Read Bawm Chin 2 CHRONICLES 14 Bible Online

2 CHRONICLES 14 - Bawm Chin bible

2 CHRONICLES 14

¹Lalchem Abijah chu a thi le, David khuapi ah lal thlân ah an vûi. A fapa Asa amah ruangrûl ah a lal le, Asa tangah ram chu thlangam tak hen kum râ kar a um.

²Asa nih thil ṭha leh thil dik ti hen Pathian a lawmhtir.

³Ramdang mi lunglotu pathian sawnhnâk tla a râwk le, Aserah pathiannu lem lungtung tla a thlûk.

⁴Juda mi tla chu anmah thlâktu LALPA Pathian duhzia ti ding leh a sîntirnâk leh a thupêk zûl ding hen a fawrh na.

⁵Lunglo tla pathian sawnhnâk leh rimthâw duahnâk mâichâm Juda khuapi mi zawzawng a veih ruangah a ram chu a lâirêlnâk tangah thlangam tak hen a um.

⁶Chubang liau chun Juda khuapi kulh tla a siam le, kum zeimaw zat chu LALPA nih thlangamnâk a pêk ruangah tuk a um lo.

⁷Juda mi tla sinah, “Kulhnei khuapi tla kan dirh lai le, insâng tla kan sak lai le, kulh khâr kho ding hen a renhnâk kan siam lai. LALPA kan Pathian duhzia kan ti ruangah ram chu kan kilkâwi asi. Anih nih kil kip mun dang dang ah mi ṭihnungkâi lakah thlangamnâk hawng kan pêk asi,” a ti. Churawhchun tluang tak hen an sak rawh.

⁸Lalchem Asa nih Juda lakah mi phaw leh fei râlthuam nei mi nuai thum leh Benjamin phun ah mi phaw leh chanhtiang mangtu nuai nih leh sîng riat a nei. Chubang zawzawng tla chu sîn mi, mi râlṭha hep an si.

⁹Sudan mi a min Zerah nih kawrsen nuai khat leh kari zathum hen Juda ram a rûn le, Maresah tiang a râwng.

¹⁰Asa chu amah do ding hen a kal le, Maresah kiangah Zephathah Kuam ah an murui nih hen riakmun an khuar vevê.

¹¹Asa nih LALPA a Pathian sinah thla a cham, “LALPA, kawrsen chak lo tak chu thiltikho tak ding hen na ṭangpi kho. Nangmah rinhsanh hen na min hen kawrsen tamtak do ding hen hawng mi kan si ruangah tuah hawng kan ṭangpi rawh. LALPA nang chu kan Pathian na si, nang neh ding hen âukhawm anna ruat lai loh,” a ti.

¹²Juda kawrsen tla nih an do na le, Sudan kawrsen tla chu LALPA nih a neh na rawh.

¹³An tek le, Asa leh a kawrsen tla nih Gerar tiang hen an ṭhâwl na. Sudan mi tla tamtak thah an si le, ṭangbâwm hen an do kho lo rawh. LALPA leh a kawrsen tla an chak ruangah râllâk sum tamtak an lâk.

¹⁴Churawhchun LALPA nih ningṭihnâk a pêk na ruangah Gerar leh a kiangkam khua tla an râwk hep. Kawrsen tla nih khuapi tla an rûn le, sum leh thil tamtak an lâk.

¹⁵Dawrâpu tla an va rûn le, dawrâ leh sangâwngsâu tamtak an va lâk. Churawhchun Jerusalem ah an kîr rawh.