Read Bawm Chin 2 CHRONICLES 11 Bible Online

2 CHRONICLES 11 - Bawm Chin bible

2 CHRONICLES 11

¹Lalchem Rehoboam chu Jerusalem ah a tlung rawh chun, kawrsen tha tla Benjamin leh Juda phun lakah mi nuaikhat leh sîng riat a pumh na. Marlei mi Israel phun tla do na hen a tangah siah na ding a tum.

²Sikhawmsele, LALPA nih khuavâng Semaiah chu

³Lalchem Rehoboam leh Juda leh Benjamin phun tla sinah thu va simh na ding hen a simh:

⁴“Nan hâwi Israel tla chu do na lah ule, in leiah tlung ver u. Thil a hawng um mi chu keimah duh dân asi,” ti hen. LALPA thupêk chu an ngâi le, Jeroboam do ding mi chu anna lêt rawh.

⁵Rehoboam chu Jerusalem ah a um le, Juda leh Benjamin ram ah mi khuapi chu kulh a siam:

⁶Bethlehem, Etam, Tekoa,

⁷Bethzur, Soko, Adullam,

⁸Gath, Maresah, Ziph,

⁹Adoraim, Lakis, Azekah,

¹⁰Zorah, Aijalon leh Hebron tla chu.

¹¹Bir tak hen kulh a siam le, hotu mun kipah a siah na, ei ding tla, buh, oliv sariak leh uain tla mun kipah a siah,

¹²phaw leh fei tla khawm. Chu hâwi hen amah zauhkhenh hen Juda leh Benjamin phun tla chu a kilkâwi na.

¹³Israel ram ah Bâwlpu leh Levi tla chu Juda simlei ah an kal.

¹⁴Levi tla nih chun Israel lalchem Jeroboam leh amah ruangrûl ah umtu tla nih LALPA bâwlpu rangah an mang na lo rawh ruangah an ram leh an ran tlawngnâk chu kaltâk hen Juda ram leh Jerusalem ah anna ṭhial.

¹⁵Jeroboam nih a bâwlpu tla chu lunglotu pathian sawnh ding leh khuri sawnh ding leh chawchal lem a siam mi sawnh ding hen a ruat na.

¹⁶Israel mi zawzawng lakah LALPA, Israel Pathian sawnh duhtu vial Levi tla Jerusalem ah kaltu chu an zûl na, chunah chun LALPA anmah thlâktu Pathian sinah anna bâwl khonâk ding hen.

¹⁷Hi nih hin Juda ram chu a birhtir le, Solomon fapa Rehoboam chu kum thum kar ṭangpi hen lalchem David leh Solomon dân zûl hen an um.

¹⁸Rehoboam nih David fapa Jerimoth fanu Mahalath a umpi, a nu chu Jese tunu Eliab fanu Abihail asi.

¹⁹Fapa pathum an nei, Jeus, Semariah, Zaham an si.

²⁰A nehnûnah Absalom fanu Maakah a umpi le, fapa pali an nei: Abijah, Atai, Ziza leh Selomith an si.

²¹Rehoboam nih nupi leiriat leh a nupisûn sâwmruk a nei, fapa kul leh pariat leh fanu sâwmruk a nei. A nupi zawzawng leh a nupisûn zawzawng lakah Maakah chu a dâwt chem.

²²A fapa Abijah Maakah hen an ring mi chu a fapa zawzawng dang ngâk hen a sunhsak le, amah ruangrûl ah lal ah to ding hen a ruat.

²³Rehoboam nih fing tak hen a fapa le tla tlûnah mawhphurhnâk a pêk le, Juda leh Benjamin ram kulhnei khua ah a umtir na. Thil tamtak a pêk na le, nupi tamtak a lâk piak na.