah lal tak khawm a hawng,” a ti.

³³Hi thu a sim thluh kâ hen, lal chu a hawng tleng le, a sinah, “Hi bang nawknâk kan lakah tlungtirtu hi LALPA asi! Amah rangah thil zeimawh ti ding hen zei chan me ka ngâk awt?” a ti.