Read Bawm Chin 1 CHRONICLES 16 Bible Online

1 CHRONICLES 16 - Bawm Chin bible

1 CHRONICLES 16

¹Thudântuk Bâwm chu an lâk le, David nih a siahnâk dingah a timhtuah mi sungah an siah rawh. Churawhchun bâwlnâk leh kawmhnâk bâwlnâk Pathian sinah an ap.

²David nih bâwlnâk a ap thluh rawh chun zapi chu LALPA min hen mal a sâwm na le,

³an ektê hen buh a pêk na. Israel lakah nunau, mipa mikip sangtlêp, meh em leh grep rah châr a pêk na.

⁴David nih Levi chi zeimaw mi tla chu LALPA Israel sawnhnâk lakah, Thudântuk Bâwm mâika ah lasaktu leh Pathian chawnglawmhtu tla ruitu ah a ruat na.

⁵Asap chu ruitu ah ruat asi, Zekariah chu a ṭangpitu dingah. Jeiel, Semiramoth, Jehiel, Matithiah, Eliab, Benaiah, Obed Edom leh ṭingṭang tumtu Jeiel tla an si. Asap chu chêngchêng tumtu asi.

⁶Bâwlpu panih Benaiah leh Jahaziel chu khuah tak hen Thudântuk Bâwm mâi ah tâwtawrâwt tumtu an si.

⁷A masa hen Asap leh a hâwi Levi tla chu LALPA sawr ding leh lasak ding hen David nih a ruat na mi asi.

⁸LALPA sinah lâwmthu sim ule, a rokualnâk chu phuang u; a thilti chu phun tla simh na u.

⁹La sak hen LALPA chu sawr ule; thilchê a ti mi tla chu sim u.

¹⁰A tâ kan si mi tla chu kanna lâwm lai le; amah sawnhtu tla chu a lâwm na seh!

¹¹Ṭangpinâk tawng ding hen LALPA sinah kal ule, amah chu sawnh kumza u.

¹²Nannih Pathian to-aw, Jakob thlâk tla, Pathian thîm mi Israel thlâk tla, LALPA thilchê ti leh lâirêlnâk hawng kan pêk mi chu theihkumza u.

¹⁴LALPA chu kan Pathian asi le; a thupêk tla chu laikulh pumpi rang asi.

¹⁵Zungzâl tiang hen um kumza ding mi Pathian thudântuk chu philh rîlmâl lah u.

¹⁶Abraham sinah thudân a tuk mi leh Isak sinah a thutiam chu.

¹⁷LALPA nih Jakob sinah thudân a tuk mi chu zungzâl tiang a um ding mi asi.

¹⁸“Kanaan ram chu ka nan pêk na lai le, nanmah tâ tak asi lai,” a ti mi chu.

¹⁹Pathian mi tla chu tâwmtê an si, Kanaan ah chun khual hâwi an si.

²⁰Ram khat lakah mi ram dang dangah, lal ram pakhat thawk hen lalram dangah anna sawk.

²¹Sikhawmsele, Pathian nih âukhawm a nehsawhtir na lo le, a kilkâwi hen lal tla chu ningṭih a phaih na:

²²“Ka to-aw thîm tla chu nganfâk pêk na lah ule, ka khuavâng tla chu tawngh lah na u,” ti hen.

²³Laikulh zawzawng nih LALPA sinah la sak seh! Ruang hawng kan suah mi thâwngthâng lawmhkâi nisiar hen phuang seh.

²⁴A rokualnâk chu phun sinah phuang ule, chaknâk hen thil a ti mi tla mi zapi tla sinah sim u.

²⁵LALPA chu a rokual le, fâk tak hen sawr ding asi; pathian dang zawzawng ngâk hen amah chu zah ding asi.

²⁶Phun dang pathian tla chu milem cho an si, sikhawmsele LALPA chu tual leh vân siamtu asi.

²⁷Rokualnâk leh lalnâk nih a kulh, thiltikhonâk leh lâwmnâk hen a Biakin a khat.

²⁸Tual tlûnah mi zawzawng tla LALPA chu sawr u, a rokualnâk leh thiltikhonâk chu sawr u.

²⁹LALPA min rokual chu sawr ule; thil ap tla hen a Biakin ah hawng u. A thenhlimhnâk hen â langh liauah LALPA mâika ah kûn u.

³⁰Tual ah mi zawzawng tla a mâika ah thir u. Tual chu a mahmuntê ah a siah le, ṭhial kho asi lo.

³¹Tual leh vân tla a lâwm u! LALPA chu lal asi ti hen phun tla simh na u.

³²Tisumsumriat, a mi leh a sungah um mi nan hâu suah u, phâisen ah mi thil zeizawng a lâwm u!

³³LALPA mâika ah tumun ah mi thing tla chu, LALPA mâi ah lâwm hen an âu lai, tual ah lâirêl ding hen a hawng tikah.

³⁴LALPA chu a ṭha ruangah leh zungzâl hen dâwttu asi ruangah a sinah lâwmthu sim u.

³⁵“Pathian, ruang hawng kan suahtu, hawng kan hum rawh, Phun tla lakah mi hawng kan pumh nawlh. Na min thenhlimh chu sawr hen lâwmthu kan sim khonâk ding hen,” ti u.

³⁶LALPA Israel Pathian chu sawr u! Tuah leh zungzâl hen amah chu sawr u! Mi zawzawng nih, “Amen,” an ti le, LALPA chu an sawr rawh.

³⁷Lalchem David nih Asap leh a hâwi Levi tla chu Thudântuk Bâwm siahnâk mun ah Pathian sawnhnâk lakah chun hotu si pawt ding hen a ruat na. Nisiar hen an rianṭuan chu chunah ṭuan ding an si rawh.

³⁸Jeduthun fapa Obed Edom leh minung sâwmruk pariat amah chi tla chu anmah ṭangpitu ding an si. Hosah leh Obed Edom chu kulh kawtkâ vêngtu an si.

³⁹Bâwlpu Zadok leh a hâwi bâwlpu tla chu Gibeon khua ah Pathian sawnhnâk lakah zeiliau zawng hotu an si kumza ding asi.

⁴⁰LALPA nih Israel tla sinah dân rîn hen a pêk na mi hâwi vima hen zînglei leh zânlei siar hen bâwlnâk duah mi tla mâichâm tlûnah an duah ding asi.

⁴¹Chu tla sinah chun Heman leh Jeduthun LALPA dâwtnâk dawng lo lasak dingah thîm mi midang tla an um.

⁴²Sawrnâk la sak liauah tâwtawrâwt leh chêngchêng leh thildang tumtu lakah hotu ding hen Heman leh Jeduthun chu ruat an si. Jeduthun chi tla chu kulh kawtkâ vêngtu dingah ruat an si.

⁴³Churawhchun mah in chiauah an lâwi le, David khawm a dâwngsung tla hen hun sâwt chiamlo um ding hen in leiah a lâwi. David Sinah Nathan Thuchah