Read Bawm Chin 2 CHRONICLES 21 Bible Online

2 CHRONICLES 21 - Bawm Chin bible

2 CHRONICLES 21

¹Jehosaphat chu a thi le, David khuapi mi lal thlân ah an vûi le, a fapa Jehoram chu amah ruangrûl ah a lal.

²Juda lalchem Jehosaphat fapa Jehoram nih unaupa paruk a nei: Azariah, Jehiel, Zekariah, Azariahu, Mikael leh Sephatiah an si.

³An pa nih ngûn leh tangka tla leh thilneih sung tatak dang tamtak a pêk na le, kulhnei khua kipah hotu ah a siah seng na. Sikhawmsele, Jehoram chu upachem asi ruangah amah ruangrûl ah a siah.

⁴Jehoram chu a lalnâk a bir tatak rawh chun a unau tla leh Israel lakah rianṭuantu zeimaw mi tla a thah hep na.

⁵Jehoram chu kum sâwmthum leh kum nih asi ah a lal le, Jerusalem ah kum riat lâi a rêl.

⁶Ahab fanu a umpi ruangah Ahab umdân sual leh Israel lal dang tla umdân sual tak a châwng. LALPA lakah thilsual a ti le,

⁷sikhawmsele LALPA nih David sinah thu a tiamh mi a thlâk tla nih lâirêl vima ding hen a tiamh ruangah David lal chi asi nâk chu a veih duh loh.

⁸Jehoram lâirêl liauah Edom mi chu Juda lakah an hel le, a dang ê hen lalram dang hen an um.

⁹Churawhchun Jehoram leh a milian tla chu Edom do ding hen kari hen anna thawh rawh. Chunah chun Edom kawrsen tla nih an hual dak na le, zân ah zeitin tin mawh an suak hep.

¹⁰Chu thawk hen Edom mi tla chu Juda lakah anna thlei rawh. Chu liau lîlâ chun Jehoram nih LALPA a thlâktu Pathian chu a kaltâk ruangah Libnah khuapi khawm an hel.

¹¹Juda ram mun sungah lunglotu tla ruk sawnhnâk a siam le, Juda mi leh Jerusalem mi tla chu LALPA lakah thilsual a tipi na.

¹²Khuavâng Elija nih Jehoram rangah hi hâwi hen lasui a kuat, “LALPA an thlâktu David Pathian nih an mawhtir, a san chu na pa lalchem Jehosaphat leh na pu lal Asa umdân hâwi na um lo ruangah.

¹³Chu hâwi ngâk hen Israel tla umdân zûl hen Juda mi leh Jerusalem mi chu Pathian lakah zumhkâi lo tak hen na umpi na. Ahab leh amah ruangrûl ah umtu tla nih Israel tla zumhkâi lo tak hen an umtir na hâwi hen na umtir na. Nangmah ngâk hen an ṭha dauh mi na unau tla lehlam na thah na.

¹⁴Churuangah LALPA nih fâk tak hen na mi tla, na fa tla leh na nupi tla a rêp na lai le, na neih tla a veih hep lai.

¹⁵Nangmah khawm ril nganfâk na nei lai le, a ni ni hen a zual lai,” a ti.

¹⁶Sudan umnâk kiangkam ah Philistia mi leh Arab zeimaw mi tla an um. Jehoram do ding hen LALPA nih an thinlung a thawktir.

¹⁷Juda ram an rûn le, lal in ah mi thil tla an lâk le, lal nupi tla leh a fapa tla, a ngâksia chem mi Ahaziah cho lo chu sal ah an kalpi hep na.

¹⁸Chu nehnûn chun LALPA nih lal chu ril mâ a veitir.

¹⁹Kum nih ding chu a zual dadauh le, a dawnghnâk ah chun lal chu rûm bû hen a thi rawh. A thlâktu tla rangah lungfâk zauhtirnâk rangah meihûm an tih mi hâwi hen anih rangah chun a khua mi nih an tih piak lo.

²⁰Jehoram chu lal asi liauah kum sâwmthum leh kum nih mi asi le, Jerusalem ah kum riat lâi a rêl. A thi liauah âukhawm an lung a fâk lo. David khuapi ah an vûi le, lal thlân lakah lam chun asi lo.