Read Bawm Chin 2 CHRONICLES 13 Bible Online

2 CHRONICLES 13 - Bawm Chin bible

2 CHRONICLES 13

¹Israel tla lalchem Jeroboam lâirêl kum leiriatnâk ah Abijah chu Juda lal a hawng si le, Jerusalem ah kum thum lâi a rêl.

²A nu chu Gebiah khuapi mi Uriel fanu Mikaiah asi. Jeroboam leh Abijah karah donâk a hawng um rawh.

³Abijah nih kawrsen nuai li a timhtuah le, Jeroboam nih kawrsen nuai riat hen a do.

⁴Kawrsen tla chu Epfraim tlâng ram ah anna tawng le, Abijah chu Zemaraim tlâng ah a kâi le, Jeroboam leh Israel tla rangah a auh na: “Ka thu ngâi u!

⁵LALPA Israel Pathian nih râwk kho lo ding hen thudântuk David sinah a siam le, a thlâk le tla chu Israel lakah lal si kumza ding hen a pêk ti nan theih lo ma?

⁶Nebat fapa Jeroboam chu lalchem Solomon tlûnah a hel.

⁷A nehnûnah mi rualo murui a pumh na le, Solomon fapa Rehoboam ngâksiatê zeikhawm theihnâk neilo anmah do kho lo mi tlûnah an duh duh hen an siam.

⁸Tuhin David thlâk LALPA nih lal sinâk a pêk mi chu do na tum. Kawrsen tamtak leh ngûn chawchal lem Jeroboam nih na pathian rangah a nan siam piak mi tla na nei.

⁹Aron thlâk LALPA bâwlpu leh Levi tla chu na nar ver na. Anmah mun ah chun bâwlpu phun dang tla nih an ti mi hâwi hen na ruat na. Chawchal mawh dawrâ pasarih tawng kho hen a pêk mi zawng chu bâwlpu si hen na pathian chu Pathian ah anna veih vima.

¹⁰“Sikhawmsele kannih lam chu LALPA kan Pathian rianṭuan hen amah chu kan kaltâk dah lo. Aron thlâk bâwlpu tla nih an rianṭuan an ṭuan le, Levi tla nih an ṭangpi na.

¹¹Zînglei leh zânlei siar hen rimthâw tla an ap le, ran bâwlnâk duah mi tla khawm an ap. Dawhkân ah sangtlêp thenhlimh tla a dân hâwitê hen an siah le, zânlei siar hen ngûn meichêu an chêu. LALPA nih thu hawng kan pêk mi hâwi hen kan ti le, nannih lam chu amah nan kaltâk.

¹²Pathian tak chu hawng kan ruitu asi le, a bâwlpu tla khawm hinah kan sinah tâwtawrâwt hen an um le, nanmah do ding hen râltuk dingah kawhnâk tum ding hen râlring zet hen an um. Israel mi tla, nan thlâktu tla LALPA Pathian chu do lah u! Nan neh ṭung lai lo!” a ti na.

¹³Chu liau chun Jeroboam nih a kawrsen zeimaw zat ding chu Juda kawrsen bawh ding hen a dang chereh hen a fial na le, a dang vial chu an mâitawnh hen a siah na.

¹⁴Juda tla nih an kiangkam an zauh le, an kulh hep na rawh ti an muh. Ṭangpi sâwm hen LALPA an auh le, bâwlpu tla nih an tâwtawrâwt an tum.

¹⁵Juda mi tla chu fâk tak hen an âu le, Abijah nih a rui na le, an do na rawh; Pathian nih Jeroboam leh a kawrsen tla chu a nehtir na rawh.

¹⁶Juda tla dotu Israel tla chu an tek le, Pathian nih Juda tla chu anmah ngâk hen a chaktir na.

¹⁷Abijah leh a kawrsen tla nih Israel tla chu an neh dep na le, Israel kawrsen zumhkâi maktaduai khingkhuai an thah na.

¹⁸Juda tla chu anmah thlâktu LALPA, Pathian lakah anna ngauh ruangah Israel nehtu an si rawh.

¹⁹Abijah nih Israel kawrsen tla chu a ṭhâwl na le, a khuapi tla zeimaw zat an lâk: Bethel, Jesanah, Ephron leh a kiangkam mi khua tla hen.

²⁰Abijah lâirêl kar vial chu Jeroboam nih thiltikhonâk a nei lo rawh. A dawnghnâk ah LALPA nih a rêp le, a thi rawh.

²¹Abijah chu a chak hen a thiltikhonâk a sâng dadauh. Nupi leili a nei le, fapa kul leh panih leh fanu leiruk a nei.

²²Abijah thâwngthâng zawzawng a thusim leh a thilti zawzawng chu khuavâng Iddo thâwngthâng bu rînnâk ah rîn ver asi.