Read Bawm Chin 2 CHRONICLES 27 Bible Online

2 CHRONICLES 27 - Bawm Chin bible

2 CHRONICLES 27

¹Jotham chu kum kul leh kum nga asi liauah lal asi le, Jerusalem ah kum lêiruk lâi a rêl. A nu chu Zadok fanu Jemsah asi.

²A pa hâwi hen LALPA duhzia hen thil a ti le, sikhawmsele, a pa hâwi hen rimthâw lam chu a duah lo. Mi tla lam chu an sual nget rih.

³Jotham nih Biakin kulh kawtkâ marlei kângah mi a siam le, Jerusalem ah Ophel an ti mi mun khuapi kulh khawm a kauh.

⁴Juda ram tlâng ah khuapi tla a siam le, tumun lakah kulh a siam le, insâng tla a sak.

⁵Amon lalchem leh a kawrsen chu a do na le, a neh na. Amon mi tla chu kum thum kar siah hi hâwi hen pêk ding hen a ruat na: tangka kilogramme sâng thum leh zali, wheat fâng metric ton sâng khat, barley fâng metric ton sâng khat pêk ding hen.

⁶Jotham chu LALPA a Pathian thu zumhkâi hen a zûl ruangah thil a tikho dadauh.

⁷Jotham lâirêlnâk, a râl donâk leh a thiltum leh thâwngthâng dang zawzawng chu Israel leh Juda lal tla thâwngthâng rînnâk bu ah rîn asi.

⁸Jotham chu lal asi liauah kum kul leh kum nga mi asi. Jerusalem ah kum leiruk lâi a rêl.

⁹A thi le, David khuapi ah an vûi le, a fapa Ahaz chu a ruangrûl ah a lal.