Read Bawm Chin 2 CHRONICLES 25 Bible Online

2 CHRONICLES 25 - Bawm Chin bible

2 CHRONICLES 25

¹Amaziah chu kum kul leh kum nga mi asi ah lal a hawng si le, Jerusalem ah kum kul leh kum kua lâi a rêl. A nu chu Jerusalem ah mi Jehoadin asi.

²LALPA duhzia hen thil a ti le, sikhawmsele a tak hen lam chun asi lo.

³Lal asi mi a hawng chak dauh rawh chun a rianṭuantu tla a pa thahtu tla a thah na.

⁴Mosi dân ah mi LALPA thupêk zûl hen an fa tla lam chu a thah piak na lo: “An fa tla nih mi an thah ruangah nu leh pa rangah thah ding asi lo, an nu leh an pa tla nih mi an thah ruangah an fa tla khawm thah ding asi lo; mi thahtupa cho thah ding asi,” ti mi hâwi hen.

⁵Lalchem Amaziah nih Juda leh Benjamin phun ah mi zawng tla chu anmah chi an um zia hâwi vima hen a murui rui hen a siam na, sâng lakah hotu tla, zâ lakah hotu tla a siah na. Kum kul mi leh a tlûnlei an ektê fawnh hen an ektê hen nuai thum ding an si. Râltuk ding hen kawrsen tla tîm zet hen fei leh phaw mang thiam mi a thîm na.

⁶Chu lo khawmah Israel lakah mi kawrsen nuai khat lângnâk ding hen tangka kilogramme sângthum leh zali a pêk.

⁷Sikhawmsele khuavâng chu lalchem sinah a va kal le, a sinah, “Israel kawrsen tla hi na sinah kalpi lah na. Marlei ram ah mi tla sinah hin LALPA chu a um lêm lo.

⁸Nangnih chun tuknâk ah chakpi dauh ding hen na ruat dahmawh, sikhawmsele Pathian chu thiltikhonâk neitu leh nehnâk leh chaknâk a nan pêktu asi ruangah na mêlma chu a nan nehtir lai,” a ti.

⁹Amaziah nih khuavâng sinah, “A man ka pêk ving na rawh mi chu zeitin asi lai rawh ne?” a ti. Khuavâng nih a sâng le, “LALPA nih chu ngâk a tam a nan rulh kho,” a ti.

¹⁰Churawhchun Amaziah nih a lâng na mi kawrsen tla chu in leiah kîr ding hen a simh na rawh. Churuangah Juda mi tla tlûnah an thinrun bû hen an kîr.

¹¹Amaziah a thin a birhtir le, Chitê Vakuam ah a kalpi na. Chunah chun anna do le, Edom kawrsen sîng khat an thah le,

¹²sîng khat an tleih na. Chu an tleih na mi tla chu Sela khuapi mi lungpi tlûnah an kalpi na le, an tul na, a tang mi lung ah an tlâ le, an thi hep.

¹³Chu liau chir chun Israel kawrsen Amaziah nih a sinah a put na ding hen a duh na lo mi tla nih Juda ram khuapi Samari leh Beth Horon karah mi an do na le, minung sâng thum an thah le, râl lâk sum leh thil-le-rî tamtak an lâk.

¹⁴Amaziah nih Edom mi tla neh hen a hawng kîr liauah, an milem tla a put le, a toh na le, a rimthâw tla duah hen a sawnh.

¹⁵Chu nih LALPA thin a thawktir le, Amaziah sinah khuavâng a fial. Khuavâng nih a sinah, “Zeirangah na thiltikhonâk lakah mi an mi tla vêng kholotu ram dang pathian tla na sawnh zia?” a ti.

¹⁶Chu hâwi hen Amaziah rangah a va ti rawh chun, Amaziah nih, “Lal krai pêktu ah ka nan siam mazei? Hawlh lah, dâisip, kan thah salam lai!” a ti. Sikhawmsele khuavâng nih, “Hi bang hâwi thil na ti ruangah leh ka thusim na ngâilo ruangah tuah Pathian nih nangmah veih a tum ti ka theih,” a ti le, a bâng rawh.

¹⁷Juda lalchem Amaziah leh a krai pêktu tla nih Israel tla rangah an phiar na. Jehu tupa Jehoahaz fapa Israel lalchem Jehoash sinah mi a fial le, do ding hen thu a simh.

¹⁸Jehoash nih Amaziah rangah a sâng le, “Veikhat chu Lebanon tlâng mi bualingnei nih sidar thing sinah thu a thanh, ‘Ka fapa nih umpi ding hen na fanu hawng ka pêk, ti hen. Ram sa a hawng kal le, bualingnei chu a hawng chîl dip.

¹⁹Tuah Amaziah, Edom mi tla na neh ruangah na zûm asi, sikhawmsele in ah um ziar ding hen ka nan simh asi. Nang leh na mi leh râwknâk ding hen zeirangah nawknâk na tuah awt?” a ti.

²⁰Sikhawmsele, Amaziah nih a ngâi piak duh lo. Pathian nih Amaziah chu Edom milem a sawnh ruangah neh hen um ding hen a ruat rawh ruangah.

²¹Churawhchun Israel lalchem Jehoash chu Juda lalchem Amaziah do ding hen a kal rawh. Juda ram ah mi Beth Semes ah anna tawng.

²²Juda kawrsen tla chu neh hen an um le, in leiah an tek hep.

²³Jehoash nih Amaziah chu a tleih le, Jerusalem ah a put. Chunah mi khuapi kulh chu Efraim kulh kawtkâ thawk hen a ki mi kulh kawtkâ tiang, feet 600 tluk a sâng chu a râwk dep.

²⁴Biakin ah mi ngûn leh tangka zawzawng, Biakin thuamthil, Obed Edom thlâk tla nih an vêng mi leh lal in ah mi sum-le-pâi tla a tlungpi hep. Thutiamnâk an nei mi thil tla khawm a put hep.

²⁵Juda lalchem Amaziah chu Israel lalchem Jehoash thih nûnah kum leinga a dam rih.

²⁶Amaziah nih thil dang a ti mi zawzawng, a lâirêlnâk bul thawk hen a dawngh tiang hen Israel lal leh Juda lal thâwngthâng rînnâk bu ah rîn asi.

²⁷Lalpa lakah a hel mi thawk hen Jerusalem ah a lakah helnâk karo a um. A dawnghnâk ah chun Lakis khuapi ah a tek le, khawmsele a mêlma tla nih an ṭhâwl le, chunah chun an thah.

²⁸A ruak chu Jerusalem leiah rang an phurhtir le, David khuapi mi lal thlân ah an vûi.