Read Bawm Chin 2 CHRONICLES 16 Bible Online

2 CHRONICLES 16 - Bawm Chin bible

2 CHRONICLES 16

¹Asa Juda lalchem lâirêlnâk kum sâwmthum leh kum ruknâk ah, Israel lalchem Baasa nih Juda ram a rûn le, Juda hen sawleh tawnhnâk râwk ding hen Ramah ah kulh a siam.

²Churawhchun Asa nih Biakin ah mi leh a lal in ah mi ngûn leh tangka a lâk le, Siria lalchem Benhadad Damaska mi sinah hi thuchah tla hen a kuat:

³“Kan pa le anna tlâi hâwi hen kanna tlâi bâk lai. Hi ngûn leh tangka hi lâwmman ah kan kuat asi. Tuah Israel lalchem Baasa hen nanna tlâinâk kha sah le, ka ram ah mi kawrsen tla hi a suaktir kho na nâk ding hen,” a ti.

⁴Benhadad nih Asa thusim chu rem a ti le, Israel khuapi do ding hen a kawrsen hotu leh kawrsen tla a fial na. Ijon, Dan, Abel Beth Maakah leh Naphtali ram ah thil siahnâk khuapi tla zawzawng a lâk hep.

⁵Chu hâwi hen thil a hawng um mi Baasa nih a theih le, Ramah khua kulh a siam mi a bâng rawh;

⁶Churawhchun Asa nih kulh siamnâk ah Baasa nih a mang mi lung leh thing tla chu put ding hen Juda ram ah mi zawzawng chu thu a pêk na le, Geba leh Mizpah khua kulh siamnâk ah an mang.

⁷Chu liau chun khuavâng Hanani chu lalchem Asa sinah a va kal le, a sinah, “LALPA na Pathian lakah ngauh ngâk hen Siria lal lakah na ngauh ruangah, Israel kawrsen tla chu nangmah kut lakah mi an suak hep rawh.

⁸Sudan mi leh Libia mi nih kari leh kawrsen tamtak an nei asi lo ma? Sikhawmsele LALPA lakah na ngauh ruangah anmah nehtu sinâk a pêk khateh.

⁹LALPA nih laikulh pumpi hi nâi tek hen a zauh le, amah lakah thinlung zumhkâi tak hen um mi tla sinah chaknâk a pêk na. A tak hen thil na ti ruangah tu thawk hen na lakah râltuknâk a um kumza lai,” a ti.

¹⁰Hi thusim nih Asa chu khuavâng tlûnah a thin a run le, rêng a thlâk rawh. Chu liau chun midang tla khawm Asa nih thungâi a nehsawh na.

¹¹Asa lâirêlnâk thâwngthâng zawzawng chu a bul thawk hen a dawngh tiang hen Juda leh Israel lal tla thâwngthâng rînnâk bu ah rîn asi.

¹²Asa lal asi nâk kum sâwmthum leh kum kua asi liauah a kê nganfâk ruangah a khêng le; sikhawmsele a damlonâk chu LALPA leikâng hawi lo hen daktor leikângah â pêk.

¹³Kum nih nûnah a thi le,

¹⁴David khuapi ah lungpûk amah nih a ker mi lakah an vûi. A ruak chu rimthâw an chulh, thi mi lungfâk zauhtirnâk ah mei humpi an tih.