Read Bawm Chin 2 CHRONICLES 17 Bible Online

2 CHRONICLES 17 - Bawm Chin bible

2 CHRONICLES 17

¹Jehosaphat chu a pa ruangrûl ah a lal le, Israel tla hen anna donâk chu a birtir khun.

²Juda ram ah kulhnei khua zawzawng ah leh Efraim ram ah Asa nih a lâk na mi khuapi zawzawng ah kawrsen a siah na.

³Jehosaphat nih a tîrah a pa umdân zûl hen Baal a sawnh lo ruangah LALPA nih mal a sâwm.

⁴A pa Pathian rianṭuan hen a thupêk tla a zûl le, Israel lal tla umdân châwng hen thil a ti lo.

⁵LALPA nih Jehosaphat chu Juda lakah mi lalram chu a birhtir le, mi tla nih thilpêk tla an hawng pêk le, neih-le-siah hen zah hen a um.

⁶LALPA rianṭuan chu sirhsanh hen lunglotu pathian sawnh zawzawng leh Juda ram ah pathiannu Aserah lem tla a râwk.

⁷A lâirêl kum thumnâk ah a rianṭuantu tla chu Juda khuapi tla ah mi sîntir ding hen a fial na: Benhail, Obadiah, Zekariah, Nethanel leh Mikaiah tla an si.

⁸Levi mi minung pakua leh bâwlpu panih nih an zûl na. Levi tla chu: Semaiah, Nethaniah, Zebadiah, Asahel, Semiramoth, Jehonathan, Adonijah, Tobijah leh Tobadonijah le an si; bâwlpu tla chu: Elisama leh Jehoram an si.

⁹LALPA dân bu anna put le, Juda ram khua zawzawng mi tla sîntir na hen an ṭawl.

¹⁰LALPA nih a kiangkam mi zawzawng tla chu lalchem Jehosaphat do ngam lo ding hen a ṭihtir na.

¹¹Philistia mi ṭhenkhat nih tangka tamtak leh thilpêk dang an hawng pêk le, Arab mi tla nih dawrâ sâng sarih leh zasarih, kêl sâng sarih leh zasarih an hawng pêk.

¹²Jehosaphat chu thil a ti kho dadauh.

¹³Thil tamtak siahnâk khuapi tla teh kulh tla Juda ram ah a sak. Jerusalem ah hotu zumhkâi anmah phun zia zia hen a siah na.

¹⁴Juda chi lakah mi Adnah chu kawrsen hotu asi, a tangah kawrsen nuai thum an um.

¹⁵Murui nihnâkah Jehohanan asi, anih nih kawrsen nuainih leh sîng riat a ho na.

¹⁶A murui thumnâk ah Zikri fapa Amasiah nih nuai nih a ho na, (Amasiah nih mah thinlung duh thu hen LALPA rian a ṭuan.)

¹⁷Benjamin chi lakah mi kawrsen hotu chu Eliada asi, kawrsen thiam mi karo phaw leh chanhtiang mang thiam mi nuai nih a ho na.

¹⁸A hotu panihnâk chu Jehozabad asi, râlthuam tling zat mi kawrsen nuai khat leh sîng riat a ho na.

¹⁹Hi bang minung tla nih hin Jerusalem ah lal rian an ṭuan le, a dang tla chu Juda ram ah mi khuapi kulhnei ah an um.