Read Bawm Chin 1 CHRONICLES 4 Bible Online

1 CHRONICLES 4 - Bawm Chin bible

1 CHRONICLES 4

¹Hi bang tla hi Juda thlâk a zeimaw mi tla an si: Perez, Hezron, Karmi, Hur leh Sobal.

²Reaiah pa chu Sobal asi. Jahath, Ahumai leh Lahad pa chu Reaiah asi, chu tla chu Zorah ah um mi thlâktu tla an si.

³Hur chu Kaleb fapa upachem mi asi, Kaleb nupi chu Efrat asi. A thlâk tla chu Bethlehem tuahtu tla an si. Hur nih fapa pathum a nei: Etam, Penuel, Ezer. Etam nih fapa pathum a nei: Jezreel, Isma, leh Idbas leh fanu pakhat Hazelelponi asi. Penuel nih Gedor khua a tuah, Ezer nih Husah khua a tuah.

⁵Asur, Tekoa khua tuahtu nih nupi panih Helah leh Naarah a nei.

⁶Naarah hen fapa pali an nei: Ahuzam, Hepher, Temeni leh Hahastari.

⁷Asur leh Helah hen fapa pathum an nei: Zereth, Izhar leh Ethnan.

⁸Anub leh Zobebah pa chu Koz asi, Harum fapa Aharhel thlâk tla thlâktu asi.

⁹Minung pakhat a min Jabez, a dawngsung lakah zahkâi chem mi pakhat asi. A suak liauah a tuar fâk tuk ruangah a nu nih a min ah Jabez a sak.

¹⁰Jabez nih Israel Pathian sinah thla a cham le, “Pathian, mal hawng ka sâwm le, ram tamtak hawng ka pêk. Nganfâk hawng ka pêktu ding mi sualnâk zeizawng lakah hawng ka vêng le, ka sinah um rawh,” ti hen. A deih mi hâwi hen Pathian nih a pêk.

¹¹Kaleb, Suhah unaupa nih fapa pakhat Mehir a nei. Mehir chu Eston pa asi.

¹²Chu nih chun fapa pathum a nei: Bethrapha, Paseah leh Tahinah a nei. Tahinah chu Nahas khua tuahtu asi. Hi minung thlâk tla chu Rekah ah an um.

¹³Kenaz nih fapa panih Othniel leh Seraiah a nei. Othniel khawm nih fapa panih Hathath leh Meonothai a nei.

¹⁴Meonothai chu Ophrah pa asi. Seraiah chu Joab pa asi, mi Zungthiam Kuam, mi zungthiam tla an umnâk tuahtu asi.

¹⁵Jephuneh fapa Kaleb nih fapa pathum, Iru, Elah leh Naam a nei. Elah chu Kenaz pa asi.

¹⁶Jehalelel nih fapa pali a nei: Ziph, Ziphah, Tiria leh Asarel.

¹⁷Ezrah nih fapa pali a nei: Jether, Mered, Epher leh Jalon. Mered nih Aigupta lalchem fanu Bithiah a umpi le, fanu pakhat Miriam leh fapa panih, Samai leh Isbah an nei. Isbah chu Estemoa khua dirhtu asi. Mered nih Juda phun lakah mi nunau a umpi fâwn le, fapa pathum an nei: Jered, Gedor khua dirhtu asi. Heber chu Soko khua dirhtu asi. Jekuthiel chu Zanoah khua dirhtu asi.

¹⁹Hodiah nih Naham farnu a umpi. Annih chu Garm thlâktu an si, chu tla chu Keilah khua ah an um, Maakath chi tla chu Estemoa khua ah um mi an si.

²⁰Shimon nih fapa pali a nei: Amnon, Rinah, Benhanan leh Tilon. Ishi nih fapa panih Zoheth leh Benzoheth a nei.

²¹Selah chu Juda fapa lakah pakhat asi. A thlâk tla lakah Lekah khua dirhtu lakah Er khawm telh sih asi. Maresah khua dirhtu Laadah chu puan mangṭhia tahtu murui, Beth Asbea khua ah um mi tla an si.

²²Jokim leh Kozeba khua um mi tla leh Joash leh Sarap Moab nunau tla umpitu chu Bethlehem ah an um. (Hi thlâk dân tla hi a sâwt thlo rawh.)

²³Lal rianṭuan lakah bêl siamtu an si, Netaim leh Gederah khua ah an um.

²⁴Simeon nih fapa panga a nei : Nemuel, Jamin, Jarib, Zerah leh Shaul an si.

²⁵Shaul fapa chu Salum asi, a tupa chu Mibsam asi, a tupa rokual tak chu Misma asi.

²⁶Misma thawk hen Hamuel, Zakur leh Shimei lakah anna thlâk vima.

²⁷Shimei nih fapa leiruk leh fanu paruk a nei. Sikhawmsele a rualsia tla nih chun fa an nei tâwm dauh le, Juda phun hâwi hen Simeon phun chu a zan lo.

²⁸Lalchem David san tiang hen Simeon thlâk tla chu hi bang khua tla lakah hin an um: Bersheba, Moladah, Hazarsual,

²⁹Bilhah, Ezem, Tolad,

³⁰Bethuel, Hormah, Ziklak,

³¹Beth Markaboth, Hazarsurim, Bethbiri leh Saaraim khua tla lakah hin.

³²Mun dang mun nga lakah an um rih: Etam, Ain, Rimmon, Tochen leh Asan,

³³chun a kiangkam ah mi khua tla Baalath khua sim thlanglei tiang hen an um. Hi bang tla hi an umnâk mun leh an dâwngsungkhur thâwngthâng rîn mi tla chu an si.

³⁴Anmah chi lakah hi tla hi an lû dauh tla chu an si: Meshobab, Jamlek, Josah Amaziah leh Joel fapa, Jehu (Josibiah tapa asi, Josibiah chu Seraiah fapa asi, Seraiah chu Asiel fapa asi.) Elioenai, Jaakobah, Jesohaiah, Asaiah, Adiel, Jesimiel, Benaiah, Ziza (Siphi fapa asi, Alon fapa chu Siphi asi, chu tla chu Jedaiah, Simri leh Semaiah thlâk tla an si). An dâwngsungkhur chu an zan vima ruangah

³⁹thlanglei kângah Gerar tiang an luah le, khuapi umnâk saklei kâng an ran tla râwl an tlattir na.

⁴⁰Chunah chun ram kâu tak leh ṭha tak thlangam tak hen ran râwl tlatnâk an tawng. A lânah chunah um mi tla chu Ham tla an si.

⁴¹Juda lalchem Hezekiah san liauah a tlûnah an min um mi tla chu Gerar khua ah an kal le, chunah um mi puanin leh basâ tla an râwk piak hep na. Chunah um mi tla chu an nar phin na le, an dawrâ tla râwl tlatnâk a ṭha ruangah chunah chun an um pawt.

⁴²Simeon phun lakah mi zanga chu Edom saklei ah an kal. Isi fapa tla nih an kalpi na: Chu tla chu Pelatiah, Neariah, Rephaiah, Uziel an si.

⁴³Chunah chun Amalek mi thibang tla an thah na le, anmah chunah an um kumza rawh.