Read Bawm Chin 1 CHRONICLES 20 Bible Online

1 CHRONICLES 20 - Bawm Chin bible

1 CHRONICLES 20

¹A kum vei lal râltuk kal liau hûnah, Joab nih a kawrsen tla hen Amon ram an va rûn le; lalchem David lam chu Jerusalem ah a um ko. Rabah khua chu an hual le, an do na, an râwk dep.

²Amon milem Milkom an ti mi nih ngûn lukhuh kilogramme sâwmthum leh pali rih a nei. Chunah mi lungmantam tla chu David nih a lâk le, a lallukhuh ah a bêk. Chu khuapi sungah mi thil-le-ri tla tamtak an lâk ver.

³Chunah mi minung tla chu an put na le, thing lahnâk, phâisen nâwnnâk thîr hâr, reitlung siamtu ah a mang na. Amon khua dang mi tla khawm rianṭuantu ah a mang na. Churawhchun a mi tla hen Jerusalem leiah an kîr rawh.

⁴Chu nehnûn chun Philistia mi tla hen Gezer ah donâk a um fâwn. Hi liau hin Husah mi Sibekai milian a min Sipai a thah le, Philistia chu neh hen a um rawh.

⁵Philistia mi tla hen tuknâk dang a um fâwn le, Jair fapa Elhanan nih Goliath unaupa Gath ah mi, Lahmi a feingul thiam tahnâk tâkaw tia ti mi hen a thah.

⁶Tuknâk dang Gath khua ah a um nawlh fâwn, chunah mi milian chu kutmar paruk leh kemar paruk nei mi a um. A lânah mi milian tla thlâk asi.

⁷Israel tla chu a zuam na le, David unaupa Samah fapa Jonathan nih a thah.

⁸David leh a mi tla nih an thah na mi pathum tla chu Gath mi milian thlâk an si.