Read Bawm Chin 2 CHRONICLES 26 Bible Online

2 CHRONICLES 26 - Bawm Chin bible

2 CHRONICLES 26

¹Juda mi zawzawng nih Amaziah fapa Uziah kum leiruk mi chu a pa ruangrûl ah lal ah an thîm.

²(Amaziah thih nûnah Uziah nih Elath a lâk nawlh le, khuapi chu a tharh nawlh.)

³Uziah chu kum leiruk mi asi ah lal ah a um le, Jerusalem ah kum sâwmnga leh kum nih lâi a rêl. A nu chu Jerusalem ah mi Jekoliah asi.

⁴A pa hâwi hen LALPA duhzia hen thil a ti.

⁵Phung leikângah ruitu Zekariah a dam kar vial chu LALPA rian zumhkâi tak hen a ṭuan le, Pathian nih mal a sâwm.

⁶Uziah chu Philistia do ding hen a kal le, Gath, Jamnia, Asdod khuapi kulh tla a râwk hep le, Philistia ram kiangah mi Asdod kiangah khuapi kulhnei tla a siam.

⁷Pathian nih Philistia mi tla, Gurbaal ah Arab um mi tla leh Meunit tla neh ding hen a ṭangpi.

⁸Amon mi tla nih Uziah sinah siah an châwi, thiltikho tak hen a um le, Aigupta ram tiang hen a min a thang.

⁹Uziah chu Jerusalem ah Kulh Ki mi kawtkâ, Tivakuam Kawtkâ leh kulh ngâwinâk ah insâng bir tak hen a sak.

¹⁰Mâng khawmah kulhnei insâng a sak le, ranrual tamtak a nei ruangah tlângbul leh phâi ah tikhur tla a chawh. Lo leikâng sunhsak mi asi ruangah ram ah mi tlâng ah lo tla a tuahtir na.

¹¹Lalchem Uziah nih kawrsen râltuktu tamtak a nei. Thil zeizawng rînnâk lasuibu a rîntu Jeiel leh Hananiah, lal rianṭuantu zauhkhenhnâk tangah Maaseiah nih an kil.

¹²Kawrsen tla chu hotu sâng nih leh zaruk nih an ho na.

¹³An tangah kawrsen an ho na mi chu nuai thum leh sâng sarih leh zanga an si, chu tla chu lal mêlma tla dotu ding an si.

¹⁴Uziah nih kawrsen tla rangah phaw, fei tla, lukhuh tla, râltuknâk kawrdawh leh chanhtiang leh a thalzum tla, seh ding mi lung tla a pêk na.

¹⁵Jerusalem ah a thilsiamtu nih chanhtiang thalzum kah ding mi tla, insâng thawk hen thlâk ding lung lian tla, khuapi kulh ki ah thlâk ding mi tla a siam. A min chu mun kipah a thang, Pathian ṭangpi hen a um ruangah thungâi thiltikho hen a um.

¹⁶Uziah chu lal a hawng si le, a hawng chak dauh rawh chun zûmnâk thinlung a nei le, chu chu a niam phahnâk asi. Biakin ah rimthâw duah ding hen a kal mi lakah LALPA a Pathian lung a sitir lo.

¹⁷Azariah bâwlpu leh bâwlpu chak leh râlṭha sâwmriat anna bawp le, lal chu an khap.

¹⁸Uziah sinah, “Uziah! LALPA sinah nangnih rimthâw duah khonâk na nei lo. Aron thlâk bâwlpu rangah thlei mi cho nih hi hi an ti ding asi. Hi mun thenhlimh hi kaltâk rawh. LALPA Pathian lakah thilsual na ti, a malsâwmnâk chu na ting lai lo rawh,” an ti.

¹⁹Uziah chu Biakin ah mi rimthâw duahnâk mâichâm kiangah rimthâw duahnâk put hen a dîr ko. Bâwlpu tla tlûnah a rothawk le, a chal lakah phâr a vei sawm rawh.

²⁰Azariah leh bâwlpu tla nih lâu bû hen lal chal chu an zauh le, Biakin ah mi chu an kaltir sawm. LALPA nih a rêp rawh ruangah mawhsareh hen a suak rawh.

²¹Lalchem Uziah chu a damsung zawzawng chu a phâr ruangah thianglo hen ngaih asi. Biakin khawmah a lût nawlh kho lo rawh le, a rianṭuan zawzawng khawm a bângtâk le, chu kar vial chu a fapa Jotham nih lâi a rêl.

²²Amoz fapa Isai khuavâng nih lalchem Uziah lâirêl sungah thil dang a ti mi zawzawng a rîn hep.

²³Uziah chu a thi le, thlân mun ah an vûi. A phâr ruangah lal thlân lak lam chun an vûi lo. A ruangrûl ah a fapa Jotham a lal.