Read Bawm Chin 1 CHRONICLES 12 Bible Online

1 CHRONICLES 12 - Bawm Chin bible

1 CHRONICLES 12

¹David chu Ziklak ah a um liauah Lalchem Saul thawk hen a tek.

²Lalchem Saul chi tla Benjamin thlâk lakah mi kawrsen theihthiam leh zumhkâi tamtak nih an bawp. Chanhtiang leh lungseh kehlei vawrhlei hen mang kho mi an si.

³Gibeah ah mi Semaah fapa tla Ahiezer leh Joash nih an ho na. Kawrsen tla chu hi tla hi an si: Azmaveth fapa tla Jeziel leh Pelet Anathoth ah mi Berakah leh Jehu. Kawrsen minthang Gibeon ah mi “Sâwmthum” lakah hotu pakhat, Ismaiah, Gederah ah mi Jeremiah, Jahaziel, Johanan leh Jozabad, Harip ah mi Eluzai, Jerimoth, Bealiah, Semariah leh Sephatiah; Korah phun tla Elkanah, Isiah, Azarel, Joezer leh Jasobeam, Gedor ah mi Jehoram fapa tla Joelah leh Zebadiah tla an si.

⁸Hi bang tla hi Gad phun lakah kawrsen mi thiam minthang David kawrsen tla sinah ramkaro kulh ah a um liauah anna fawnh mi tla min chu asi. Phaw leh fei mang thungâi an thiam le, zauh hen chakeibaknei hâwi hen ṭihnung an kâi, an khulrang zia chu tlâng ah sazuk hâwi an si.

⁹An mun tla a sang vima hen hi hâwi asi: Ezer, Obadiah, Eliab, Mismanah, Jeremiah, Atai, Eliel, Johanan, Elzabad, Jeremiah leh Makhanai.

¹⁴Hi Gad phun lakah mi zeimaw zat chu, thiam rawh mi, hotu sâng dauh mi chu minung sâng hotu tla an si le, a dang hotu niam dauh mi chu minung zâ hotu an si.

¹⁵Kumkhat sung ah thla masachem ah, Jordan Va tikâwr a khat zat liauah an tan le, chu tivakuam ah um mi tla, saklei kâng leh thlanglei kângah um mi tla chu an ṭhiau phin na.

¹⁶Veikhat chu Benjamin leh Juda phun lakah mi murui David umnâk kulh lakah an kal.

¹⁷David chu anmah tawng ding hen a suak le an sinah, “Hawng ka ṭangpi ding hen hâwikawmh ah hawng mi nan si chun, lawmh ding mi nan si. Kan sinah hawng a bawp u! Sikhawmsele, ka mêlma lakah hawng ka pêktu nan si lam chun, kei lam nih chun zeitin khawm kan ti na lo ruangah hawng kan thlâktu Pathian nih a theih awt ko, amah nih an rêp na lai,” a ti.

¹⁸An lakah a nehnûnah “Sâwmthum” hotu lakah um mi pakhat Amasai chu Pathian thlarau nih a hawng luah le, “Jese fapa David, na tâ kan si! Nangmah sinah Pathian a um mi an ṭangpitu nih dingchangnâk an pêk seh!” ti hen a âu. David nih annih chu a lawmh na le, a kawrsen lakah hotu ah a siam na.

¹⁹Manaseh phun lakah mi kawrsen zeimaw mi tla chu David leh Philistia mi tla nih lalchem Saul do ding hen an kal liauah David murui sinah an kal. Philistia mi chu a ṭangpi na lo, lalchem Saul chu a lânah amah hotu asi ruangah, amah leiah â ṭângṭawm lebang lai ti an lal tla nih an ṭih ruangah David chu Ziklak khua leiah a kîrtir.

²⁰Hi bang hi Manaseh phun lakah kawrsen David a hawng kîr liauah a sinah va kaltu tla an si: Adnah, Jozabad, Jediael, Mikael, Jozabad, Elihu leh Zilethai an si. Manaseh phun lakah chun sâng hotu tla an nei.

²¹Kawrsen leikângah mi mang tlâk tak an si ruangah David kawrsen tla lakah hotu hen an um. A nehnûnah Israel kawrsen lakah khawm hotu hen an um.

²²Nisiar hâwi tluk hen David leiah bawptu an um vima le, churawhchun sâwtlotê ah kawrsen tamtak an hawng si rawh.

²³LALPA nih thu a tiamh rawh mi hâwi hen David chu Hebron ah a um liauah, kawrsen sîn thiam rawh mi tamtak a kawrsen sinah an hawng a bawp le, Saul ruangrûl ah lal ah an siam rawh. An um zat chu hi hâwi asi: Juda lakah mi râlthuam rangtling, phaw leh fei nei mi 6,800 an si. Simeon phun lakah sîn thiam ziar mi: 7,100. Levi phun ah mi: 4,600 an si. Aron thlâk ah mi, Jehoiada zûltu tla: 3,700; Zadok rualsia râltuk kho mi: Ruitu 22; Benjamin (Saul chi-le-kuang): 3,000 (Benjamin phun lakah mi tam dauh chu Saul lakah mi zumhkâi tla an si); Efraim phun lakah mi: an phun lakah mi minthang tla 20,800, Thlanglei mi Manaseh phun lakah mi David rangah lal ah siam ding hen kal ding hen thîm mi tla, 18,000; Isakar phun lakah mi ruitu tla 200 an tangah mi minung tla hen (hi hotu tla nih Israel tla nih thil an ti ding mi leh a tik leh ri tla an theih); Zebulun phun lakah mi: mi zumhkâi, râlthuam zât kip mang thiam mi leh tîm chia zet hen um mi, 50,000; Naphtali phun lakah mi hotu tla: 1,(...)

³⁸Hi bang kawrsen zawzawng tla hi râltuk ding hen tîm chia zet mi Hebron ah an kal. David chu Israel zawzawng tlûnah lal ah siam ding hen kaltu tla an si. Israel mi a dang zawzawng chu tumnâk munkhat hep hen an um.

³⁹Nithum David sinah an um, chu kar zawng a ram mi an hâwi tla nih an timhtuah mi puai ei leh din hen an um.

⁴⁰Ram lât tak marlei mi phun tla Isakar, Zebulun eh Naphtali mi tla nih an sanatung, sangâwngsâu tla leh an chawchal chu, buh, sang, theipi rah leh grep rah châr, uain, oliv sariak an phurhtir. Thah ding mi ranrual leh dawrâ, ei ding khawm an hawng put. Hi zawng hi ram pumpi lâwmnâk zauhtirnâk asi.