Read Bawm Chin 2 CHRONICLES 28 Bible Online

2 CHRONICLES 28 - Bawm Chin bible

2 CHRONICLES 28

¹Ahaz chu lal asi liauah kum kul mi asi le, Jerusalem ah kum leiruk lâi a rêl. Amah thlâktu lalchem David umdân châwng hen thil a ti lo.

²Chu hâwi ding ngâk hen, Israel lal tla zia châwng hen LALPA lawmh lo kâng hen thil a ti.

³Thîr hen Baal lem siam mi a nei le, Hinom Vakuam ah rimthâw a duah le, chu milem lakah a fapa tla bâwlnâk ah a mang. LALPA nih Israel kalnâk zawngah a nar na mi minung tla ti dân a châwng.

⁴Lunglotu pathian sawnhnâk mun, tlâng ah leh thing dâidul tangah Ahaz nih rimthâw duah hen bâwlnâk a ap.

⁵Ahaz chu LALPA a Pathian lakah thilsual a ti ruangah Siria lal nih neh hen a um le, Juda mi tamtak Damaska ah sal ah a put na. LALPA nih Israel lalchem Pekah, Remaliah fapa chu Ahaz nehtu ah a siam le, ni khat kar lakah Juda kawrsen râlṭha chem tla, nuai khat leh sîng nih thah hen an um. An thlâktu tla LALPA Pathian chu an kaltâk ruangah chubang hâwi hawng tlung ding chu Pathian nih rem a ti asi.

⁷Israel kawrsen a min Zikri nih lalchem Ahaz fapa Maaseiah, lal in zauhkhenhtu Azrikam leh Elkanah, thuneihnâk lakah lal sangtu chu a thah na.

⁸Juda mi tla chu anmah ram minung si menza khawmsele, nunau ngâksia nuai nih Samari ah sal ah an put na le, râllâk sum tamtak hen an tlungpi.

⁹LALPA khuavâng pakhat a min Oded chu Samari khuapi ah a um. Israel kawrsen tla an hawng kîr mi chu Juda mi tla sal ah an tleih na mi hen khuapi lût awt bâiah anna tawng le, an sinah, “LALPA an thlâk natu Pathian chu Juda mi tla tlûnah a thinthawk le, anmah nehtu ah an siam na. Sikhawmsele tuah nan neh na dân chu a theih rawh.

¹⁰Tuah nannih nih Jerusalem ah Juda nunau mipa hen sal ah siam nan tum na. Nannih khawm nih LALPA nan Pathian lakah thilsual nan ti mi nan theih lo ma?

¹¹Ka thusim ngâi u! Hi bang sal ah nan tleih na mi hi nan unau leh nan far tla an si. Tuah thlah na u, chu hâwi asi lo chun LALPA a thinrun lai le, a nan rêp na lai,” a ti na.

¹²Marlei kâng lalram ah mi ruitu minung pali, Jehohanan fapa Azariah, Mesilemoth fapa Berekiah, Salum fapa Jehizkiah, leh Hadlai fapa Amasa nih kawrsen tla thilti chu an duhzia asi bâk lo.

¹³Annih khawm nih, “Kha bang sal tla kha hinah hawngpi lah na u! Hawng kan rêp ding hen LALPA thin kan thawktir le, a tlûnah kan sual ving rawh. Tu khawmah kan sual pung ding hen thilti nan duh nget rih,” an ti.

¹⁴Churawhchun sal tla leh an thil zawzawng tla chu an hotu tla sinah an ap na le, churawhchun

¹⁵minung pali tla nih sal tleih tla chu nipuan an lâk mi tla leh thil an lâk mi tla chu an ṭhenh na. Puan leh pheikawk ruk ding an pêk na le, ei leh din ding tla a tâwk ding an pêk na le, an mâ bawih ding rangah oliv sariak tla an pêk na. Kal kho lo mi tla rangah sanatung tla an pêk na, sal ah put mi zawzawng tla chu Juda ram ah mi Jeriko tûm khuapi ah an put na. Churawhchun Israel tla chu Samari leiah an kîr rawh.

¹⁶Edom mi nih Juda an rûn le, minung tamtak an tleih na. Churawhchun Siria lal lianchem Tiklath Pileser chu ṭangpi a sâwm.

¹⁸Chu liau chun Philistia mi tla nih thlanglei tlâng bul ah khuapi tla leh marlei Juda ram tla an rûn. Beth Semes, Aijalon, Gederoth leh Soko khuapi tla, Timnah leh Gimzo khuapi leh a kiangkam ah mi khua tla ah lâk le, chunah chun bir tak hen an um.

¹⁹Lalchem Ahaz nih a mi Juda tla diknâk chu a râwk le, LALPA a siarlo ruangah LALPA nih nawknâk a tlungtir mi asi.

²⁰Siria lal lianchem nih Ahaz rangah bawmh ding ngangâk hen nawknâk lam a siam piak.

²¹Churawhchun Ahaz nih Biakin ah mi leh lal in ah mi tla, zapi ruitu in ah mi ngûn khawm a lâk le, Siria lal lianchem rangah a pêk khawmsele a ṭangpi lêm lo.

²²A lawksawngnâk chu Juda tla rangah siatnâk chem si khawmsele, LALPA lakah a thilsual chu a lân ngâk hen a zual dadauh.

²³Amah nehtu Siria pathian sinah bâwlnâk a ap. “Siria tla pathian nih Siria lal a ṭangpi le, chu hâwi hen kei khawm ka bâwl chun hawng ka ṭangpi bâk lai,” a ti. Chu hâwi a ti ruangah amah leh a phun tla lakah siatnâk a hawng tlung.

²⁴Chu lâwng khawm silo hen, Biakin thuamthil tla zawng khawm a râwk dip. Biakin chu a khâr pang le, Jerusalem khua ah a dang chereh hen mâichâm a siam le, ruk sawnhnâk mun tla a siam.

²⁵Juda ram khuapi leh khuatê kipah lunglotu tla ruk sawnhnâk mun a siam le, chunah chun ram dang mi pathian sinah rimthâw duah ding hen. Hi hâwi hen amah thlâktu LALPA Pathian thinthawknâk chu amah tlûnah a tlungtir.

²⁶A lâirêl sungah mi thâwngthâng a bul thawk hen a dawngh tiang, Juda leh Israel lal tla thâwngthâng rînnâk bu ah rîn asi.

²⁷Lalchem Ahaz chu a thi le, Jerusalem ah an vûi, sikhawmsele lal thlân ah lam chu asi lo. A fapa Hezekiah a ruangrûl ah a lal.