Read Bawm Chin 2 CHRONICLES 3 Bible Online

2 CHRONICLES 3 - Bawm Chin bible

2 CHRONICLES 3

¹Solomon pa lalchem David nih Biakin mun rang ding chu a timhtuah hen a ruat chia rawh. A mun chu Jerusalem ah Moriah Tlâng tlûnah Jebus mi Araunah nih fâng a khâwngnâk mun asi. Lalchem Solomon nih a lalnâk thawk hen,

²a kum li nâk thla nihnâk ah sak ding a dawmh.

³Lalchem Solomon nih a sak mi Biakin chu a sâu lei feet 90, a kauh lei feet 30.

⁴A tualmâi kâu dân chu in vâng kauh feet 30 asi, a sânglei chu feet 180 asi. A kardang sung chu ngûn hen luanh asi.

⁵A kardangpi sung chu thingphel ngûn a ṭha mi zât hen luanh asi. Tûm kûng leh chikchîn lem a chuangtir.

⁶Lal nih Biakin chu lungsung dawh tak mi ngûn Parvaim ram thawk hen lâk mi hen a thuamh.

⁷Biakin vâm tla luanhnâk chu ngûn a mang, a kuaiber, a khuahkhang leh a inkhâr tla khawm ngûn hen luanh asi. A vâm lakah a ṭuantu tla nih thilsiam thla lem an siam.

⁸A sungah mi kardang Mun Thenhlimh Chem an ti mi chu a sâu lei feet 30, a kauh lei feet 30, chu chu Biakin kauh dân tluk asi. Mun Thenhlimh Chem vâm luanhnâk ding hen ngûn metric ton kul ngâk a tam mang asi.

⁹A kilhnâk siam ding hen ngûn gramme zanga sâwmsarih mang asi, a tlûnlei kardang vâm chu ngûn hen luanh asi.

¹⁰Lalchem nih rianṭuantu tla rangah thilsiam thla panih thîr hen siam hen ngûn hen luanh ding, chun Mun Thenhlimh Chem ah siah na ding,

¹¹tualmâi lei hawi hen khat lei sîr vevê ah dîrtir na ding hen thu a pêk. Thla panih vevê nei ding, feet 7.5 tluk sâu vevê hen, an thla chu kardang lâi ah â tâwng vevê hen, khat lei thlâ nih kardang vâm phanh ding asi, chu chu an thla zâr mi nih feet 30 in vâng a tan khang hen khâr tap ding asi.

¹⁴Mun Thenhlimh Chem kardangnâk puanzâr chu puan mangṭhia leh thil a ruakhâu dang hen siam asi. Chu chu a dumpâwl, senduk, a sen mi hen suang mi asi, chunah thilsiam thla lem an chuangtir.

¹⁵Lal nih dâr tung panih a siam le, a sâng lei feet 52 vevê an si. Biakin tualmâi ah an phun. A panih hen a lû an siam le, feet 7.5 tluk a sâng asi.

¹⁶A tung lupâr chu chikchîn lem zemh leh dâr pomegranate zâ lem hen thuamh asi.

¹⁷Chu tung chu Biakin tualmâi sîr khatlei vevê ah an phun, pakhat simlei kâng sîrah mi chu Jakin asi, marlei kâng sîrah mi pakhat min chu Boaz asi.