Read Bawm Chin 1 CHRONICLES 21 Bible Online

1 CHRONICLES 21 - Bawm Chin bible

1 CHRONICLES 21

¹Setan nih Israel mi tla lakah nawknâk tlungtir ding a duh le, David chu minung rêl ding duhnâk thinlung a pêk.

²David nih Joab leh hotu dang tla thu a pêk le, “Israel ram khatlei dawng thawk hen khatlei dawng tiang ṭawl ule, mi tla rêl u. Mi zeizat rêng an um theih ding ka duh,” a ti.

³Joab nih a sâng le, “LALPA nih Israel mi tla chu tu mi ngâk hen a leh zâ ngâk rêl châwklo khawm hen puatir seh! Bâwipa, nangmah to-aw ver an si lo ma? Zei rangah phun tla mawhnâk tlungtir ding hen, hi hâwi thilti ding zeitin na duh zia?” a ti.

⁴Sikhawmsele, lalchem nih Joab chu thupêk hâwi hen a titir. Joab chu a suak le, ram pumpi a ṭawl ver le, Jerusalem leiah a kîr rawh.

⁵Churawhchun lalchem David sinah râltuknâk ah kal kho ding mi vial tling zat: Israel ram ah 1,100,000, leh Juda ramah 470,000, a theihtir.

⁶Joab nih lalchem thupêk chu rem a ti lo ruangah Levi leh Benjamin chi lakah mi chu a rêl lo.

⁷Chu hâwi thilti chu Pathian nih a duhzia asi lo le, Israel tla chu a rêp na rawh.

⁸David nih Pathian sinah, “Hi thil ka ti mi ruang hin sual ṭihnungkâi ka ti rawh asi! Zângfahtê hen hawng ka ngaihdam. A tak hen ka ti ko rawh,” a ti.

⁹Churawhchun LALPA nih David khuavâng Gad sinah,

¹⁰“David sinah va kal le, thîm ding pathum ka pêk mi hi va simh. A thîm mi zawng ka ti lai,” a ti.

¹¹Gad chu David sinah a kal le, LALPA nih thu a sim mi chu a simh le, “Hi thil pathum lakah a zei mi na thîm awt?

¹²Kum thum kar pâmnâk ma? Thla thum kar na mêlma nih an dûm ding ma? Nithum kar LALPA nâmsâu hen a vânmifial nih a nan do lai le, Israel ram pumpi ah thihnâk râi hawng tlungtir ding mi ma? Zei hâwi sângnâk me LALPA ka simh awt?” ti hen a deih.

¹³David nih Gad chu a sâng le, “Lawksawng kâi tak mun ah ka um rawh! Sikhawmsele, minung rêp hen um ding lam chu ka duh loh. LALPA chu mi khuaruat kho mi asi ruangah amah ngelchel nih hawng ka rêp ko seh,” a ti.

¹⁴Churawhchun LALPA nih Israel mi tla lakah thihnâk râi a lêngtir le, minung sîng sarih an thi.

¹⁵Churawhchun Jerusalem râwk ding hen vânmifial a fial le, sikhawmsele, a thinlung a lêt le, vânmifial sinah, “Bâng ko rawh, â tâwk rawh!” a ti. Vânmifial chu Jebus mi Araunah fâng khâwngnâk mun ah a dîr.

¹⁶David nih vânmifial a nâmsâu put hen Jerusalem râwk ding sek hen vân lâi ah dîr mi a muh. Churawhchun David leh zapi tla ruitu zawzawng nih salâpuan anna aih le; an mêl tual tawngh khet hen an kûn.

¹⁷David nih thla a cham, “Pathian, thilsual titu khawm keimah ka si. Minung rêl ding mi thupêktu khawm keimah ka si. Hi ngâkṭah mipi tla nih zei an ti mi a um? LALPA ka Pathian, kei leh ka dâwngsung rangah hawng kan rêp le, zapi minung tla chu zuah na rawh,” a ti.

¹⁸LALPA vânmifial nih Gad sinah David nih Araunah fâng khâwngnâk mun ah LALPA rang ah mâichâm siam tir ding hen a simh.

¹⁹David nih LALPA thupêk chu zûl hen Gad nih a simh hâwi hen mâichâm siam ding hen a kal rawh.

²⁰Chunah fâng khâwngnâk mun ah chun Araunah leh a fapa pali nih fâng an khâwng, vânmifial an muh rawh chun a fapa tla chu an tek le, anna thup.

²¹Araunah nih lalchem David a hawng mi a muh kâ hen, a fâng khâwng a mâk thlap le, a mêl tual tawngh khet hen a kûn.

²²David nih a sinah, “Hi na fâng khâwngnâk mun hi LALPA rangah mâichâm siamnâk dingah hawng ka zawrh le, râi a lêng mi a reh khonâk ding hen, a man khawm tling ver hen kan pêk lai,” a ti.

²³“Bâwipa, lâk ko ma a,” ti hen Araunah nih a sâng. “Na duh mi zawng ti ko, mâichâm ah duah ding hen chawchal tla khawm hinah an um, fâng khâwngnâk thing tla tih ding leh ap ding hen fâng tla khawm a um, zeizawng ka nan pêk asi,” a ti.

²⁴Sikhawmsele lalchem nih a sâng le, “Silo, a man tling zet hen kan pêk lai. A man pêklo hen chun LALPA sinah ap ding mi thil na tâ zeikhawm a thawt hen ka lâk awt lo,” a ti.

²⁵Churawhchun Araunah rangah ngûn tangka zaruk fâng khâwngnâk mun rangah a pêk.

²⁶David nih chunah chun mâichâm a siam le, duah mi thil ap leh remnâk thil ap a ap. Thla a cham le, LALPA nih mâichâm ah mi khangh ding hen vân thawk hen mei thlâk hen a thlachamnâk a sâng piak.

²⁷LALPA nih vânmifial rangah a nâmsâu chu siah ding hen a simh le, vânmifial nih chun a siah rawh.

²⁸David nih chu lakah chun LALPA nih a thlachamnâk a sâng ti a theih le, Araunah fâng khâwngnâk mun ah mâichâm ah bâwlnâk a ap rawh.

²⁹Chu liau tla ah chun LALPA umnâk Puanin Mosi nih ramkaro ah a siam mi leh Pathian sawnh hen duahnâk mâichâm khawm Gibeon khua ah a um ko rih.

³⁰Sikhawmsele, Pathian va sawnh ding hen chunah chun David a kal kho lo, LALPA vânmifial nâmsâu a ṭih ruangah.