Read Bawm Chin 1 CHRONICLES 18 Bible Online

1 CHRONICLES 18 - Bawm Chin bible

1 CHRONICLES 18

¹Zeimaw tiang nûnah chun David nih Philistia tla a do na le, a neh na. Gath khuapi leh a kiangkam mi khua tla a lâk na.

²Moab mi tla khawm a neh na, a sinah siah an châwi le, amah ti leh khua an si.

³Chu nûn chun Hadadezer nih Eufretis saklei ram chu lâk ding a tum ruangah Hamat ram kiangah mi Siria lalchem Hadadezer mun Zobah chu David nih a do.

⁴David nih kari sâng, rang tlûn to mi sâng sarih, kê hen kal mi kawrsen sîngnih a tleih na. Rang tam tâwk leh kari zâ leh a dang a kê bai mi tla chu a siah piak na.

⁵Damaska mi Siria tla nih lalchem Hadadezer ṭangpi ding hen kawrsen an fial na. David nih a do na le, minung sîngnih leh sângnih a thah na.

⁶An ram ah kawrsen kulh a dirh le, amah ti leh khua ah an um le, a sinah siah an châwi. LALPA nih David chu mun kipah nehtu ah a siam.

⁷David nih ngûn phaw Hadadezer rianṭuantu nih a put mi chu a lâk le, Jerusalem ah a kalpi.

⁸Tibhat leh Kun khuapi Hadadezer lâirêlnâk tangah a um mi dâr tamtak khawm a lâk. (Chu dâr tla hen a nehnûnah Solomon nih tî khawngnâk hûmpi tla, tohnâk tla, Biakin khêng leh bêl tla a siam.)

⁹Hamat lalchem Toi nih Hadadezer kawrsen ektê hen David nih a neh na rawh ti a theih.

¹⁰David chibai bûk ding leh Hadadezer a neh ruangah lawmhpi ding hen a fapa Joram a fial. Hadadezer chu Toi nih vei tamtak a do rawh mi asi. Joram nih David rangah ngûn, tangka leh dâr tla lâwmman a put piak.

¹¹Lalchem David nih Edom, Moab, Amon, Philistia leh Amalek phun tla neh na hen a lâk mi tangka, ngûn tla chu Pathian sawnhnâk rangah a ap.

¹²Zeruiah fapa Abisai nih Chitê Va phâi ah Edom mi tla chu a neh na le, minung sîngkhat leh sângriat a thah na.

¹³Edom ram sungah a kawrsen a siah na le, chu ram ah minung tla chu David ti leh khua an hawng si rawh. LALPA nih David chu mun kipah nehtu ah a siam.

¹⁴David nih Israel mi tla tlûnah lâi a rêl le, ṭha tak leh rep tak hen a mi tla chu a zauhkhenh na.

¹⁵Abisai unaupa Joab chu kawrsen hotu asi; Ahilud fapa Jehosaphat chu thu rîn singsiahnâk hotu asi.

¹⁶Ahitub fapa Zadok leh Abiathar fapa Ahimelek chu bâwlpu an si. Seraiah chu lâirêlnâk lasuirîntu asi.

¹⁷Jehoiada fapa Benaiah chu David vêngtu asi; chun David fapa tla nih rianṭuannâk sâng tak an ṭuan.