Read Bawm Chin 1 CHRONICLES 13 Bible Online

1 CHRONICLES 13 - Bawm Chin bible

1 CHRONICLES 13

¹Lalchem David nih kawrsen sâng hotu leh zâ hotu tla sinah thu a thlûkpi na.

²Churawhchun Israel mi zapi tla sinah thu a sim, “Rem nan ti hen LALPA kan Pathian duhzia asi ding mi asi chun, ram pumpi minung tla sinah mi fial na hen bâwlpu leh Levi mi tla sinah hinah hawng a pûm na ding hen simh na seh.

³Kan Pathian Thudântuk Bâwm Saul dam liauah an thlawrhthlâu mi kha kan va lâk lai,” a ti.

⁴Zapi tla chu thungâi anna lâwm le, rem an ti.

⁵Kiriath Jearim ah mi Thudântuk Bâwm chu Jerusalem ah put ding hen David nih Israel ram ah mi zawzawng, Aigupta ramri simlei kâng thawk hen marlei Hamat Liamnâk tiang a pumh hep na.

⁶David nih mi zapi tla chu Kiriath Jearim Baalah ah an kal le, chu chu Juda ram asi, Pathian Thudântuk Bâwm a min ah thilnung thla tlûnah to mi LALPA ti mi chu va lâk ding hen.

⁷Aminadab in ah mi Thudântuk Bâwm chu an lâk le, kari thar tlûnah an thâng. Uzah leh Ahia nih kari chu an nûk.

⁸Chu liau chun David leh midang tla chu LALPA zah ti theihnâk ah an chelh rî hen an lâm. La an sak, tumphung tla, ṭingṭang, khuang, chêngchêng, tâwtawrâwt tla an tum.

⁹Kidon fâng khâwngnâk mun an hawng tleng liauah chawchal a tlû le, Uzah nih a kut a zangh le, Thudântuk Bâwm chu a tleih.

¹⁰Thudântuk Bâwm a tawngh ruangah LALPA a thinthawk le, Uzah chu a thah sawm, chunah Pathian mâika ah a thi.

¹¹Churuangah chu mun chu Perez Uzah an ti pawt. LALPA nih thinrun hen Uzah a thah ruangah David thungâi a thinthawk.

¹²Churawhchun David nih Pathian chu a ṭih le, “Zeitin tuah hi Thudântuk Bâwm hi ka sinah ka put kho lai,” a ti.

¹³Churawhchun David nih Jerusalem leiah a kalpi lo rawh. Gath khuapi mi, mi pakhat Obed Edom in ah a mâk thlap.

¹⁴Chunah chun Thudântuk Bâwm chu thla thum kar a um le, LALPA nih Obed Edom dâwngsung leh an neih zawzawng mal a sâwm piak na.