Read Bawm Chin 1 CHRONICLES 17 Bible Online

1 CHRONICLES 17 - Bawm Chin bible

1 CHRONICLES 17

¹Lalchem David chu a lal in ah a um rawh. Nikhat chu khuavâng Nathan sinah mi a fial le, a sinah, “Kei lam chu sidar thing hen sak mi in ah ka um le, sikhawmsele LALPA, Thudântuk Bâwm lam chu puanin ah a um ko!” a ti.

²Nathan nih a sâng le, “LALPA na sinah a um ruangah na thinlung ah na duh mi chu ti ko ma a,” a ti.

³Sikhawmsele chu zân ah chun Pathian nih Nathan sinah,

⁴“Va kal le, hi thu hi ka to-aw David sinah va simh, “Nang lam chu ka umnâk ding hen Biakin ka rangah na sak lai loh.

⁵Israel mi tla Aigupta ram thawk hen ka suakpi na mi thawk hen tusûn ni tiang Biakin ah ka um lo rih; puanin ah ka um le, mun dang dangah ka ṭhial vima.

⁶Israel mi tla sinah ka khualtlâwngnâk khawm ah ruitu dingah ka siam na mi sinah, zeirangah sidar thing hen Biakin nan hawng ka sak piak dah lo, ka ti lo! a ti,” ti hen.

⁷“Churuangah ka to-aw David sinah, “Kei Zeizawng Tikho LALPA nih ka sim mi thu hi va simh, ‘Na dawrâ phâisen ah na vêng mi, ka mi Israel lâirêltu ah ka nan siam asi.

⁸Na kalnâk zawngah na sinah ka um le, na kalnâk kipah na mêlma tla na neh na. Laikulh ah ruitu rokual chem leh minthang chem ah ka nan siam awt.

⁹Ka mi Israel tla rangah mun ka thîm piak na le, chunah chun ka umtir na, chunah chun âu nih khawm nauneh hen an um lai lo rawh. Hi ram an hawng lût liauah rawktu tla nih an do na le, chubang hâwi chu a um nawlh lai lo rawh. Na mêlma tla zawzawng neh na ding leh thlâk tla an pêk na ding hen thu ka tiam.

¹¹Na thih tikah an thlâktu tla thlân ah vûi hen na um tikah, na fapa lakah mi lal ah ka siam lai le, chu nih chun a lalram chu chak tak hen a kilkâwi lai.

¹²Anih nih chun ka rangah Biakin hawng ka sak piak lai le, a lalnâk chu ka siah kumza lai.

¹³Anih rangah kei chu pa ka si lai le, anih chu ka fapa asi lai. Lal na si khonâk ding hen Saul chu ka lawnh le, ka lêt tak mi hâwi hen amah ka thlawp mi chu ka lêt tâk lai loh.

¹⁴Ka mi tla hotu ding leh ka lal ram rangah ka siah kumza lai. A thlâk tla nih dawngh a nei lai loh,’ a ti.

¹⁵Pathian nih a simh mi zawzawng chu Nathan nih David rangah a simh ver.

¹⁶Churawhchun lalchem David chu Puanin ah LALPA mâika ah a to le, thla a cham, “LALPA Pathian, ka rangah thil na ti mi tla hi kei leh ka dâwngsung lakah pakhat khawm a tlâk mi kan um lo.

¹⁷Sikhawmsele tuah leiluat rê hen na ka ti piak; kum leh khua a hawng um ding mi lakah ka thlâk tla rangah thutiamnâk na siam. LALPA Pathian, nangnih mi rokual tak hâwi hen na ka sawnh kumza.

¹⁸Thu dang zei me na sinah ka sim lai rawh! Nangnih fiang tak hen na ka theih le, kei na to-aw hi ṭih leh zah ding hen na ka siam.

¹⁹Nûnthâi ah ka rokualnâk ding na ka theihtir mi hi nangmah duhzia leh thiltum asi.

²⁰LALPA nang hâwi hi âukhawm an um lo, nangmah cho hi Pathian na si ti kan theihkumza.

²¹Nangmah mi si ding hen sal na suah na mi Israel hâwi hen phun dang âukhawm tual ah an um loh, An rangah thilchê rokual tak na ti mi ruangah laikulh pumpi ah na min a thang. Aigupta ram ah na mi tla chu ruang na suah le, na mi tla an kalnâk kipah phun dang tla chu na nar piak na.

²²Israel tla chu nangmah mi si kumza ding hen na siam na le, LALPA nang chu an Pathian na hawng si rawh.

²³“LALPA Pathian, tuah kei leh ka thlâk tla rangah na thutiam chu rangtlingtir le, ti ding hen na tum mi chu ti rawh.

²⁴Na minthangnâk chu a rokual lai le, mi nih, Israel lakah LALPA zeizawng tikho chu Pathian asi,’ an ti lai. Chun, ka lal sinâk chu na kilkâwi kumza lai.

²⁵Kei, na to-aw hi ka thlâk tla lal ah na siam ding mi na ka simh ruangah, nang ka Pathian sinah ka thlachamnâk hi ka hawng sim ngam asi.

²⁶LALPA, nang chu Pathian na si, ka sinah thutiam chê tak hawng ka tiamhtu chu na si.

²⁷Ka thlâk tla chu nangmah dâwtnâk ah anna lâwm kumza khonâk ding hen mal na sâwm na ding hen kan ngiar. LALPA, nangnih malsâwm na le, na malsâwmnâk chu an lakah a um kumzanâk ding hen,” a ti.