Read Bawm Chin 2 CHRONICLES 18 Bible Online

2 CHRONICLES 18 - Bawm Chin bible

2 CHRONICLES 18

¹Juda lalchem Jehosaphat chu a nei hen a min a hawng thang le, amah mi tla leh Israel lalchem Ahab mi tla nupi pasal a umh tawnhnâk a siam.

²Kum zeimaw zat nûnah Jehosaphat chu Samari khua mi Ahab sinah a va kal. Jehosaphat leh a mi le tla sunhsak theihnâk ah Ahab nih dawrâ leh ran tla tamtak hen puai a tuah. Jehosaphat chu Gilead ram ah Ramoth khuapi do ding hen a sâwm.

³“Ramoth do ding hen na hawng ka bawp lai ma?” ti hen a deih. Jehosaphat nih a sâng le, “Na do tik zawngah kei leh ka kawrsen tla chu tîm chia kan si ko, kan bawmh lai,” a ti.

⁴Churawhchun Jehosaphat nih, “Sikhawmsele, a masa hen LALPA kan deih lai rih,” a ti.

⁵Ahab nih khuavâng lakah mi zali ding a kawh na le, “Ramoth khua kan do lai ma, do lai lo?” ti hen a deih na. Annih nih an sâng le, “Do na ko, Pathian nih an nehtir lai,” an ti.

⁶Sikhawmsele, Jehosaphat nih, “LALPA sinah thu deih ding hen khuavâng dang an um lo rawh ma?” a ti.

⁷Ahab nih a sâng le, “Khuavâng pakhat a um rih, Imlah fapa Mikaiah. Sikhawmsele kei rangah thu ṭha a sim dah lo ruangah ka huat kâng tak asi; ṭha lo leikâng kumza hen a sim tâwn,” a ti. Jehosaphat nih, “Chu hâwi ngâi chun ti lah ma a!” ti hen a sâng.

⁸Churawhchun lalchem nih a rianṭuantu tla chu Mikaiah chu rang tak hen a sinah hawngpi ding hen a fial na.

⁹Lalchem panih chu an lal thuam hen anna thuam le, Samari khua kulh lênglei fâng chîlnâk munah an laltophah tlûnah an to le, khuavâng zawzawng nih an mâika ah thu an sim.

¹⁰An lakah mi pakhat Kenaanah fapa Zedekiah nih thîr hen ki a siam le, Ahab sinah, “Hi hâwi hen LALPA nih a sim, ‘Hi hen Siria chu na do lai le, na neh hep lai,’” a ti.

¹¹Khuavâng dang zawzawng khawm nih chu hâwi hep hen an sim, “Ramoth khua chu do rawh, na neh ngelchel lai, LALPA nih nehnâk an pêk lai,” an ti.

¹²Chu liau chirah Mikaiah va kawhtupa nih Mikaiah sinah, “Khuavâng dang zawzawng nih a ṭha kâng hen thu an sim mi hâwi hen nang khawm nih sim bâk le a ṭha lai,” a ti.

¹³Sikhawmsele Mikaiah nih, “LALPA a nung mi min sal hen, Pathian nih hawng ka simh mi vial ka sim awt, a ti.

¹⁴Lalchem Ahab mâika ah â va langh le, lal nih a sinah, “Mikaiah, lalchem Jehosaphat leh kei hi Ramoth do ding hen kal ding ma kal lo ding?” ti hen a deih. Mikaiah nih a sâng le, “Do u! LALPA nih nehtu ah an siam na lai,” a ti.

¹⁵Sikhawmsele Ahab nih a sâng le, “LALPA min hen ka sinah thu na sim mi chu dik tak hen sim vei zeizat ka nan ti awt?” a ti.

¹⁶Mikaiah nih a sâng le, “Israel tla chu vêngtu neilo dawrâ hâwi hen tlâng ah anna rek phin mi ka muh. Churawhchun LALPA nih ‘Hi minung tla nih ruitu an nei lo rawh, in leiah thlangam tak hen tlungtir na ko u,’” a ti.

¹⁷Ahab nih Jehosaphat sinah, “Kei rang chun a ṭha lo kâng kumza hen thu a sim, kan ti kha ta a!” a ti.

¹⁸Mikaiah nih a sim vima le: “LALPA nih thu a sim mi hi tuah ngâi! LALPA chu vân ah a laltophah tlûnah to hen, a kiangah vânmifial tla dîr mi zawzawng ka muh.

¹⁹LALPA nih, Ahab chu Ramoth khua ah kal hen thi ding hen âu nih a perpet lai? Vânmifial pakhat nih thu khat a sim, a dang tla nih thu dang an sim.

²⁰LALPA mâika ah thlarau pakhat nih ‘Keimah nih perpet ding dân ka theih a ti lân lo chu an sim chur.

²¹Thlarau nih a sâng le, ‘Ka va kal lai le, Ahab khuavâng tla âwkrâwl thu ka simtir na awt,’ a ti. LALPA nih, ‘Kal le va perpet, na ti kho lai,” a ti.

²²Mikaiah nih a thusim a dawngh le: “Hi hâwi asi, LALPA nih na khuavâng tla na sinah âwkrâwl thu a simtir na. Nangmah lakah siatnâk hawng tlungtir ding a tum ruangah,” a ti.

²³Churawhchun khuavâng Zedekiah chu Mikaiah sinah a va kal le, a mêl ah a bengh le, “Zeiliau me LALPA thlarau nih kei hawng ka kaltâk hen na sinah thu a sim?” a ti.

²⁴Mikaiah nih a sâng le, “Zei kardang sungah mawh thup ding hen na kal tikah na theih lai,” a ti.

²⁵Churawhchun Ahab nih a rianṭuantu pakhat thu a pêk le, “Mikaiah kha tleih le, khuapi lâirêltu Amon leh lal Joash sinah kalpi.

²⁶Rêngin ah thlâk sele, dam hen ka hawng kîr nawlh lan lo chu tî-le-râwl pêk na seh,” a ti.

²⁷Mikaiah nih, “Him tak hen na hawng kîr mi asi chun keimah mang hen LALPA nih thu a sim lo mi asi lai;” a ti. “Ka thusim kha, âuzawng nih theih chiau u,” a ti fâwn.

²⁸Churawhchun Israel lalchem Ahab leh Juda lalchem Jehosaphat chu Gilead ram Ramoth khuapi do ding hen an kal rawh.

²⁹Ahab nih Jehosaphat sinah, “Râltuknâk ah kei lam chu dang tak hen ka thuam lai le, nang lam chu na lal thuam hen a thuam,” a ti. Churawhchun Israel lalchem Ahab chu dang tak a thuam bû hen a kal.

³⁰Siria lalchem nih midang tum lo hen Israel lal cho tum ding hen thu a pêk na.

³¹Lalchem Jehosaphat an muh le, Israel lal ah an ruat le, do ding hen an tum. Sikhawmsele Jehosaphat chu a âu le, LALPA Pathian nih amah chu a hum le, a dotu tla chu anna lêt.

³²Kari hotu nih Israel lal asi lo ti a theih le, an ṭhâwl mi chu anna lêt.

³³Sikhawmsele Siria kawrsen pakhat nih a chanhtiang a hawng kah le, lalchem Ahab râlthuam â tawnhnâk kar chirah a dingh le, kari khalhtu rangah lalchem Ahab nih, “Liamh hen ka um rawh! Hi râltuknâk ah thawk hen hawng k suakpi,” ti hen a âu.

³⁴Râltuk zual liau chirah Ahab chu a kari lakah a rîl ko le, nî a tlâ rawh chun a thi rawh.