Read Bawm Chin 2 CHRONICLES 22 Bible Online

2 CHRONICLES 22 - Bawm Chin bible

2 CHRONICLES 22

¹Arab tla nih an rûn na le, Jehoram fapa zawzawng, Ahaziah a ngâksia chem mi cho lo chu an thah hep na. Churawhchun Jerusalem khua mi tla nih a pa ruangrûl ah Ahaziah chu lal ah an siam.

²Ahaziah chu kum kul leh kum nih asi liauah lal a hawng si le, Jerusalem ah kum khat lâi a rêl. Ahaziah khawm lalchem Ahab dâwngsung zia a châwng, a nu chu Athaliah lalchem Ahab fanu, Israel lalchem Omri tunu thilsual ti ding hen fawrhtu asi ruangah.

⁴A pa thih nûnah lalchem Ahab dâwngsungkhur tla chu amah krai pêktu an si ruangah, siat-leh-râwknâk tlungtir ding hen LALPA lakah thilsual an titir.

⁵Anmah fawrh hen, Israel lalchem Joram nih Siria lalchem Hazael a donâk ah a va bawp. Kawrsen tla chu Gilead ram ah mi Ramoth ah neh hen an um le, Joram khawm liamh hen a um.

⁶A mâ va thlawp ding hen Jezreel ah a va kal le, Abaziah nih a va veh.

⁷Ahaziah nih Joram a va veh mi chu, amah siat leh râwknâk Pathian nih a tlungtir. Chunah Ahaziah a um liau chun Nimsi fapa Jehu, LALPA nih Ahab lal chi veihtu ding hen a ruat mi chu Joram hen anna tawng.

⁸Chu lal chi tla chu Jehu nih Pathian rêpnâk a hawng tlungtir awt liauah Juda ruitu murui leh Ahaziah tupa tla Joram veh ding hen zûltu tla a pal na. Chu tla chu Jehu nih a thah hep na.

⁹Ahaziah chu an hâwl le, Samari ah â thup mi an va tawng. Jehu sinah an kalpi le, Jehu nih a thah. Amah lakah zahnâk ding zeikhawm um lah khawmsele a pu lalchem Jehosaphat a ti kho rirî LALPA rangah rianṭuantu zârah a vûi lam chu an vûi. Ahaziah dâwngsungkhur lakah lalram lâirêltu ding pakhat khawm an um lo rawh.

¹⁰Lalchem Ahaziah nu Athaliah nih a fapa tla an thah ver ti thu a theih kâ hen Juda ram ah lal dâwngsung chu thah ver ding hen thu a suah.

¹¹Ahaziah farnu Jehosheba chu bâwlpu Jehoiada hen anna umh. Jehosheba nih Ahaziah fapa lakah pakhat Joash chu a thuptê hen a hum le, lal thah ding mi tla lakah mi chu Jehosheba nih a kalpi le, a thuh ving le, Biakin ah kardang sungah a zauhkhenh. Athaliah kut ah thihnâk lakah mi chu thuh râm hen a hum.

¹²Lalnu Athaliah lâirêl sung zawzawng kum ruk kar chu chunah thuh hen a um.