Read Bawm Chin 1 CHRONICLES 26 Bible Online

1 CHRONICLES 26 - Bawm Chin bible

1 CHRONICLES 26

¹Hi bang tla hi Levi Biakin vêng leikângah rianṭuantu tla an si: Korah chi lakah mi Kore fapa Meselemiah a um, chu chu Asap dâwngsungkhur asi.

²Fapa pasarih a nei, an kum a sang vima hen rîn asi: Zekariah, Jediael, Zebadiah, Jathniel,

³Elam, Jehohanan leh Eliehoenai an si.

⁴LALPA nih malsâwm hen fapa pariat a pêk mi Obed Edom a um le, an kum a sang vima hen rîn asi: Semaiah, Jehozabad, Joah, Sakar, Nethanel,

⁵Amiel, Isakar, Peulethai an si.

⁶Obed Edom fa upachem mi Semaiah nih fapa paruk a nei: Othni, Rephael, Obed, Elzabad, Elihu leh Semakiah tla an si. Thil an tikho ruangah an phun lakah mi pawiherh tak an si, A dawnghchemnâk ah mi panih chu thiltikho bîk nâk an nei.

⁸Obed Edom dâwngsungkhur tla an ektê hen mi sâwmruk leh panih tla chu hi bang rian lakah thiam tak mi ver an si.

⁹Meselemiah dâwngsungkhur tla an ektê hen mi leiriat chu mi thiam ver an si.

¹⁰Merari phun lakah Hosah a um le, fapa pali a nei: Shimri, (a pa nih fapa upachem silah khawmsele ruitu ah a siah),

¹¹Hilkiah, Tebaliah leh Zekariah an si. Hosah dâwngsungkhur lakah mi Biakin vêngtu chu an ektê hen leithum an si.

¹²Biakin vêngtu tla chu anmah dâwngsungkhur umdân hâwi vima hen ṭhen an si, Levi dang tla hâwi ber hen Biakin ah rianṭuannâk ruat piak an si.

¹³Dâwngsungkhur a tâwm a tam ruat lêm lo hen zei mi kulh kawtkâ vêngtu ding an si awt ti hen chamchawhnâk siam asi.

¹⁴Selemiah nih saklei mi kawtkâ â ting, a fapa Zekariah chu krai pêktu asi, chu nih marlei kawtkâ â ting.

¹⁵Obed Edom nih simlei kawtkâ â ting, a fapa tla chu thil-le-rî siahnâk kardang vêngtu ah an tla.

¹⁶Supim leh Hosah chu thlanglei kawtkâ anna ting, Saleket chu tlûnlei mi lampi kawtkâ â ting. Vêngtu tla rianṭuan ding mi chu a hun ruat kipah pakhat khat hen ruat an si.

¹⁷Saklei kângah vêngtu paruk, marlei kângah pali. Simlei kângah pali nisiar hen an vêng. Thil-le-rî siahnâk nisiar vêngtu pali, kardang pakhat lakah panih vima hen an vêng.

¹⁸Thlanglei mi puanin lampi kiangah vêngtu pali, puanin pakhat ah panih vima an vêng.

¹⁹Hi hi Korah leh Merari thlâk lakah mi vêngtu rian an ruat piak na mi chu asi.

²⁰An unau Levi dang tla chu Biakin ah tangka kilnâk hotu leh Pathian rangah thilpêk mi kilnâk hotu ah ruat an si.

²¹Ladan, Gerson fapa lakah mi pakhat chu a fapa Jehiel dâwngsung leh a dang tla thlâktu asi.

²²Ladan fapa dang panih, Zetham leh Joel nih tangka kilnâk leh thil siah mi tla lakah hotu sinâk anna ting.

²³Amram thlâk tla, Izhar, Hebron, Uziel tla rang khawmah rianṭuannâk ruat piak an si.

²⁴Mosi fapa Gersom thlâk Sebuel chu Biakin tangka kilnâk hotu asi.

²⁵Eliezer, Gersom unaupa leikâng hen Selomith hen tlâinâk an nei. Rehabiah pa chu Eliezer asi, Jesiah pa chu Rehabiah, Joram pa chu Jesiah, Zikri pa chu Joram, Selomith pa chu Zikri asi.

²⁶Selomith leh a dâwngsung tla chu lalchem David dâwngsungkhur lakah ruitu tla, kawrsen lakah hotu tla, Pathian sinah thil an pêk mi zawzawng lakah hotu an si.

²⁷Râltuknâk ah thil an lâk mi Biakin ah mang ding hen an ap.

²⁸Selomith leh a dâwngsung tla chu Biakin ah mang ding hen thil pêk mi leh khuavâng Samuel nih thilpêk a hawng put mi tla, lalchem Saul nih a put mi tla, Ner fapa Abner nih a hawng put mi tla, Zeruiah fapa Joab nih a hawng put mi lakah hotu an si.

²⁹Izhar thlâk lakah Kenaiah leh a fapa tla chu rianṭuan ding mi ruat piak an si: Lasui rînnâk singsiahnâk kilkâwi ding leh Israel mi tla thunawk lâirêl piak na ding.

³⁰Hebron thlâk tla lakah Hasabiah leh a rualsia sângkhat leh zasarih, an ektê hen mang tlâk ver an si, Jordan Va thlanglei ah Israel lakah, sakhua leh khawtual lakah thunawk leikâng zawzawng ah lâirêlnâk mawhphurhtu ah ruat an si.

³¹Jeriah chu Hebron thlâk tla lakah ruitu asi. David lalchem asi liauah kum sâwmlinâk ah Hebron thlâk dâwngsung lakah thu deihfiangnâk a um le, kawrsen ah mang tlâk mi tla Gilead ram Jazer khua ah a um ti an theih.

³²Lalchem David nih Jeriah rualsia lakah dâwngsungkhur kipah a lukhâi dauh si mi sângnih leh zasarih a thîm na le, Jordan Va saklei ram Reuben, Gad leh saklei mi Manaseh umnâk ram ah Israel tla khuasung thunawk leh sakhua zauhkhenh leikângah khua sungah a siah na.