Read Bawm Chin 1 CHRONICLES 28 Bible Online

1 CHRONICLES 28 - Bawm Chin bible

1 CHRONICLES 28

¹Lalchem David nih Israel lakah rianṭuantu zawzawng Jerusalem ah a pûm ding hen a kawh na. Phun lakah rianṭuantu tla, lalram sungah rianṭuan zauhkhenhtu tla, phun lakah ruitu tla, thil-le-rî leh lal ranrual zauhtu tla, amah fapa tla mun kipah rianṭuan si bâk mi tla, kawrsen ruitu tla leh mi pawimawh tla hen Jerusalem ah anna pûm rawh.

²David an mâika ah a dîr le, thu a sim, “Ka ram mi tla, ngâi u. LALPA Thudântuk Bâwm siah kumzanâk ding hen in sak ka duh le, chu chu LALPA kan Pathian sirhsanh asi. Amah chawnglawmhnâk dingah Biakin sak ding ka timhtuah le,

³sikhawmsele, kei lam chu kawrsen ka si le, thisen tamtak suahtu ka si ruangah, Biakin sak ding hawng ka siang lo.

⁴LALPA, Israel Pathian nih kei leh ka thlâk tla chu Israel lakah lâirêltu si kumza ding hen hawng kan thîm asi. Juda phun chu ruitu sinâk a pêk le, chu Juda phun thawk hen ka pa dâwngsungkhur a thîm. Chu lakah mi kei Israel zawzawng tlûnah lal ah hawng ka thîm mi hi amah duhzia asi.

⁵Fapa tamtak hawng ka pêk, chu lakah mi Solomon chu LALPA lalram Israel zawzawng tlûnah lâirêltu dingah a thîm.

⁶“LALPA nih ka sinah, Ka in saktu ding chu Solomon asi lai. Ka fapa si ding hen ka thîm le, kei chu a pa ka si lai.

⁷Tuah mi hâwi hen ka dân leh thupêk tla thiamthih tak hen a zûl kumza mi asi chun, a lalram chu a um kumza lai.’

⁸“Churuangah tuah ka mi tla, LALPA kan Pathian mâika ah leh Israel mi zapi mâika hin, LALPA kan Pathian nih thu hawng kan pêk mi chu thiamthih tak hen zûl ding hen kan fawrh na asi; chu tikah hi ram ṭha tak hi nanna ting kumza lai le, thlâk hawng um ding mi tla khawm nih nan sin thawk hen anna ting vima lai,” a ti.

⁹Churawhchun Solomon sinah, “Ka fapa, na pa Pathian chu thinlung lung khat leh duhnâk nei hen a rianṭuan ding hen kan simh asi. Anih nih kan thinlung dawn leh kan duh mi zawzawng a theih hep. A sinah na kal chun a nan pawm lai. Sikhawmsele na hertâk chun a nan kaltâk pawt lai.

¹⁰LALPA nih a Biakin thenhlimh sak ding hen a nan thîm asi ti na theih ding asi. Thinlung ah tumnâk tak hen tuah ti rawh,” a ti.

¹¹David nih Solomon chu Biakin sak dân ding leh thil-le-rî siahnâk kardang zawzawng tla, sual ngaihdamnâk Mun Thenhlimh tla sak dân ding tla a simh.

¹²A thinlung ah a um mi zawzawng Biakin kulhsung leh a kiangkam ah um mi in kardang tla, Biakin thil-le-rî leh LALPA rangah an ap mi thil siahnâk kardang sak ding dân tla a simh.

¹³David nih bâwlpu tla leh Levi tla chu munkhat hen an thil ti ding tla Biakin ah mi rianṭuan leh Biakin khêng leh bêl kilkâwi ding tla a simh.

¹⁴Biakin khêng leh bêl tla siam ding hen ngûn leh tangka siam ding zat tla a simh.

¹⁵Khâwnvâr leh a tohnâk kip rang ding tla,

¹⁶tangkasa dawhkân rang, Pathian sinah sangtlêp ap mi siahnâk ngûn dawhkân rang ding tla a sîntir.

¹⁷Thîrzum tla, khêngkûm tla, tî dûr tla, khêng tla siamnâk dingah ngûn leh tangkasa mang ding zat tla,

¹⁸rimthâw duahnâk mâichâm leh thilsiam Thudântuk Bâwm tlûnah an thla zâr hen um mi rangah kari siamnâk dingah ngûn thenhlimh mang ding zat tla a simh.

¹⁹Lalchem David nih, “Chu zawzawng chu LALPA ngelchel nih ti ding hen hawng ka simh zia hen ti dân ding chu hi rîn mi lakah hin a tling hep rawh asi,” a ti.

²⁰Lalchem David nih a fapa Solomon sinah, “Zumh thlir le, tum thlir. Rian chu a dawmh le, zeikhawm nih an tlawlhtir lah seh. LALPA Pathian a rian ka ṭuan mi chu na sinah a um lai. LALPA nih Biakin sak ding mi rian na lîm lân lo chu kaltâk lo hen an um nawh kumza lai.

²¹Bâwlpu tla leh Levi tla chu Biakin timhtuah leikâng rianṭuan dingah ruat an si rawh. Rianṭuantu zât kip thiam mi nih an ṭangpi ding hen an mawhlah rawh. Mi zapi leh an ruitu tla khawm nangmah thu thu hen an um.