Read Bawm Chin 1 CHRONICLES 5 Bible Online

1 CHRONICLES 5 - Bawm Chin bible

1 CHRONICLES 5

¹Hi bang tla hi Jakob fapa lakah upachem mi Reuben thlâk tla an si: (a pa nupisûn lakah mi pakhat a ihpi ruangah a fa tîr sinâk a thlâu le, fa tîr sinâk chu Josef rangah pêk asi.

²Juda phun chu phun zawzawng lâirêltu ding leh chak chem si ding hen pêk asi.)

³Jakob fapa upachem mi Reuben nih fapa pali a nei : Hanok, Fanu, Hezron leh Karmi.

⁴Hi hi Joel thlâk tla anna thlâk vima dân chu asi: Shemaiah, Gog, Shimei, Mikah, Reaiah, Baal leh Beerah. Asiria lal lianchem Tiglath Pileser nih Beerah phun ruitu chu a neh le, sal ah a siah.

⁷Reuben phun lakah mi a dâwngsungkhur lakah chi ruitu tla rînnâk chu hi hâwi asi: Jeiel, Zekariah,

⁸leh Azaz fapa Bela, Sema tupa, Joel chi asi. Hi bang chi tla hi marlei thawk hen Nebo tiang hen Aroer ah leh Baal Meon ah an um.

⁹Gilead ram ah ranrual tamtak an nei le, churuang chun saklei ram ramkaro Eufretis Tiva lei kalnâk tiang an luah hep.

¹⁰Lalchem Saul dam liauah Reuben phun tla nih Hagrit mi tla an do na le, tuknâk ah an thah na, Gilead saklei mi an ram, an luah piak na.

¹¹Gad phun tla chu Reuben tla umnâk marlei Basan ram ah saklei mi Salekah tiang an um.

¹²Joel chu chi ruitu asi le, Sapham chu chi pawimawh chem lakah panihnâk asi. Janai leh Saphat chu Basan ram ah chi dang tla thlâktu an si.

¹³Phun lakah midang tla chu Hi bang chi tla lakah mi an si: Mikael, Meshullam, Seba, Jorai, Jakan, Zia leh Eber.

¹⁴Hi tla hi Huri fapa Abihail thlâk tla an si, an thlâktu sût nawlhnâk chu hi hâwi asi: Abihail, Huri, Jaroah, Gilead, Mikael, Jesisai, Jahdo, Buz tla hi an si.

¹⁵Ahi, Abdiel fapa leh Guni tupa chu Hi bang chi tla sûrlû asi.

¹⁶Basan leh Gilead ram khua tla lakah leh Saron ram zawzawng ran râwl tlatnâk ah khawm an um.

¹⁷(Hi thâwngthâng rînnâk tla hi Juda lalchem Jotham leh Israel lalchem Jeroboam dam liauah timhtuah asi rawh.)

¹⁸Reuben, Gad leh saklei mi Manaseh phun lakah mi kawrsen phaw, nâmsâu leh chanhtiang mang thiam zar sîn mi tla vial sîng li leh sâng li leh zasarih leh sâwmruk an um.

¹⁹Jetur, Naphis leh Nodab khua ah um mi Hagrit phun tla do ding hen an kal.

²⁰Pathian rinhsan hen ṭangpi ding hen thla an cham le, Pathian nih an thlachamnâk chu a sâng le, Hagrit mi leh an mêlma tla lakah nehtu ah a siam na.

²¹An mêlma thawk hen sangâwngsâu sîng ngâ, dawrâ nuai nih leh sîng ngâ, sanatung sâng nih leh tuknâk ah minung nuaikhat an tleih na.

²²Chu râltuknâk chu Pathian nih a bawmh na ruangah mêlma tamtak an thah na, chu ram ah chun sal ah an tâng tiang hen an um.

²³Manaseh mi tla chu Basan ram marlei kângah Baal Hermon, Senir leh Hermon Tlâng ah an um le, an minung tla thungâi an pung.

²⁴Hi bang tla hi chi lakah a sûrlû dauh tla an si: Epher, Ishi, Eliel, Azriel, Jeremiah, Hodaviah leh Jahdiel tla an si. Kawrsen lei leh chi leh kuang lakah ruitu minthang tluang vawr dauh an si.

²⁵Sikhawmsele mi tla chu an thlâktu Pathian lakah zumhkâi hen an um lo le, Pathian nih ram lakah um mi tla a nar rawh mi phun pathian tla sawnh ding hen an Pathian an kaltâk rawh.

²⁶Churuangah Asiria lal lianchem Pul (Tiglath Pileser khawm an ti) nih an ram a rûn. Reuben phun, Gad, saklei mi Manaseh tla chu sal ah a kalpi na le, Halah, Habor, leh Hara leh Gozan Tiva kiangah a umtir na.