Read Bawm Chin 2 CHRONICLES 15 Bible Online

2 CHRONICLES 15 - Bawm Chin bible

2 CHRONICLES 15

¹Pathian thlarau chu Oded fapa Azariah sinah a hawng tlung le, lalchem Asa sinah a va kal le,

²a sinah, “Lalchem Asa, nang leh Juda leh Benjamin mi zawzawng nih ka thu ngâi u, a lakah nan um kar zawng chu nan sinah LALPA a um. Amah nan hâwl chun nan tawng lai le, sikhawmsele nan her tâk chun anih khawm nih an kaltâk na lai.

³Hun sâwt tak Israel mi tla chu Pathian dik neilo hen bâwlpu anmah sîntirtu neilo hen, dân neilo hen an um.

⁴Sikhawmsele lawksawngnâk a hawng tlung rawh chun LALPA Israel Pathian leiah an hawng a hawi. Amah chu an hâwl le an tawng.

⁵Chu liau tak chun ram kipah nawknâk a um ruangah lût leh suak kho asi lo.

⁶Pathian nih hamhnâk leh nawknâk a tlungtir ruangah phun leh phun, khuapi leh khuapi anna do.

⁷Sikhawmsele, nannih chu chak tak hen nan um hen nan dâwk ding asi lo. Nan rianṭuan man chu nan tawng lai,” ati na.

⁸Asa nih Oded fapa Azariah thusim a theih rawh chun a thin a bir rawh. Juda ram leh Benjamin ram ah milem zawzawng leh Efraim tlâng ram ah khuapi a lâk na mi lakah milem zawzawng a thenh peng. Biakin kulh sungah mi LALPA mâichâm khawm a tharh nawlh.

⁹Asa sinah LALPA a um ti an muh ruangah Efraim, Manaseh, Simeon ram ah um mi tla chu Asa sinah an hawng le, a ram sungah an um. Asa nih Juda leh Benjamin mi zawzawng chu a kawh na.

¹⁰Asa chu lal asi nâk thawk hen kum leinganâk a thla thum ah Jerusalem ah anna pûm.

¹¹Chu ni ah chun râllâk thil an suh na mi hen bâwlnâk LALPA sinah an ap: ranrual zasarih leh dawrâ sâng sarih an ap.

¹²Anmah thlâktu LALPA an Pathian chu an thinlung leh an thlarau zawzawng hen thutiamnâk nei hen lungâwi tak hen an sawnh.

¹³Âuzawng, upa ngâksia, nunau mawh mipa sawnh lotu zawng chu thah ding asi.

¹⁴Hâu fâk tak hen an âu le, thutiam chu LALPA min hen zûl ding hen siat an tleih le, churawhchun an âu le, tâwtawrâwt an tum.

¹⁵Juda tla zawzawng chu an thinlung tak hen thutiamnâk an nei ruangah lâwmnâk an nei le, anih khawm nih a pawm na le, mun kipah thlangamnâk a pêk na.

¹⁶Lalchem Asa nih a pi Maakah lalnu asi nâk chu pathiannu Aserah lem ṭihnungkâi tak a siam ruangah lalnu asi nâk a bângtir. Asa nih milem chu a hâu le, a phel dip le, a neknâwi chu Kidron Vakuam ah a duah hep.

¹⁷Asa nih ram lakah lunglotu pathian sawnhnâk râwk hep lo khawmsele, a dam sung zawng chu LALPA lakah zumhkâi tak hen a um.

¹⁸A pa Abijah nih Pathian sinah a ap mi thil tla leh amah nih ngûn leh tangka a ap mi tla zawzawng Biakin ah a siah hep.

¹⁹A lâirêlnâk kum sâwmthum leh kum nga tiang hen tuknâk zeikhawm a um lo rawh.