Read Bawm Chin 2 Lal 8 Bible Online

2 Lal 8 - Bawm Chin bible

2 Lal 8

¹Elisa nih Shunem khua mi nunau, a fa a damh piak mi sinah ram lakah LALPA nih kum sarih pâm a tlungtir awt le, churuangah mun dangah kal hen a dâwngsung tla hen um ding hen a simh.

²A thusim hâwi hen Philistia ram ah a dâwngsung tla hen kum sarih an um.

³Kum sarih a dawng rawh chun Israel ram ah a kîr le, a in leh a ram tla a ting nawlh ding hen lalchem a deih.

⁴Lalchem leh Gehazi Elisa to-aw hen anna sâwn mi a muh na, lal nih chun Elisa thilchê ti tla theih ding a duh ruangah.

⁵Gehazi nih Lalchem rangah Elisa nih ngâksia a thi rawh mi a nunh mi thu a ruah liau chirah chu nunau khawm nih a thil duh a hawng deih bâk. Gehazi nih lalchem sinah, “Bâwipa, hi nunau leh a fapa mahi a, Elisa nih a nunh piak nawlh mi chu a!” a ti.

⁶Chu nunau nih lalchem thu deih chu a sâng hen Gehazi thusim chu a dik zia a birhtir. Churawhchun lalchem nih a rianṭuantu tla rang chun thil zeizawng amah tâ chu pêk nawlh hep ding leh a phâisen kum sarih karah mîm-le-fâng an tawng mi zawzawng khawm pêk hep ding hen a simh na.

⁷Elisa chu Damaska khua ah a kal liauah Siria lalchem Benhadad chu a damlo. Elisa a um ko ti hen lal chu an simh rawh chun,

⁸lal nih a rianṭuantu pakhat Hazael sinah “Khuavâng rangah lâwmman put piak le, dam ding ka si awt ma si awt lo, LALPA sinah hawng ka deih piak ding hen simh,” a ti.

⁹Churawhchun Hazael nih sangâwngsâu sâwmli, Damaska ah mi thilsuak â dawh chem mi tla a phurhtir le, Elisa sinah a kal. Hazael nih a tawng rawh chun, a sinah, “Na to-aw Benhadad a damlo mi dam nawlh ding asi awt ma awt lo a nan deih ding hen hawng ka fial asi,” a ti.

¹⁰Elisa nih a sâng le, “LALPA, ka sinah â langh le, a thi lai; sikhawmsele, va kal le, na dam awt nawlh ti hen va simh,” a ti.

¹¹Churawhchun Elisa nih Hazael rangah ningzakkâi rê leh umdân thlâu rê hen a ngiat. Elisa chu mawhsareh hen a mitthli a hawng luang nguai.

¹²Hazael nih a sinah, “Pu, zeirangah na ṭap êu?” a ti. Elisa nih a sâng le, “Israel tla tlûnah thil ṭihnungkâi na ti awt ruangah, an kulh tla na duah lai, an tlangvâl ṭha tla na thah lai, an fa tla vuak hen na thah na lai le, nunau an râi paw tla na khei piak na lai,” a ti.

¹³Hazael nih, “Kei lebang hi, chu hâwi tluk thiltikho hen ka um awt mazei?” a ti. Elisa nih a sâng le, “Siria lal na si ding mi LALPA nih hawng ka muhtir ving rawh,” a ti.

¹⁴Hazael chu Benhadad sinah a kîr le, anih nih “Elisa nih zei thu a sim ne?” ti hen a deih. Hazael nih a sâng le, “Na dam ngelchel lai, ti hen hawng ka simh,” a ti.

¹⁵A thâituan ah Hazael nih puan a lâk le, tî lakah a nîm, a thaw a phih piak le, a thi rawh. Hazael chu a ruangrûl ah Siria lal ah a to rawh.

¹⁶Israel lalchem Ahab fapa Joram nih lâi a rêl mi a kum nga nakah Jehosaphat fapa Jehoram chu,

¹⁷kum sâwmthum leh kum nih asi liauah Juda lalchem a hawng si. Jerusalem ah kum riat lâi a rêl.

¹⁸A nupi chu Ahab fanu asi, Ahab dâwngsung hâwi hen Israel lal sual tla ti dân a châwng. LALPA lakah thilsual a ti le,

¹⁹sikhawmsele, LALPA nih Juda phun chu veih dep ding a duh lo, LALPA nih a to-aw David sinah a thlâk tla um ding mi nih lâi an rêl vima lai ti a tiamh ruangah.

²⁰Jehoram nih lâi a rêl liauah Edom mi tla chu Juda lakah an hel le, anmah ê hen a dang hen an um.

²¹Churawhchun Jehoram chu a kari zawzawng hen Zair khua Edom kawrsen nih an kulh dak mi leiah a kal rawh. Zân ah a kawrsen hotu tla chu an tek le, an suak ver, a kawrsen tla khawm anna rek ver le, in leiah an tlung ver.

²²Chu thawk hen Edom tla chu Juda thawk hen a dang hen an um rawh. Chu liau chun Libnah khua khawm an hel bâk.

²³Jehoram thilti zawzawng tla chu Juda lalchem tla thâwngthâng rînnâk bu ah rîn asi.

²⁴Jehoram chu a thi le, David khuapi mi lal thlân ah an vûi, a fapa Ahaziah chu a ruangrûl ah a lal.

²⁵Israel lalchem Ahab fapa Joram nih lâi a rêl mi a kum leinihnâk ah,

²⁶Jehoram fapa Ahaziah chu kum kul leh kum nih asi liauah Juda lalchem a hawng si, Jerusalem ah kum khat lâi a rêl. A nu chu Athaliah, Ahab fanu, Israel lalchem Omri tunu asi.

²⁷Ahaziah chu a nupi ruangah Ahab hen anna tlâi le, Ahab dâwngsung hâwitê hen LALPA lakah thilsual a ti.

²⁸Lalchem Ahaziah nih Israel lalchem Joram chu Siria lalchem Hazael dopi ding hen a bawp. Gilead ram Ramoth ah kawrsen tla chu neh hen an um, Joram khawm râltuknâk ah â liam.

²⁹Jezreel khua ah a thlawp ding hen a kîr le, chunah Ahaziah nih anih chu a veh.