Read Bawm Chin 2 CHRONICLES 12 Bible Online

2 CHRONICLES 12 - Bawm Chin bible

2 CHRONICLES 12

¹Rehoboam chu lal asi mi leh thuneihnâk a hawng nei rawh chun a mi le hen LALPA dân an kaltâk rawh.

²A lal kum nga nâkah zumh an kâi lo ruangah LALPA rêpnâk a hawng tlung.

³Aigupta lalchem Sisak nih kari sâng leh zanih, rang tlûnah chuan mi sîng ruk leh kawrsen rêl châwklo rê, Libia, Sukit leh Sudan kawrsen tla murui hen Jerusalem an do.

⁴Juda ram ah kulhnei a lâk le, Jerusalem tiang a râwng.

⁵Khuavâng Semaiah chu lalchem Rehoboam leh Jerusalem ah ruitu tla anna pûm mi sinah a va kal le, an sinah, “Hi hi LALPA thu nan sinah a hawng tlung mi chu asi: ‘Nan ka kaltâk ruangah, tuah Sisak sinah kan pêk na rawh’ a ti, ti hen.

⁶Lalchem leh ruitu tla chu kan sual ngâk asi ti hen anna pêk le, “LALPA nih a ti rawh mi chu a dik asi,” an ti.

⁷Chu chu LALPA nih a muh na le, Semaiah sinah thu a sim nawlh. An sualnâk anna theih ruangah ka râwk na awt lo. Sisak nih a do na tikah an thi hep lai loh. Jerusalem nih ka thinthawknâk hâwi rak chun a tuar lai loh.

⁸Sikhawmsele Sisak nih a neh na lai le, keimah rian an ṭuan mi leh tual ah mi lâirêltu tla rian an ṭuan mi â dang zia an theih lai,” a ti.

⁹Lalchem Sisak chu Jerusalem ah a kal le, Biakin ah mi leh lal in ah mi thil-le-rî tla a lâk. Thil zawzawng a lâk ver le, lalchem Solomon nih ngûn phaw a siam mi khawm a lâk sih.

¹⁰Rehoboam nih chu ruangrûl ah dâr phaw tla a siam le, lal in kulh kawtkâ vêngtu tla rangah a ap na.

¹¹Lalchem Biakin ah a kal kipah phaw tla chu vêngtu tla nih an va lâk le, vêngnâk mun ah an siah nawlh.

¹²An sualnâk LALPA sinah an phuang ruangah LALPA thinthawknâk nih chun Rehoboam chu a veih dep lo le, Juda ram ah thil chu a kal ṭha vima rih.

¹³Rehoboam chu Jerusalem ah lâi a rêl le, a lal thiltikhonâk chu a sâng vima. Lal asi liauah kum sâwmli leh kum khat mi asi. LALPA nih amah sawnhnâk mun dingah Israel ram zawzawng lakah a thîm mi Jerusalem khuapi ah kum leisarih lâi a rêl. Rehoboam nu chu Amon ram ah mi Naamah asi.

¹⁴Thilsual tak a ti le, LALPA duhzia ti ding a tum lo ruangah.

¹⁵Rehoboam thilti a bul thawk hen a dawngh tiang leh a dâwngsungkhur tla chu khuavâng Semaiah thâwngthâng leh khuavâng Iddo thâwngthâng rînnâk bu ah muh kho asi. Rehoboam leh Jeroboam chu do kumza hen an um.

¹⁶Rehoboam chu a thi le, David Khuapi mi lal thlân ah an vûi. A fapa Abijah a ruangrûl ah a lal.