Read Bawm Chin 1 CHRONICLES 9 Bible Online

1 CHRONICLES 9 - Bawm Chin bible

1 CHRONICLES 9

¹Israel mi zawzawng tla chu an dâwngsungkhur um dân hâwi vima hen rîn an si. Hi hi Israel lal tla thâwngthâng rînnâk bu ah theihnâk dingah rîn asi. Juda mi tla chu an sual ruangah rêp hen Babulon sal ah an um.

²Anmah ting ding khuapi luah masa ding mi chu, Israel zatlâng rêlsih hen, Bâwlpu tla, Levi tla, Biakin rianṭuantu tla an si.

³Juda phun lakah mi, Benjamin, Efraim leh Manaseh phun tla chu Jerusalem ah um ding hen an kal rawh.

⁴Juda phun Jerusalem ah um mi vial chu zaruk leh sâwmkua asi. Juda fapa thlâk, Perez nih ruitu Omri tupa Amihud fapa Uthai an nei. An thlâktu dang tla Imri leh Bani telh sih asi. Juda fapa thlâk Selah nih dâwngsungkhur lakah a lû dauh Asaiah chu anmah ruitu ding hen an nei. Juda fapa thlâk Zerah nih an ruitu dingah Jeuel an nei.

⁷Jerusalem ah Benjamin phun um mi tla chu hi bang hi an si: Meshullam fapa Sallu, Hodaviah fapa Meshullam, Hasenuah fapa Hodaviah. Jeroham fapa Ibneiah, Mikri tupa Uzi fapa Elah. Sephatiah fapa Meshullam, Reuel fapa Sephatiah, Ibnijah fapa Reuel.

⁹Hi phun tla dâwngsungkhur chunah um mi vial chu zakua leh sâwmnga leh paruk an si. Rîn mi tla vial chu dâwngsungkhur ah a lû dauh an si.

¹⁰Hi bang Bâwlpu tla hi Jerusalem ah um mi tla an si: Jedaiah, Jehoiarib leh Jakin Hilkiah fapa Azariah, (Biakin rianṭuantu lakah hotu chem asi), amah thlâktu tla chu Meshullam, Zadok, Meraioth leh Ahitub. Jeroham fapa Adaiah thlâktu tla chu Pasur leh Malkijah. Adiel fapa Maasai thlâktu tla chu, Jahzerah, Meshullam, Mesilemith leh Imer an si.

¹³Bâwlpu, dâwngsungkhur khat lakah hotu tla fawnh ver hen sâng khat zasarih leh sâwmruk an si. Biakin ah rianṭuan zeizawng lakah thiam mi an si.

¹⁴Hi bang Levi tla hi Jerusalem ah um mi tla an si: Hasup fapa Semaiah, amah thlâktu tla Azrikam leh Hasabiah, Merari chi Bakbakar, Heres leh Galal, Mika fapa Mataniah thlâktu chu Zikri leh Asap, Semaiah fapa Obadiah thlâktu tla chu Galal leh Jeduthun. Asa fapa Berekiah, Elkanah tupa asi, anih chu Netophah khua umnâk ram ah um mi asi.

¹⁷Jerusalem ah Biakin ngâktu um mi tla chu: Salum, Akub, Talmon leh Ahiman an si. Salum chu an hotu asi.

¹⁸Chu phun lakah mi tla chu saklei mi tualmâi Lal Kulh Kawtkâ an ti mi leiah an um. A lân khawmah kawtkâ vêng hen Levi tla umnâk ah an um.

¹⁹Salum, Kore fapa, Abiasap tupa chu a hâwi Korah thlâk tla hen a lânah anmah thlâktu tla LALPA mun zauhkhenhtu an si hâwi hen, LALPA umnâk Puanin kawtkâ vêng ding hen mawhphurhnâk anna ting.

²⁰Phineas, Eleazar fapa a sinah LALPA um mi nih veikhat chu a zauhdik na.

²¹Meselemiah fapa Zekariah chu LALPA umnâk Puanin tualmâi vêngtu asi bâk.

²²Tualmâi leh kulh kawtkâ vêngtu ding hen an ektê hen mi zanih leh leinih thîm an si. An umnâk khua dân vima hen rîn an si. An mawhphurhnâk mun ah siahtu tla chu Lalchem David leh khuavâng Samuel an si.

²³Anmah leh an thlâk tla nih Biakin kawtkâ chu an vêng kumza ding asi.

²⁴Kulh kawtkâ nih chun munkip lei a hawih, marlei, simlei, saklei, thlanglei kâng hawi hen, kawtkâ kip nih vêngtu a nei chiau.

²⁵Chubang vêngtu tla chu khua lakah mi an rualsia tla nih ni sarih kar lakah tan khat vima an ṭangpi na.

²⁶Vêngtu lû chem pali chu Levi chi an si, mawhphurhnâk lian tingtu an si chawlh. Biakin ah thil-le-rî kil leh kardang tla zauhkhenh ding hen khawm mawhphurhnâk anna ting.

²⁷Zîng siar hen Biakin kulh kawtkâ awngtu leh vêngtu an si ruangah Biakin kiangah an um.

²⁸Levi dang tla chu khêng leh bêl lakah mawhphurhnâk an nei. An mang kipah an lâk lei leh an siah lei khawm an zauhdik vima.

²⁹A dang tla chu thil thenhlimh leikângah mi sang, uain, oliv, sariak rimthâw leh an rim thâwttirnâk leikâng hotu an si.

³⁰An rimthâwtnâk chawmh leikângah mawhphurhtu chu bâwlpu an si.

³¹Levi mi a min Matithiah, Salum fapa upachem mi Korah thlâk chu, thil ap sang em leikângah timhtuahtu mawhphurhnâk â ting.

³²Kohat thlâk tla chu sangtlêp thenhlimh Dinhni siar rangah timhtuah leikângah mawhphurhtu asi.

³³Levi dâwngsungkhur tla a zeimaw mi chu Biakin ah tumphung leikângah mawhphurhtu an si. Dâwngsungkhur lakah hotu dauh tla chu Biakin zeimaw mi sungah an um le, a sûn a zân hen kawh kumza mi an si ruangah rianṭuan dang lakah an âwl.

³⁴An min rîn hen um mi tla chu Levi dâwngsungkhur lakah a lû dauh an si, anmah anna thlâk zia dân hen. Jerusalem ah um mi tla chu a hotu dauh an si.

³⁵Jeiel nih Gibeon khua a dirh le, chunah chun a um. A nupi min chu Maakah asi.

³⁶A fapa upachem mi chu Abdon asi, a fapa dang tla chu: Zur, Kis, Baal, Ner, Nadab,

³⁷Gedof, Ahio, Zekariah leh

³⁸Simeah pa Mikloth. An thlâk tla chu an chi tla kiangah Jerusalem ah an um.

³⁹Ner chu Kis pa asi, Kis chu Saul pa asi. Saul nih fapa pali a nei: Jonathan, Malkisua, Aminadab leh Esbaal.

⁴⁰Jonathan chu Meribaal pa asi, Meribaal chu Mikah pa asi.

⁴¹Mikah nih fapa pali a nei: Pithon, Melek, Tarea leh Ahaz.

⁴²Ahaz chu Jarah pa asi. Chu nih chun fapa pathum a nei: Alemet, Azmavet leh Zimri. Zimri chu Moza pa asi.

⁴³Moza chu Binea pa asi, Binea chu Rephaiah pa asi, Rephaiah chu Eleasah pa asi, Eleasah pa chu Azel asi.

⁴⁴Azel nih fapa paruk a nei: Azrikam, Bokeru, Ismael, Seariah, Obadiah leh Hanan an si.