Read Bawm Chin 2 CHRONICLES 10 Bible Online

2 CHRONICLES 10 - Bawm Chin bible

2 CHRONICLES 10

¹Rehoboam chu Israel marlei mi zawzawng amah lal ah siam ding hen anna pûmnâk Sekem ah a va kal.

²Nebat fapa Jeroboam lalchem Solomon sinah mi Aigupta leiah a tek mi nih chu thu chu a theih le, in leiah a kîr rawh.

³Marlei mi phun tla nih Jeroboam chu an kawh le, an ektê hen Rehoboam sinah an va kal le, a sinah,

⁴“Na pa nih thilrit tak kan tlûnah hawng kan phurhtir le, hi thilrit hi zâng dauh le nun nuam dauh ding hen na kan siam ding asi chun na ti leh khua zumhkâi tak kan si lai,” an ti.

⁵Rehoboam nih a sâng le, “Hi thu ruat ding hen ni thum ding hun hawng ka pêk ule, chu tikah hawng nawlh u,” a ti na. Churawhchun zapi tla chu an kal rawh.

⁶Lalchem Rehoboam nih a pa Solomon krai pêktu lun tla sinah chun krai â khâi le, “Zapi tla sâng kho ding hen krai hawng ka pêk u,” a ti na.

⁷Annih nih “Hi zapi minung tla lakah vêl na nei hen lawmhtir na tum asi chun, nangmah lakah rianṭuantu zumhkâi an si kumza lai,” an ti.

⁸Sikhawmsele upa tla krai pêk chu a duh lo le, amah rual tlangvâl tla krai pêktu ah a mang na mi sinah a kal.

⁹“Nannih nih zei krai nan hawng ka pêk awt? Kan thilrit phurh zâng dauh hawng kan siam piak titu zapi minung sinah zei thu ka sim lai?” a ti hen, a deih na.

¹⁰Annih nih an sâng le, “Hi hâwi hen simh na: ‘Ka pa tâi ngâk hen ka ngetê a lian dauh.

¹¹Ka pa nih thilrit tak a nan phurhtir na le, chu ngâk rit dauh ka nan phurhtir na awt. Anih nih vuakfung hen an vuak na le, kei lam nih chun rang vuaknâk hen kan vuak na awt!’” ti na.

¹²Ni thum nûnah chun Jeroboam leh mi zapi a simh na rawh hâwi hen a sinah an va kal rawh.

¹³Lalchem Rehoboam nih upa tla thu simh chu a ngâi duh lo le, tlangvâl tla nih an simh hâwi hen a ro hen mi zapi sinah thu a sim.

¹⁴An sinah, “Ka pa nih thilrit tak an phurhtir na le, kei lam nih chun chu ngâk rit dauh hen kan phurhtir na awt. Vuakfung hen a nan vuak na le, kei nih chun rang vuaknâk hen kan vuak na awt!” a ti na.

¹⁵Siloh ah mi khuavâng Ahijah mang hen LALPA Pathian nih Jeroboam sinah thu a sim mi chu a hawng tlung mi asi. Churuangah asi, lal nih mi zapi thu a ngâi duh lonâk chu.

¹⁶Chun, zapi minung nih lal nih an thu a ngâi piak duh na lo ti an theih rawh chun, “David leh a dâwngsung chu niamh hen um ko seh! Kannih rangah thil zei an ti mi a um? Israel mi tla, in lei tlung ding! Rehoboam chu amah leh amah a zauhkhenh ko seh!” ti hen an âu. Churawhchun Israel mi tla chu an hel le,

¹⁷Juda ram ah um mi tla Rehoboam chu an kaltâk ving na.

¹⁸Churawhchun, rianṭuan hotu chu a kawh le, Israel leiah fial ding hen, sikhawmsele annih nih lung hen thi thlo hen an seh. Churawhchun Rehoboam chu mawhsareh hen Jerusalem leiah a tek.

¹⁹Chu thawk chun mârlei Israel ram chu lalchem David dâwngsungkhur lakah chun an hel rawh.