Read Bawm Chin 1 CHRONICLES 10 Bible Online

1 CHRONICLES 10 - Bawm Chin bible

1 CHRONICLES 10

¹Philistia mi tla nih Israel mi tla Gilboa Tlâng ah an do na. Israel mi tamtak an thi le, chu lakah midang vial chu lalchem Saul leh a fapa tla hen an tek.

²Sikhawmsele, Philistia mi tla nih an tleih na le, Jonathan, Abinadab leh Malkisua, Saul fapa tla chu an pathum hen an thah na.

³Saul kiangkam chu tuknâk thungâi a zual le, mêlma tla nih lalchem Saul chu chanhtiang hen an dingh le, an liamh zia a fâk thlo.

⁴A râlthuam puttu tlangvâl sinah, “Philistia Pathian neilo tla keimah ruangah anna khâwng lonâk ding hen na nâmsâu kha phâwi le, hawng ka thah,” a ti. Sikhawmsele, chu hâwi ti ding chu tlangvâl nih thungâi a ṭih. Churawhchun Saul nih a nâmsâu a lâk le, a nâmsâu pâr zum chu a denh nawh.

⁵Tlangvâl nih Saul a thi mi a muh rawh chun, a nâmsâu pâr a denh le, anih khawm a thi rawh.

⁶Churawhchun Saul leh a fapa pathum chu munkhat hen an thi le, a lâirêlnâk chu a dawng rawh.

⁷Israel tla Jezreel Vakuam ah um mi tla nih kawrsen tla an tek mi leh Saul leh a fapa tla an thi ti an theih rawh chun an khua an tektâk hep. Churawhchun Philistia tla an hawng le, an luah rawh.

⁸Râltuk â lîm rawh chun Philistia mi tla nih a thi mi ruak thil-le-rî lâk ding hen an kal le, Gilboa Tlâng ah Saul leh a fapa tla ruak chu an muh na.

⁹Saul lû chu an tan le, a râlthuam tla an lît, mifial tla Philistia ram pumpi ah an milem leh mi tla sinah thâwngthâng sim ding hen an fial na.

¹⁰An biakin pakhat ah a râlthuam chu an siah le, a lû chu an pathian Dagon in ah an thlâi.

¹¹Gilead ram ah Jabes mi tla nih Philistia mi nih Saul an ti dân chu an theih rawh chun,

¹²mi râlṭha chem tla an kal le, Saul leh a fapa ruak chu an lâk le, Jabes khua ah an kalpi. Oak thing tangah an vûi na le, ni sarih an sûn.

¹³LALPA lakah zumhkâi tak hen a um lo ruangah Saul chu a thi rawh. LALPA thupêk a ngâi lo le; LALPA in ah thu deih ngâk hen mithi thlarau kawh khotu thu a ngâi dauh ruangah.

¹⁴Churuangah LALPA nih a thah le, a ram chu Jese fapa David zauhkhenh ding hen a lalram chu a pêk rawh.