Read Bawm Chin 2 CHRONICLES 24 Bible Online

2 CHRONICLES 24 - Bawm Chin bible

2 CHRONICLES 24

¹Joash chu Juda lalchem asi liauah kum sarih mi asi. Jerusalem ah kum sâwmli lâi a rêl. A nu chu Zibiah, Bersheba khuapi mi asi.

²Bâwlpu Jehoiada a dam kar vial chu LALPA lawmhkâng hen thil a ti.

³Jehoiada nih lalchem Joash rangah nupi panih a thîm piak le, fanu leh fapa tla an ring.

⁴Joash chu zeimaw tiang a hawng lal rawh chun Biakin remh ding hen thu a thlûk.

⁵Bâwlpu leh Levi tla chi Juda ram ah mi khuapi zawzawng ah tangka a tâwk ri Biakin kum dawnghnâk remhnâk rangah tangka khawlh ding hen thu a pêk na. Khulrang tak hen khawlh ding a simh na le, sikhawmsele Levi tla chu an fawpfual le,

⁶churawhchun lal nih an hotu Jehoiada a kawh le, thu a pêk na le, “LALPA to-aw Mosi nih LALPA umnâk Puanin mi zapi rangah a herh mi rangah Levi tla nih Jerusalem leh Juda ram ah siah an khawlh mi tla chu zeirangah theih asi dah lo rih?” a ti.

⁷(Mi rualo nu Athaliah zûltu tla nih Biakin an râwk ver le, Biakin ah mi thil thenhlimh tamtak khawm Baal sawnhnâk ah an mang.)

⁸Lalchem nih Levi tla chu khawlh mi tangka siahnâk ding hen tâwbala a siam tir na le, Biakin kulh kawt ah siah ding hen.

⁹LALPA to-aw Mosi nih ramkaro ah siah a khawlh masachem mi hâwi hen LALPA sinah mikip nih siah hawng put ding hen Juda ram zawzawng leh Jerusalem ah thu an thanh.

¹⁰Chu nih zapi tla leh an ruitu tla chu thungâi a lawmhtir na le, siah tangka an hawng put mi chu tâwbala a khat phak.

¹¹Nisiar hen Levi tla nih hotu rangah an ruat mi tla sinah chu tâwbala chu an kalpi vima ding asi. Chu tâwbala chu a khat rawh chun, lal lasuirîntu leh bâwlpu ruangrûl ah siah mi nih tangka chu an lâk lai le, tâwbala chu a siahnâk mun ah siah nawlh ding asi. Chu hâwi hen tangka tamtak an khawlh.

¹²Lal leh Jehoiada nih chu tangka chu Biakin remhtu tla hotu sinah an pêk na le, annih nih lungsâitu tla, thinglei ah rianṭuantu tla, thîr leiah rianṭuantu tla lawh rangah an pêk na.

¹³Rianṭuantu tla chu chelh rî hen anna ṭang le, a tîr mi hâwitê hen ṭha ziar hen an sak nawlh.

¹⁴An remh mi an dih rawh chun ngûn leh tangka a um rih mi chu Biakin ah khêng leh bêl rang dingah lal leh Jehoiada sinah an pêk. Jehoiada a dam kar vial chu Biakin ah bâwlnâk khuah tak hen ap asi.

¹⁵Kum zâ leh kum sâwmthum a tling rawh chun thungâi a tar le, a thi rawh.

¹⁶David khuapi ah lal thlân ah Israel mi leh Pathian leh Biakin rangah a ṭuan ti theihnâk ding hen lal thlân ah an vûi.

¹⁷Sikhawmsele Jehoiada a thih nûnah veikhat chu Juda ruitu tla nih Joash chu anmah thungâi ding hen an kuaih.

¹⁸Churawhchun mi tla nih Biakin ah LALPA an thlâktu Pathian sawnh chu bâng hen milem leh pathiannu Aserah chu an sawnh rawh. An thilsual ti ruangah Pathian thinthawknâk chu Juda leh Jerusalem tlûnah a hawng tlung.

¹⁹LALPA nih anmah nunsimh ding hen khuavâng a fial le, sikhawmsele mi tla nih a thu an ngâi duh lo.

²⁰Churawhchun Pathian thlarau chu bâwlpu Jehoiada fapa Zekariah sinah a hawng tlung rawh. Mi zapi tla muh kho ding hen a dîr le, “LALPA Pathian nih zeirangah ka thupêk ngâilo hen nanmah siatnâk karo nan tlungtir! Nan kaltâk ruangah anih khawm nih an kaltâk na rawh!” a ti.

²¹Lalchem Joash chu Zekariah an phiarnâk ah a bawp le, mi zapi tla nih Biakin kulh sungah lung hen an seh.

²²Lalchem Joash nih Zekariah pa Jehoiada rianṭuan zumhkâinâk zawzawng a philh rawh le, Zekariah chu a thah rawh. Zekariah chu a thih awt bâiah “LALPA nih na thilti tla hi muh sele, a nan rêp seh!” ti hen a âu.

²³Chu kum fângzûn liauah Siria kawrsen tla nih Juda ram leh Jerusalem an do le, ruitu zawzawng an thah hep le, thil cherkhet Damaska leiah an tlungpi.

²⁴Siria kawrsen tla chu an tam chiam lo, sikhawmsele an thlâktu an LALPA Pathian an kaltâk ruangah Juda kawrsen tam dauh tla chu a nehtir na mi asi. Hi hâwi hen lalchem Joash chu rêp hen a um.

²⁵Amah khawm fâk tak hen liamh hen a um le, a mêlma tla an tlung ver nûnah a rianṭuantu panih nih an phiar le, Jehoiada bâwlpu fapa tla thah mi lehrûl sam hen a ihkhun ah an thah bâk. David khuapi ah an vûi le, sikhawmsele lal thlân ah lam chun asi lo.

²⁶(Amah phiartu tla chu: Amon mi nunau Shemeath fapa Zabad, leh Moab nunau Simrith fapa Jehozabad an si.)

²⁷Lal tla lasuibu simhfiangnâk bu ah Joash fapa thâwngthâng chu rîn asi le, amah simsâwinâk thu tla leh Biakin a sak thar nawlhnâk tla a um. A fapa Amaziah chu a ruangrûl ah a lal rawh.