Read Bawm Chin 1 CHRONICLES 15 Bible Online

1 CHRONICLES 15 - Bawm Chin bible

1 CHRONICLES 15

¹Amah rangah mang ding hen David nih amah khuapi ah in tla a sak. Pathian Thudântuk Bâwm rangah mun tla a timhtuah le, puanin tla a siam.

²Churawhchun, David nih, “Levi tla chu Thudântuk Bâwm zawnhtu leh amah rianṭuantu si kumza ding hen LALPA nih a thîm na mi an si ruangah anmah murui cho nih an zawnh ding asi,” a ti.

³David nih Israel mi zawzawng tla chu Jerusalem ah Thudântuk Bâwm siahnâk mun a ruatnâk mun ah kalpi ding hen a kawh na.

⁴A nehnûnah Aron thlâk tla leh Levi tla a kawhtir na.

⁵Kohat thlâk lakah mi Levi phun Uriel, amah chi minung zâ leh kul lakah hotu,

⁶Merari chi lakah mi Asaiah mi zanih leh kul lakah hotu;

⁷Gerson chi lakah mi Joel mi zâ leh sâwmthum lakah hotu,

⁸Elizaphan, Semaiah thlâk lakah mi zanih hotu;

⁹Eliel, Hebron chi lakah mi sâwmriat hotu,

¹⁰Aminadab thlâk lakah mi Uziel zâ leh leinih hotu a kawh na.

¹¹David nih bâwlpu Zadok leh Abiathar, Levi lakah mi paruk, Uriel, Asaiah, Joel, Semaiah, Eliel leh Aminadab a kawh na.

¹²Anih nih chun Levi tla sinah, “Nannih chu Levi chi tla ruitu nan si. Nanmah leh Levi hâwi tla a thianh u, LALPA Israel Pathian Thudântuk Bâwm siahnâk mun ka timhtuahnâk mun ah nan kalpi khonâk ding hen.

¹³Tan masa khawm khan zawnh ding hen nanmah nan um lo le, kan sawnh ding mi hâwi hen kan ti lo ruangah LALPA nih hawng kan rêp,” a ti.

¹⁴Churawhchun, Bâwlpu leh Levi tla chu LALPA Israel Pathian Thudântuk Bâwm ṭhial ding hen anna thianh.

¹⁵Mosi sinah LALPA nih thu a pêk mi hâwi hen Levi tla nih thingtluan hen an liangah an zawnh.

¹⁶David nih Levi hotu tla chu Levi dang tla sinah la saktu ding leh tumphung ṭingṭang leh chêngchêng tumtu ruat na ding hen a simh na.

¹⁷La saktu ding leh dâr chêngchêng tumtu dingah hi bang tla hi ruat an si: Joel fapa Heman, a rualsia Berekiah fapa Asap, leh Merari chi lakah mi Kusaiah fapa Ethan an si. Anmah tla ṭangpitu ding hen Levi tla lakah ṭingṭang hâu sâng tak tumtu ding hen hi bang tla ruat an si: Zekariah, Jaaziel, Semiramoth, Jehiel, Unni, Eliab, Maaseiah leh Benaiah. Levi tla lakah hâu niam dauh hen ṭingṭang tumtu chu hi tla hi an si: Matithiah, Eliphelehu, Mikneiah, Azaziah leh Biakin vêngtu Obed Edom leh Jeiel an si.

²²Kenaniah chu tumphung leikâng thiam mi asi ruangah Levi tumphung tumtu hotu rangah thîm asi.

²³Berekiah leh Elkanah, Obed Edom leh Jehiah tla chu Thudântuk Bâwm vêngtu ah thîm an si. Bâwlpu Sebaniah, Josaphat, Nethanel, Amasai, Zekariah, Benaiah leh Eliezer chu Thudântuk Bâwm mâi ah tâwtawrâwt tumtu rangah thîm an si.

²⁵Lalchem David, Israel ruitu tla, kawrsen hotu tla Thudântuk Bâwm Obed Edom in ah mi lâk ding hen an kal le, lâwmnâk rokual tak an nei.

²⁶Levi, Thudântuk Bâwm zawnhtu tla Pathian nih ṭangpi ding hen chawchal pasarih leh dawrâ pasarih bâwlnâk an ap.

²⁷David nih puan mangṭhia kawrfual â ruk le, churawhchun tumphung tumtu tla hotu Kenaniah leh bâwm zawnhtu Levi tla hen. David nih ephod khawm â ruk.

²⁸Churawhchun Israel mi zawzawng tla nih Thudântuk Bâwm chu lâwmnâk ruangah âu bû hen, tâwtawrâwt tla, ki tla, chêngchêng tla leh ṭingṭang tla tum hen Jerusalem leiah an zûl.

²⁹Thudântuk Bâwm chu khuapi ah an tlungpi rawh chun Saul fanu Mikal nih langawtkawt thawk hen lalchem David lâwm ruangah a lâm leh â lawk mi a muh le, a zahpi.