Read Bawm Chin 2 CHRONICLES 30 Bible Online

2 CHRONICLES 30 - Bawm Chin bible

2 CHRONICLES 30

¹Bâwlpu tla anna thenhlimh tâwk lo rih ruangah leh mi tamtak Jerusalem ah anna pûm lo rih ruangah a thla khatnâk ah a tik takah zapi tla nih Kalkanh Kût an mang kho lo. Churuangah lalchem Hezekiah leh a rianṭuantu tla, Jerusalem ah mi tla nih a thla nihnâk ah mang ding rem an ti le, lalchem nih Juda leh Israel ram ah um mi zawzawng sinah thu a thanh. LALPA Israel Pathian zahnâk Kalkanh Kût mang ding hen Efraim leh Manaseh phun tla chu Jerusalem Biakin ah hawng ding hen thuchahnâk lasuikuat a bîk hen a kuat na.

⁴Lalchem leh mi zapi tla chu an thiltum lakah thungâi anna lâwm le, churuangah Israel mi zawzawng, marlei thawk hen simlei ah mi

⁵Bersheba tiang hen LALPA dân hâwi hen Kalkanh Kût Jerusalem ah mang dut ding hen an chah na le, a lân ngâk a minung tam dauh a pûm ding hen.

⁶Lalchem thupêk hen mifial tla chu an suak le, Juda leh Israel ram pumpi mi tla chu hi sâwmnâk thu hen a sâwm na: “Nannih Israel mi tla, Asiria tleih bang tla, LALPA, Abraham, Isak, Jakob tla Pathian sinah hawng kîr ule, nan sinah a hawng kîr bâk lai.

⁷A nan thlâk natu leh nan hâwi Israel mi tla LALPA an Pathian sinah zumh an kâi lo mi hâwi hen um lah u, fâk tak hen rêp an si zia khawm nan muh ko kha.

⁸Anmah hâwi hen lungkhung lah u, LALPA thu ngâi u. Jerusalem a Biakin ah hawng u, chu chu LALPA nan Pathian nih thenhlimh tak hen amah sawnhnâk ah a siam mi asi le, chu tikah LALPA chu nan lakah a thinthawk lai lo rawh.

⁹LALPA sinah nan hawng kîr chun nan unau sal ah put hen an um mi tla khawm anmah a lungkham na lai le, in leiah a tlungtir nawlh na lai, LALPA nan Pathian chu mi vêlnei leh khuaruat kho mi tak asi, a sinah nan kîr chun anih nih a nan pawm na lai,” ti hen.

¹⁰Mifial tla chu Efraim lel Manaseh ram ah khuapi kipah an va kal le, marlei kângah Zebulun phul umnâk tiang hen, sikhawmsele mi tla nih an nihsanh hen an siar na lo.

¹¹Sikhawmsele, mi zeimaw mi Aser Manaseh, Zebulun phun tla lakah mi chu Jerusalem ah hawng ding an duh nget rih.

¹²Pathian khawm nih Juda mi leh zapi tla a tlâi ding hen an tum mi thil lakah chun lal leh a rianṭuantu tla thupêk zûl ding hen rian a ṭuan.

¹³Sang thilnu telhlo Kût mang ding hen a thla nihnâk ah mi tamtak Jerusalem ah anna pûm.

¹⁴Jerusalem ah bâwlnâk ding leh rimthâw duahnâk mâichâm tla chu an lâk ver le, Kidron Vakuam ah an lawnh hep.

¹⁵Chu thla a ni leili ni ah dawrâ fa tla Kalkanh Kût rang dingah an thah. Bâwlpu tla leh Levi tla, dân hâwi hen anna thenhlimh lo mi tla chu LALPA sinah pumpêknâk an nei rawh chun an ningzâk ual, anna thenhlimhtir rawh nûn lam chun bâwlnâk duahphung an ap kho rawh.

¹⁶Pathian mi Mosi Dân sîntirnâk hâwi hen Biakin ah an mun an luah rawh. Levi tla nih bâwlnâk thisen chu mâichâm ah thehtu bâwlpu tla sinah an pêk na.

¹⁷Mi zapi tamtak chu dân hâwi a thenhlimhtir ver mi an si lo ruangah Kalkanh Kût dawrâ fa chu an thah kho lo le, Levi tla nih an rangah an ti piak na le, dawrâ fa tla chu LALPA sinah an ap.

¹⁸Mi tamtak Efraim, Manaseh, Isakar leh Zebulun phun hawng kal mi tla khawm dân hâwi hen thenhlimhnâk anna timhtuah lo le, churuang chun Kalkanh Kût chu mang ding hâwi hen an mang kho lo. Lalchem Hezekiah nih hi hâwi hen an rangah thla a cham piak na:

¹⁹“LALPA, kan thlâktu Pathian, na ṭhatnâk ruangah hi bang minung tla hi dân hâwi hen thenhlimh hen um lah menza khawmsele, an thinlung tak hen nangmah sawnhtu an si ruangah ngaihdam na rawh,” ti hen.

²⁰LALPA nih Hezekiah thlachamnâk chu a sâng le, mi zapi tla chu a ngaihdam na le, nganfâk zeikhawm a pêk na lo.

²¹Ni sarih kar chu zapi Jerusalem ah hawng kaltu tla nih lâwm tak hen Sang Thilnu telhlo Kût an mang, a ni peh hen Levi leh Bâwlpu tla nih an chaknâk zawzawng hen LALPA an sawr.

²²Hezekiah nih LALPA sawnhnâk an timhtuah mi ruangah Levi tla chu thungâi a sawr na. An thlâktu LALPA an Pathian sinah bâwlnâk tla ni sarih kar an ap nûn chun,

²³ni sarih dang mang nawlh ding hen thu an thlûk nawlh. Churawhchun lâwm tak hen an mang rawh.

²⁴Lalchem Hezekiah nih zapi minung rangah thah hen ei dingah chawchal sâng khat leh dawrâ sâng sarih a pêk na, chun rianṭuantu tla nih chawchal dang sâng khat leh dawrâ sâng râ an pêk bâk. Bâwlpu tamtak chu dân hâwi hen thenhlimhnâk an nei.

²⁵Churawhchun mikip, Juda mi tla, bâwlpu tla, Levi tla, marlei thawk hen hawng mi zapi minung tla, ramdang minung Israel leh Juda ram ah um mi tla chu thungâi anna lâwm.

²⁶David fapa Solomon umnâk thawk hen Jerusalem khuapi ah chu hâwi lawmhnâk chu a um dah loh.

²⁷Bâwlpu leh Levi tla nih mj zapi rangah LALPA sinah malsâwmnâk an deih piak na. Vân thawk hen Pathian nih an thlachamnâk chu a theih le, a pawm piak na.