Read Bawm Chin 1 CHRONICLES 22 Bible Online

1 CHRONICLES 22 - Bawm Chin bible

1 CHRONICLES 22

¹“Hi hi LALPA Pathian Biakin umnâk ding mi chu asi. Hi hi Israel tla nih duahphung thil ap pêknâk ding mâichâm chu asi,” a ti.

²Lalchem David nih ramdang mi Israel ram ah um mi zawzawng pumh ver ding hen thu a pêk le, rianṭuantu ah a mang na. A zeimaw mi chu Biakin saknâk ding lung leikâng rianṭuantu an si.

³Kulh kawtkhâr thîr kilhnâk ding leh thîrling siam ding hen thîr tamtak a pêk na le, dâr a rit thlâi châwk lo rê hen.

⁴Tura leh Sidon khua mi sidar thing tan tamtak puttu ding hen minung a ruat na.

⁵David nih, “Ka fapa Solomon nih a sak ding mi Biakin chu a rokual hen laikulh ah a minthang ding asi. Sikhawmsele a ngâksia hen zeikhawm a theih lo rih ruangah keimah nih chu rang ding chu ka timhtuah lai,” ti a ruat. Churuangah David nih a thih lânah a ruakhâu zawzawng a timhtuah tâ zet asi.

⁶David nih a fapa Solomon chu a kawh le, LALPA Israel Pathian Biakin sak ding hen thu a pêk.

⁷David nih Solomon sinah, “Ka fapa, LALPA ka Pathian zah a kâi mi theihnâk dingah Biakin sak ding ka duh.

⁸Sikhawmsele LALPA nih mi ka thah na mi leh râltuknâk ka tel tam tuk. Mi thisen ka suahtir mi a tamtuk ruangah a rangah Biakin hawng ka saktir siang lo.

⁹A thutiam zia hâwitê hen thil a ti rawh. LALPA nih, ‘Thlangam tak hen lâirêltu ding mi fapa na nei lai le, a mêlma lakah mi thlangamnâk ka pêk awt. A min chu Solomon asi lai, a lâirêl kar zawzawng chu Israel tla rangah thlangamnâk leh himnâk ka pêk na lai.

¹⁰Anih nih ka rangah Biakin a sak lai. Ka rangah fapa asi lai le, kei khawm a pa ka si lai. Israel lakah a thlâk tla lalnâk chu a um kumza lai,’ a ti.

¹¹Churawhchun David nih thu a sim vima le, “Tuah, ka fapa, LALPA na Pathian chu na sinah um seh, a rangah Biakin sak ding thu a tiamh mi hâwi hen sul-le-lam tluang tak hen an siam seh.

¹²Dân hâwitê hen Israel lakah lâi na rêl khonâk ding hen LALPA Pathian nih finghnâk leh muhnâk a nan pêk seh.

¹³LALPA nih Mosi sinah Israel tla rangah dân a pêk mi na zûl chun, dingchang tak hen na um lai. A tum thlir le, zumh thlir, zeikhawm nih a nan zâmtir lah seh.

¹⁴Biakin rang dingah ka timhtuah mi ngûn, metric ton 3,400 leh tangka metric ton 34,000 ngâk hen tam Biakin saknâk ah mang ding hen ka khawng. Chu lo khawmah thîr leh dâr dawng lo hen pêk asi. Thing leh lung tla khawm ka timhtuah zet rawh, sikhawmsele tam dauh na nei ding asi.

¹⁵Rianṭuantu tamtak na nei. Lung leikâng chawhtu tla tamtak,

¹⁶ngûn, tangka, dâr thîr chi kip siam thiamtu cherkhet an um. Tuah rianṭuan dawmh le, chun LALPA chu na sinah a um kho lai,” a ti.

¹⁷David nih Israel ruitu zawzawng tla chu Solomon ṭangpi ding hen thu a pêk na.

¹⁸“LALPA na Pathian chu na sinah a um le, zei leikâng zawngah thlangamnâk a nan pêk rawh. Hi ram ah um mi tla zawzawng hawng ka nehtir ver le, LALPA leh na sinah tuah pêk an si rawh.

¹⁹Tuah LALPA na Pathian chu na thinlung leh na thlarau hen a nâwl zulh rawh. Tuah Biakin sak chu a dawmh le, chu lakah LALPA Thudântuk Bâwm leh amah sawnhnâk ah mang mi thil thenhlimh tla siah rawh,” a ti.