Read Bawm Chin 2 CHRONICLES 2 Bible Online

2 CHRONICLES 2 - Bawm Chin bible

2 CHRONICLES 2

¹Lalchem Solomon nih LALPA sawnhnâk Biakin leh amah rangah lal in sak a tum.

²A ruakhâu thiartu rang dingah minung sîng sarih a ruat na, lung leikângah ṭuantu sîng riat, rianṭuan zauhdiktu sâng thum leh zaruk asi.

³Solomon nih Tura lalchem Hiram rangah thu a chah: “Ka pa lalchem David liauah lal in saknâk ding hen sidar thing na zuarh hâwi hen hawng ka zuarh bâk.

⁴LALPA ka Pathian rokualnâk ding hen Biakin ka sak liau asi. Chu chu kei leh ka mi le tla nih amah kan sawnhnâk ding hen mun thenhlimh asi lai le; chunah chun rimthâw tla duah hen, sangtlêp thenhlimh tla ap hen, zîngsiar leh zânsiar thil ap duah mi tla pêk ding hen Dinhni tla, Thla Thar Kût ni tla, leh LALPA kan Pathian ni thenhlimh ah amah rokualtirnâk ding hen. Israel mi tla chu hi bang ti kumza ding hen thu a pêk na.

⁵LALPA kan Pathian chu pathian dang ngâk hen a rokual ruangah a rangah Biakin rokual tak sak ka tum.

⁶Vân men nih a tlum lo ruangah Pathian rang chun âukhawm nih Biakin sak kho asi loh. Pathian sinah rimthâw duahnâk mun cho lo chu kei nih zei Biakin me ka sak kho lai?

⁷Tuah mi zungthiam, ṭialh thiam mi, ngûn, tangka leh dâr leikâng rianṭuan thiam mi, dumpâwl, senduk, leh puansen leikâng siam thiam mi hawng fial. Ka pa David nih mi zungthiam Juda tla Jerusalem ah um mi tla hen ṭuan ding hen.

⁸Thing leikâng tham thiam mi na mi le an um ti ka theih, churuangah sidar thing, saipres thing, juniper thing tan tla Lebanon ah mi hawng ka kuat.

⁹A thing tamtak timhtuahnâk ah na mi le tla ṭangpitu ding hen ka mi le hawng fial ding hen ka tîm ko. Hi Biakin ka sak ding mi hi a kâu hen a rokual awt ruangah.

¹⁰Na mi le tla rang dingah, wheat sangvut metric ton sâng nih, barley sangvut metric ton sâng nih, uain letre nuai li leh oliv sariak letre nuai li ka kuat na lai,” a ti.

¹¹Lalchem Hiram nih lehnâk lasui Solomon rangah a kuat, “LALPA nih a mi tla a dâwt na ruangah an lal rangah a nan siam mi asi.

¹²Tual leh vân siamtu LALPA Israel Pathian chu sawr hen um seh! Lalchem David chu fapa fing tak zeizawng thiamnâk leh finghnâk nei mi, a rangah mun leh Biakin tuah sak tumtu a pêk ruangah.

¹³Huram, mi zungthiam leh rianṭuan thiam leh fing tak na sinah ka hawng fial asi.

¹⁴A nu chu Dan phun a mi asi le, a pa chu Tura ram ah a um mi asi. Ngûn, tangka, dâr, thîr, lung leh thing zeizawng siam thiam mi asi. Dumpâwl, senduk, puansen, leh puan mangṭhia tla khawm a siam kho. Ker leh ṭialh phung zât zawng simh mi vial a ti kho hep. Na pa David rianṭuantu mithiam tla hen ṭuantir na.

¹⁵Tuah wheat sangvut, barley sangvut, uain leh oliv sariak tla na tiamh mi hâwi hen hawng kan kuat.

¹⁶Lebanon tlâng ah mi na duh zat sidar thing an hâu lai le, an têl lai le, Joppa tiang tipi ah an hawng lawngh lai. Chu thawk chun Jerusalem ah nan kalpi kho lai rawh,” a ti.

¹⁷Lalchem Solomon nih a pa David nih mi rêlnâk a nei mi hâwi hen ram dang mi minung Israel ram ah um mi zawzawng a rêl na. Ramdang minung um mi zat chu 153,600 an si.

¹⁸Chu lakah 70,000 chu thil thiartu ah a ruat na le, 80,000 chu tlâng ah mi lung sâitu ah, 3,600 chu rianṭuan vêngtu ah a ruat na.