Read Bawm Chin 2 CHRONICLES 20 Bible Online

2 CHRONICLES 20 - Bawm Chin bible

2 CHRONICLES 20

¹Chu nehnûn chun Amon leh Moab kawrsen tla nih anmah bawptu Meunit tla hen Juda ram an rûn.

²Mifial tla zeimaw mi nih Jehosaphat an hawng simh: “Edom ram thawk hen kawrsen cherkhet leh Tipi Thi leikâng thawk hen mi hen nangmah do ding hen an hawng. Hazazon Tamar chu an lâk ving rawh,” an ti. (Hi hi a min dang chu Engedi asi.)

³Jehosaphat chu a lâu le, ṭangpi sâwm hen LALPA sinah thla a cham. Ram pumpi ah buh ngei ding hen thu a thanh na.

⁴Juda mi khuapi kip thawk hen Jerusalem ah LALPA sinah ṭangpi deih ding hen an hawng.

⁵Chu tla leh Jerusalem ah mi zawzawng tla chu Biakin thar kulh sungah anna pûm.

⁶Lalchem Jehosaphat chu an mâika ah a dîr le, hâu fâk tak hen thla a cham. “LALPA hawng kan thlâktu Pathian, nangnih vân thawk hen laikulh ah mi phun zawzawng tlûnah lâi na rêl. Nang chu thil na tikho hen na chak, âukhawm nih do kho ding mi na si lo.

⁷Nang chu kan Pathian na si. Na mi Israel tla hi ram ah na hawng ṭhial na liauah hi ram ah um mi minung tla chu na nar na le, na hâwipa Abraham thlâk tla rangah ram chu na tâ si kumza ding hen na pêk na.

⁸Hi ram ah hin an um le, nangmah zahnâk ding hen Biakin an sak le,

⁹anmah rêpnâk ding hen râwk leh siatnâk, râltuknâk, râi tla, pâm tla a hawng tlung zâwn ah hi nangmah sawnhnâk mâika ah an hawng dîr khonâk ding hen. An lawksawngnâk thu tla na sinah an hawng tlunh chun, nangnih na ngâi hen ruang na suah na nâk ding hen.

¹⁰“Tuah Amon, Moab leh Edom mi nih hawng kan do. Hawng kan thlâktu tla Aigupta ram thawk hen an hawng suak liauah chubang ram ah lûttir ding na siang na lo le, churuangah kan thlâktu tla chu na rialtir ving na le, veih hen an um lo.

¹¹Chu lehrûl sam hen na kan pêk mi ram ah kan um mi hi hawng kan nar ding hen an hawng asi.

¹²Nang chu kan Pathian na si! Hi hawng kan dotu kawrsen tamtak lakah chun ṭangpi kan herh ruangah nangmah nih rêp na. A ti dân ding zeikhawm kan theih loh, sikhawmsele nangmah ṭangpinâk cho kan bawh ko,” a ti.

¹³Juda mi zawzawng leh an nupi leh an fa tla Biakin ah an dîr pung,

¹⁴Zapi lakah mi Levi pakhat lakah LALPA thlarau a hawng tlung. A min chu Jahaziel, Zekariah fapa asi amah chu Asap chi, Mataniah, Jeiel leh Benaiah thawk hen Asap chi thlâk asi.

¹⁵Jahaziel nih, “Nannih lalchem leh Jerusalem ah Juda um mi zawzawng tla, LALPA nih kawrsen tamtak chu ṭih lah na u. Râltuknâk chu nan nih do ding asi lo le Pathian tlûnah ngauh asi.

¹⁶Thâi ah Ziz liamnâk ah an hawng tikah do na u. Jeruel kiangah mâng ram tiva kuam ah nanna tawng lai.

¹⁷Râltuknâk hi nannih nih do lo hen nan um mun ah ngâk ko u. LALPA nih nehnâk an pêk na ding mi chu nan muh lai. Nannih Jerusalem leh Juda ah mi minung tla, dâwk lah ule, ṭih lah u. Râltuk ding hen kal ule, nan sinah LALPA a um lai!” a ti.

¹⁸Churawhchun lalchem Jehosaphat chu a mêl tual tawngh khet hen a kûn le, zapi minung tla khawn amah hâwi hen an kûn le, LALPA chu an sawnh rawh.

¹⁹Levi chi Kohat leh Korah thlâk chu an dîr le, LALPA Israel Pathian chu âu bû hen an chawnglawmh.

²⁰A thâituan zîngtê ah Tekoa kiang mi mâng leiah an va kal. Anna thawh liauah Jehosaphat nih hi bang thu tla a chah na: “Jerusalem leh Juda mi tla! LALPA nan Pathian lakah a ngauh thlir u, chu tikah bir tak hen nan dîr lai. A khuavâng tla nih an simh na mi chu zumh thlir ule, chu tikah dingchangnâk nan tawng lai,” a ti na.

²¹Chu hâwi hen zapi tla krai a pêk thluh na rawh chun lasaktu murui chu ni thenhlimh ah anna aih mi thuam tla aih hen, “LALPA dâwtnâk chu zungzâl asi! Amah chu sawr hen um seh,” ti la sak bû hen kawrsen tla mâilei ah kal ding hen thu a pêk na.

²²La sak anna dawmh rawh chun, LALPA nih an do na mi kawrsen tla chu zerhnâk a pêk na.

²³Moab leh Amon mi tla nih Edom kawrsen tla an do na le, an veih dep na, anmah leh anmah chu ṭihnungkâi rê hen anna do.

²⁴Juda mi tla chu ramkaro ah mi insâng an tlung rawh chun an mêlma umnâk lei an chuanh le, tual ah an thi mi ruak rîl phut hen an muh na, pakhat khawm an âwl lo.

²⁵Jehosaphat leh a kawrsen tla chu râl thil lâk ding hen an kal le, chaw rual tla, thil-le-rî, nipuan leh thil dang sung tatak an tawng. Ni thum thil-le-rî pumh anna tâwk, sikhawmsele a tam tuktarâi le, an lâk châwk lo.

²⁶A ni linâk ah chun Berakah Tivakuam ah anna pûm le, thil a ti piak na mi zawzawng ruangah LALPA chu an sawr. Churuangah asi chu vakuam chu “Berakah” an tinâk chu.

²⁷Jehosaphat nih Jerusalem leiah a kawrsen tla chu neh bû hen a kîrpi na. LALPA nih an mêlma tla a neh piak na rawh ruangah.

²⁸Khuapi an tlung rawh chun Biakin ah tumphung tumtu ṭingṭang leh tâwtawrâwt tumtu lei an fûk na.

²⁹Phun kip nih LALPA nih Israel mêlma tla a neh piak na mi thu an theih le, an lâu.

³⁰Churuangah Jehosaphat chu thlangam tak hen lâi a rêl le, Pathian nih zei lei zawngah himnâk a pêk.

³¹Jehosaphat chu Juda lal asi liauah kum sâwmthum leh kum nga asi, Jerusalem ah kum kul leh kum nga lâi a rêl. A nu chu Azubah; Silhi fanu asi.

³²A pa Asa hâwi hen LALPA mitmuh hen thil a ti le;

³³Sikhawmsele lunglotu pathian sawnhnâk chu veih hep asi lo. Mi le tla chu lêtnâk thinlung tak nei hen anmah thlâktu tla Pathian an sawnh lo nget rih.

³⁴Jehosaphat nih thil a ti mi dang tla zawzawng a lâirêl dawmhnâk thawk hen a dawngh tiang hen Hanani fapa Jehu thâwngthâng rînnâk bu ah rîn asi, chu chu Israel lal tla thâwngthâng rînnâk bu asi bâk.

³⁵Veikhat chu Juda lalchem Jehosaphat nih Israel lalchem Ahaziah thilsual titu hen tlâinâk a siam.

³⁶Eziongeber lawng dinhnâk mun ah tisumsumriat ah kal mi timeilawng an siam.

³⁷Sikhawmsele Dodavahu fapa Eliezer, Maresah khua mi nih Jehosaphat rangah nun a simh, “Ahaziah hen tlâinâk na siam ruangah na lawng sâi zawzawng chu LALPA nih a râwk lai,” a ti. Churawhchun lawng chu â râwk le, a kal lo pawt rawh.